U Biełarusi pačali źbirać źviestki ab tych, chto maje dazvoły na žycharstva i karty palaka?
U vieraśni ŭłady abjavili, što płanujuć abaviazać biełarusaŭ paviedamlać u orhany pra najaŭnaść dazvołaŭ na žycharstva i karty palaka. Ale ŭžo viadomy vypadki, kali ŭčastkovyja cikavilisia, ci jość u čałavieka zamiežnyja dakumienty.
Bolš za 160 tysiač hramadzian Biełarusi atrymali karty palaka
Na pačatku vieraśnia Łukašenka rezka vykazaŭsia ŭ adras uładalnikaŭ karty palaka. A ŭžo 21 vieraśnia byŭ apublikavany prajekt źmienaŭ u zakon ab hramadzianstvie. Biełarusaŭ, jakija atrymali hramadzianstva albo vid na žycharstva zamiežnaj dziaržavy, chočuć abaviazać infarmavać ab hetym orhany ŭnutranych spraŭ. Kali čałaviek znachodzicca za miažoj, to pra heta treba budzie paviedamić u zamiežnyja dypłamatyčnyja pradstaŭnictvy. Zhodna z prapanavanymi źmienami, hramadzianin musić zrabić heta nie paźniej za try miesiacy z momantu atrymańnia dakumienta.
Aproč zamiežnych pašpartoŭ i VNŽ, da dakumientaŭ, jakija dajuć prava na lhoty i inšyja pieravahi, ułady adnosiać i karty palaka. Pačynajučy z 2008 hoda taki dakumient atrymali bolš za 160 tysiač hramadzian Biełarusi.
Jak stała viadoma «Našaj Nivie», niahledziačy na toje, što źmieny ŭ zakon jašče nie pryniatyja, u Biełarusi ŭžo pačałasia praca nad zboram infarmacyi pra hramadzian, jakija majuć VNŽ i zamiežnyja pašparty.
Jak paviedamiła krynica «Našaj Nivy», užo byli vypadki, kali ŭčastkovyja cikavilisia ŭ ludziej, ci jość u ich zamiežny pašpart abo vid na žycharstva. Pryčym adbyvałasia heta jašče za paru dzion da publikacyi prajekta zakona na Nacyjanalnym pravavym partale. Niekatorym učastkovym davali zadańni źviazacca z žycharami, jakija pa ich infarmacyi vałodajuć padobnymi dakumientami.
Surazmoŭca, da jakoj u vieraśni prychodziŭ učastkovy, adznačaje, što ŭsio vyhladała tak, byccam milicyjant sam nie razumieŭ, navošta jon źbiraje hetyja danyja.
«Spytaŭ ci jość u mianie pašpart abo vid na žycharstva inšaj dziaržavy, paprasiŭ pakazać dakumient, pierapisaŭ niejkija patrebnyja jamu danyja, i ŭsio», — zhadvaje niečakany vizit učastkovaha žančyna.
Jana kaža, što, razumiejučy ŭ jakoj krainie my žyviom, nie stała prychoŭvać taho, što maje pastajanny vid na žycharstva ŭ adnoj z krain ES. Tym bolš, što ŭ jaje byli zdahadki, što kali da jaje pryjšli z takim pytańniem, to, napeŭna, i bieź jaje pryznańnia viedajuć pra najaŭnaść takoha dakumienta.
Adkul milicyja maje takuju infarmacyju?
Niahledziačy na toje, što raniej ad biełarusaŭ nie patrabavali paviedamlać pra najaŭnaść dakumientaŭ, vydadzienych inšymi dziaržavami, a sam zakon jašče nie nabyŭ moc, ułady ŭžo majuć peŭnuju častku źviestak pra takich hramadzian. Reč u tym, što ŭ časy panavańnia kavidnych abmiežavańniaŭ na vyjezd ź Biełarusi adnoj z padstaŭ, jakija dazvalali vyjechać za miežy krainy praz naziemnyja punkty propusku, była najaŭnaść VNŽ. Pačatkova z krainy vypuskali tolki ŭładalnikaŭ pastajannaha vida na žycharstva, ale praź niejki čas da ich dadali i tych, chto maje časovych VNŽ.
