Zatrymańnie śpiecyjalista, jaki jašče niadaŭna atrymaŭ «prezidenckuju stypiendyju» jak pierśpiektyŭny trenier, adbyłosia ŭ siaredzinie vieraśnia.
Na praŭładnych kanałach źjaviłasia videa z aryštavanym 41-hadovym trenieram pa volnaj baraćbie Kanstancinam Miermanišvili.
Kanstancin — adzin ź viadomych u Biełarusi trenieraŭ pa volnaj baraćbie, maje najvyšejšuju trenierskuju katehoryju. Mužčyna pracuje ŭ Minskim dziaržaŭnym haradskim vučyliščy alimpijskaha reziervu i Minskim haradskim centry alimpijskaha reziervu pa baraćbie imia Miadźviedzia.
U minułym hodzie jaho vychavanka Volha Hardziej zaniała treciaje miesca na čempijanacie Jeŭropy pa volnaj baraćbie siarod žančyn. Za heta Miermanišvili prysudzili stypiendyju h. zv. «Prezidenckaha spartyŭnaha kłuba», jakuju dajuć za vybitnyja dasiahnieńni ŭ sporcie dla «maładych i pierśpiektyŭnych» spartoŭcaŭ i trenieraŭ. Jaje pamier na 2022 hod składaje kala 7700 rubloŭ ciaham hoda.
U dopisach praŭładnych kanałaŭ vykładzienyja fota, dzie Kanstancin udzielničaje ŭ adnoj z demanstracyj za svabodnyja vybary i adnaŭleńnie zakonnaści ŭ 2020 hodzie. Tam ža śćviardžajecca, što «litaści da jaho nie budzie». Ci zaviedzienaja na mužčynu kryminalnaja sprava — pakul nieviadoma.
Masavyja represii iduć u Biełarusi z 2020 hoda. Usiaho za hety čas zaviedziena bolš za 11 tysiač palityčna matyvavanych kryminalnych spraŭ, ich fihurantami stali dziasiatki tysiač ludziej, jašče dziasiatki tysiač vymušanyja byli pakinuć krainu, ratujučysia ad represij.
Kamientary