U svajoj pramovie "starasta Kreŭski" čamuści, jak i na rekłamnym płakacie mierapryjemstva, nie skazaŭ, zhadvajučy "svajho haspadara", što jon nie abstraktny "vialiki kniaź", a "vialiki kniaź litoŭski".

Ale heta, napeŭna, možna arhanizataram mierapryjemstva daravać u paraŭnańni z tym, jak jany haniebna łažanulisia z samim "starastaj". U Encykłapiedyi "Vialikaje Kniastva Litoŭskaje" paviedamlajecca: "Starasta - u VKŁ u 16-18 st. słužbovaja asoba, jakaja kiravała administracyjnaj akruhaj (pavietam), namieśnik vialikaha kniazia (karala)". A Alhierd byŭ Vialikim kniaziem u 1345-1377 hadach,  heta značycca starasty ŭ VKŁ źjavilisia na dva stahodździ paźniej  za vialikakniažańnie Alhierda.

Nu i viadučyja skazali, što Kreva - "miesca byłoj kryvickaj słavy". Jak bačna, jany nie viedajuć, što Kreva navat NIE ŭvachodzić u areał stałaha raśsialeńnia kryvičoŭ! Encykłapiedyja "Archieałohija i numizmatyka Biełarusi" paviedamlaje, što "U pieršyniu Kreva zhadvajecca ŭ niamieckich chronikach 13 st. jak stalica Nalščanskaj ziamli - rańniedziaržaŭnaha ŭtvareńnia bałckaha plemia nalšaŭ". A ździŭlenym žyviebiełorusskim patryjotam, jak takoje moža być, raju zazirnuć u knihu Mikoły Jermałoviča "Staražytnaja Biełaruś". U joj jany znoŭduć poŭny i cikavy adkaz na staronkach 28-36. U pryvatnaści:

"U pačatku 20-ch hadoŭ našaha stahodździa K.Buha i A.Śpicyn vykazali dumku ab zachodnim pachodžańni kryvičoŭ: pieršy - z Polščy, druhi - z Hiermanii... Ruch słavienaŭ i ruch kryvičoŭ dobra pakazvaje tapanimika. Najpierš źvierniem uvahu na najaŭnaść kryvickich taponimaŭ u pałabskich vioskach, što ŭpaminajucca ŭ hramatach kala 1160 i 1320 hh. A niekatoryja kryvickija nazvy isnavali jašče ŭ XIX st. Treba źviarnuć uvahu i na toje, što na polskich ziemlach taksama rassypana niamała kryvickich taponimaŭ... U cełym pryviedzienyja taponimy mohuć paćviardžać dumku ab prychodzie hetaha plemia praź Niomanska-Buhaŭskaje mižrečča... Vialikaja kancentracyja kryvickich taponimaŭ u Vierchnim Paniamońni daje peŭnuju padstavu mierkavać, što mienavita tut, na terytoryi sučasnych Biełarusi i Litvy, i było pieršaje stałaje prystanišča krevaŭ-kryvičoŭ". 

Heta značycca ŭsio plemia krevaŭ rušyła dalej na ŭschod-paŭnočny ŭschod, staŭšy tam "kryvičami", a adnosna nievialikaja hrupa zastałasia, asieła tut i z časam źmiašałasia ź miascovymi "bałtami" nalšami, ale zachavała imia svaich prodkaŭ u naźvie pasielišča, potym horada, Kreva.