Vynikaje, što ludzi, jakija ŭ toj pieryjad vyjazdžali za miežy Biełarusi, paśpieli zaśviacić hetyja dakumienty, bo pamiežniki zanosili danyja ŭ bazu.
Ahułam dla vyjezdu za miežy Biełarusi nie patrabujecca mieć dziejnaj vizy abo inšaha dakumienta. Dla taho, kab pamiežniki vypuścili vas ź Biełarusi, dastatkova mieć dziejny pašpart, zvyčajna pamiežniki nie zadavalisia pytańniem, na jakich padstavach vy źbirajeciesia pierasiakać miažu ź ES. Naprykancy žniŭnia 2020 hoda stała viadoma pra šerah vypadkaŭ, kali biełarusy traplali ŭ Polšču nie majučy vizy.
Adnak, jak budzie adbyvacca propusk hramadzian bieź vizy ŭ pašparcie paśla pryniacca abnoŭlenaha zakona, nieviadoma. Nielha vyklučać, što ŭłady źmieniać padychod abo prynamsi na niehałosnym uzroŭni zahadajuć pamiežnikam patrabavać pakazać dakumient, jaki dazvalaje prajechać praz susiedniuju miažu. U krajnim vypadku jany mohuć abaviazać pamiežnikaŭ rabić paznaki, što čałaviek, jaki jedzie praź miažu, nie maje vizy, kab paśla pieradać hetuju infarmacyju ŭ MUS.
A što z kartami palaka?
Vyjavić uładalnikaŭ karty palaka składaniej, bo ŭ takich ludziej u pašparcie jość nacyjanalnaja polskaja viza.
Zmahańnie z kartaj palaka idzie nie pieršy hod. Tak, u siłavych strukturach isnavała niehałosnaja zabarona na jaje atrymańnie supracoŭnikami.
«Na zakanadaŭčym uzroŭni zabarony nie isnavała, usio było niehałosna. Tym, chto mieŭ kartu palaka, treba było paviedamić kiraŭnictvu, ale, nakolki ja viedaju, hetaha nichto nie rabiŭ. Kali niechta ź siłavikoŭ i mieŭ jaje, to prosta prychoŭvaŭ hety fakt, bo nijakaj mahčymaści pravieryć najaŭnaść karty nie było», — adznačyŭ kiraŭnik «Bajpoł» Alaksandr Azaraŭ.
Inšy były siłavik kaža, što mieć kartu palaka zabaraniałasia amal usim, chto nasiŭ pahony — milicyjantam, śledčym, vajennym, defeeraŭcam i navat topavym čynoŭnikam. Były aficer zhadvaje, što ŭ pačatku «nulavych» była raspaŭsiudžanaja praktyka, kali supracoŭniki padčas adpačynku jeździli ŭ Jeŭropu, a kab nie pisać raparty i nie palicca pierad kiraŭnictvam, pa viartańni nibyta «hublali» pašpart, kab było niemahčyma daviedacca, što ŭ ciabie była viza. Takija zachady vykarystoŭvalisia ŭ tyja časy, pakul u 2004 hodzie ŭ Biełarusi nie źjaviłasia baza «Pasažyrapatok».
Čytajcie taksama: Za 2000—4000 jeŭra znojduć rumynskich svajakoŭ i polskija karani. Jak firmy-pasiarednicy robiać biełarusam hramadzianstva ES?
Što viadoma pra biełarusa Viktara Paviełku, jakoha ŭ Polščy padazrajuć u arhanizacyi napadaŭ na rasijskich apazicyjanieraŭ2
Kamientary