Navukoŭcy: Pryhažejšyja studentki atrymlivajuć u anłajn-režymie horšyja adznaki, čym u aŭdytoryjach

Navukoŭcam daŭno viadoma, što fizična pryvabnyja ludzi zvyčajna atrymlivajuć bolšy zarobak, čym ich mienš jarkija kalehi. U takich ludziej bolš šansaŭ atrymać pavyšeńnie na pracy i mienšaja vierahodnaść trapić u turmu. Ciapier navukoŭcy, mahčyma, zdolejuć adkazać na pytańnie, čamu tak adbyvajecca, piša The Times.

Taksama pryhožyja ludzi čaściej atrymlivajuć dobryja adznaki va ŭniviersitecie, ale čamu tak adbyvajecca, dakładna nieviadoma. Niekatoryja ekśpierty ličać, što heta prosta vypadki dyskryminacyi z boku vykładčykaŭ na karyść bolš pryvabnych studentaŭ. Inšyja ž miarkujuć, što pryhožyja ludzi nasamreč lepš spraŭlajucca z vučobaj, bo zvyčajna jany bolš upeŭnienyja ŭ siabie.

Adryn Miechik, daśledčyk z Łundskaha ŭniviersiteta ŭ Šviecyi i aŭtar novaj pracy, kaža, što pandemija dała mahčymaść zrazumieć, u čym ža karani takoha efiektu. Jon źviarnuŭsia da 307 studentaŭ-inžynieraŭ, jakija vučylisia va ŭniviersitecie i da pandemii, i padčas jaje. Žury z 37 čałaviek acaniła pryhažość tvaru kožnaha sa studentaŭ pa škale ad 1 da 10 bałaŭ, dzie 10 bałaŭ aznačała «vyklučna pryhožy».

Miechik praanalizavaŭ adznaki studentaŭ pa tych pradmietach, dzie vykładčyki sami vyrašajuć, jak jany aceniać paśpiachovaść svaich studentaŭ. Na hetych pradmietach na adznaki ŭpłyvajuć hrupavyja zadańni, a taksama indyvidualnaja praca na sieminarach i vusnyja adkazy.

Da pandemii bolš pryvabnyja studenty abodvuch pałoŭ zvyčajna atrymlivali lepšyja adznaki. Hetaj pieravahi nie chapała dla taho, kab vyvieści na pieršaje miesca studentaŭ z drennaj paśpiachovaściu, ale statystyčna dadatkovyja bały mieli značeńnie.

Kali lekcyi pierajšli ŭ anłajn-farmat i skončyłasia vočnaje navučańnie, adznaki ŭ studentak-pryhažuń pahoršylisia. Pamier taho «bonusu za pryhažość», jaki jany, zdajecca, mieli da pandemii, paniziŭsia na 80%.

Padajecca, što vykładčyki dabaŭlali takim studentkam bały, i kali pačalisia anłajn-zaniatki, što značna źniziła čas kamunikacyi studentaŭ z vykładčykami, pryhažość pierastała adyhryvać svaju rolu. Padčas videalekcyj studentam prapanoŭvali ŭklučać kamieru, ale heta nie było abaviazkovym patrabavańniem.

Miechik miarkuje, što na «bonus za pryhažość» moh paŭpłyvać i mužčynski poł bolšaści vykładčykaŭ, ale žančyny-prafiesarki taksama stavili da pandemii lepšyja adznaki pryhažuniam.

Z pryvabnymi chłopcami ŭsio atrymałasia inakš: paśla taho, jak lekcyi pierajšli ŭ internet, ich adznaki jašče bolš pavysilisia. Miechik tłumačyć heta tym, što takija mužčyny mohuć vałodać niekatorymi jakaściami, što pavyšajuć praduktyŭnaść — naprykład, bolš vysokaj upeŭnienaściu ŭ sabie. Inšyja daśledavańni pakazvajuć, što fizična pryvabnyja mužčyny taksama bolš nastojlivyja i akazvajuć bolšy ŭpłyŭ na svaich adnahodkaŭ.

Miechik taksama razhledzieŭ pradmiety, dzie adznaki vystaŭlalisia ananimna i na padstavie vynikovych ekzamienaŭ. Tam jon nie znajšoŭ suviazi pamiž pryhažościu i paśpiachovaściu studentaŭ.

«Pradmiet dla asudžeńnia i kpinaŭ». Jak žyviecca ŭ pravincyi ludziam ź jarkaj źniešnaściu

«Nichto nie daje mnie bolš za 30 hadoŭ, ale na heta ja traču nie mienš za tysiaču rubloŭ na miesiac». Minčanka — pra płastyčnuju chirurhiju i reakcyju mužčyn

Byłaja televiadučaja ANT Lucyja Hieraščanka stała trenierkaj pa jozie dla tvaru

• 3
• 0
• 1
• 3
• 2
• 0
• 3
• 0