Stała viadoma, dzie budzie prachodzić «Linija Vahniera». Heta prychavanaja prapanova kampramisu ad Pucina?
Zdajecca, Rasija nie raźličvaje na zachavańnie kantrolu nad paŭnočnaj Łuhanščynaj.
Pryvatnaja vajennaja kampanija «Vahniera» Jaŭhiena Pryhožyna pačała budaŭnictva abarončaj linii na terytoryi akupavanych Danieckaj i Łuhanskaj abłaściej Ukrainy. Dla jaje budaŭnictva vykarystoŭvajucca tranšejnyja mašyny. Uzdoŭž ziemlanych umacavańniaŭ vystaŭlajucca bietonnyja «zuby cmoka».
Da budaŭnictva abarončych zbudavańniaŭ u pryfrantavych zonach Pryhožyn zaklikaŭ jašče ŭ pačatku vieraśnia.
«Vahnieraŭcy» spadziajucca, što abarončaja linija pierakryje dla ŭkrainskaj armii padychody da Lisičanska i Łuhanska. Ale Sievieradanieck, Kramiannaja i vialikaja paŭnočnaja pałova Łuhanskaj vobłaści zastajucca za miežami linii.
Na videa «Mieduzy» možna pabačyć, jak vyhladaje linija.
Cikava, što sam Pryhožyn paćvierdziŭ, što «vahnieraŭcy» budujuć abarončuju liniju. Jon taksama zajaviŭ, što PVK «Vahniera» navučaje ludziej, «jakija buduć abaraniać miežy» Biełharodskaj vobłaści.
U kampanii Pryhožyna padkreślili, što ŭ Danieckaj i Łuhanskaj abłaściach znachodzicca «asnoŭnaja zona adkaznaści» «Vahniera».
«Na siońnia «linija Vahniera» aktyŭna budujecca na miežach Łuhanskaj i častkova Danieckaj abłaściej, a taksama ŭnutry ich. Ułasna kažučy, u asnoŭnaj zonie adkaznaści PVK «Vahnier»», — havorycca ŭ paviedamleńni kampanii.
«FAN», prapahandysckaje miedyja, źviazanaje z Pryhožynym, pakazała infahrafiku, dzie budzie prachodzić «Linija Vahniera». Akazvajecca, hetaja linija prachodzić uzdoŭž Łuhanskaj vobłaści i dzielić jaje na dźvie častki — paŭnočnuju (jakuju da 24 lutaha kantralavała Ukraina) i paŭdniovuju (zaniatuju prarasijskimi siłami z 2014 hoda).
Jana amal supadaje ź linijaj raźmiežavańnia 2014—2022 hadoŭ za vyniatkam rajona Lisičanska i Papasnaj, zaniatymi sioleta.
Vychodzić, rasijanie sami nie vierać, što zmohuć utrymać poŭnač Łuhanščyny?
Demanstratyŭnaja publikacyja hetaj infahrafiki pa časie supała z navinami pra evakuacyju žycharoŭ Chiersona akupacyjnymi ŭładami. Zdajecca, meta hetaj evakuacyi, kab pad prykryćciom mirnych žycharoŭ z vobłaści vyjšli rasijskija vojski.
Na dniach vyjšła «intervju» kamandujučaha rasijskim uvarvańniem va Ukrainu hienierała Siarhieja Suravikina. Metaj intervju było namiaknuć na nieminučaść adstupleńnia z-pad Chiersona, pryčym zrabić heta maksimalna publična.
U čym sutnaść hetych demanstratyŭnych paviedamleńniaŭ pra nieminučaść adstupleńnia z-pad Chiersona i infahrafika z «Linijaj Vahniera», jakaja prykryvaje tolki poŭdzień Łuhanščyny?
Całkam mahčyma, što heta vyhladaje jak abrysy zavualavanaj mirnaj prapanovy Ukrainie z boku Rasii. Rasijanie pakazvajuć hatoŭnaść syści z Chiersona i poŭnačy Łuhanskaj vobłaści, ale pakidajuć sabie Krym, poŭdzień Łuhanskaj, Danieckaj abłaściej i — heta pakul pytańnie — suchaputny kalidor u Krym.
Taki kampramis dazvoliŭ by i rasijanam, i ŭkraincam padać siabie pieramožcami, a niavyrašanaja terytaryjalnaja sprečka zakryła b na niejki čas Ukrainie darohu ŭ NATA. Rasijanie b zrabili terytaryjalny kanflikt častkaj zaciahnutaha pieramoŭnaha pracesu (uskosna na heta pakazvaje toje, što rasijanie dahetul nie mohuć dakładna sfarmulavać, u jakich miežach jany anieksavali ŭkrainskija terytoryi, i nie malujuć nijakich «čyrvonych linij» dla ŭkraincaŭ). U Ukrainy byŭ by čas na adnaŭleńnie svajoj cyvilnaj infrastruktury, a ŭ rasijan — mahčymaść adnavić svoj vajenny patencyjał i prynamsi častkova źniać sankcyi.
Vyzvaleńnie častki Łuhanskaj vobłaści mieła b dla ŭkraincaŭ važnaje maralnaje značeńnie. Rasijanie na siońnia kantralujuć tolki častki Danieckaj, Zaparožskaj, Chiersonskaj abłaściej (što ŭskładniaje anieksiju hetych rehijonaŭ i intehracyju ŭ rasijskaje pravavoje pole), ale amal całkam kantralujuć Łuhanskuju vobłaść.
Jaŭhien Pryhožyn — były kuchar Uładzimira Pucina, jakomu kiraŭnik Rasii daviaraje nastolki, što dazvoliŭ jamu stvaryć mahutnuju pryvatnuju vajennuju kampaniju. Pryvatnuju farmalna, a ŭ realnaści źviazanuju z rasijskaj vajskovaj raźviedkaj i Hienštabam.
Pa aficyjnaj viersii rasijskaja prapahandy, novaja linija fartyfikacyj «istotna abciažaryć ukrainskim bajevikam lubyja sproby prasoŭvańnia ŭ bok ŁNR». Maskoŭskija ŚMI ŭžo paraŭnoŭvajuć jaje ź linijami Mažyno i Manerhiejma.
Prapahadysty zajavili pra razhrom sietki salidarnaści i aryšt jaje ŭdzielnikaŭ4
Kamientary