Supracoŭnicy łukašenkaŭskaha ahienctva BiełTA dali try hady kałonii za padtrymku Zielcera

Spravu razhladada sudździa Viera Fiłonik. Inu Možčanka abvinavačvali pavodle dvuch artykułaŭ Kryminalnaha kodeksa — 369 (abraza pradstaŭnika ŭłady) i častka 1 artykuła 130 (raspalvańnie rasavaj, nacyjanalnaj, relihijnaj ci inšaj sacyjalnaj varožaści).

Pra Inu Možčanka viadoma, što jana ŭvachodzić u praŭładny Sajuz piśmieńnikaŭ Biełarusi i da zatrymańnia ŭ vieraśni 2021 hoda pracavała ŭ BiełTA, dzie zajmała pasadu načalnika siektara pracy z elektronnaj infarmacyjaj adździeła padtrymki i raźvićcia interniet-resursaŭ.

Razam z tym, Ina Možčanka aktyŭna viała sacyjalnyja sietki, dzie ŭ tym liku pakidała pratesnyja kamientaryi i iranizavała nad muzykami, jakija vystupajuć u savieckaj vajennaj formie.

Padstavaj dla zatrymańnia Iny Možčanka źjavilisia padziei 28 vieraśnia 2021 hoda, źviazanyja sa spravaj «Andreja Zielcera». Na hetuju historyju Možčanka adreahavała dopisami ŭ sacyjalnych sietkach i ŭžo 29 vieraśnia da jaje pryjšli siłaviki. Z taho času žančyna siadzić za kratami i tam sustreła svoj 45-y dzień naradžeńnia.

Ad ludziej, jakija trapili na sudovy praces u Breście, stała viadoma, što padčas pasiadžeńnia Ina Možčanka raspaviała, u jakich umovach znachodziłasia ŭ izalatary na Akreścina. Jana piać sutak praviała ŭ 2-miesnaj kamiery, dzie znachodziłasia 16 čałaviek. Paśla žančynu pavieźli ŭ Žodzina, dzie ŭ śledčym izalatary zładzili, pa słovach Iny, «vychavaŭčy karancin».

U pryvatnaści, paŭtara miesiaca ŭ 8-miascovaj kamiery znachodziłasia 14 čałaviek. Pieradačy nie dazvalalisia, z-za čaho davodziłasia vyprošvać u supracoŭnikaŭ tualetnuju papieru i prakładki.

Paśla «karancin» źniali i ŭmovy krychu palepšylisia, adnak da momantu suda ŭ žančyny ŭsio roŭna źjavilisia adčuvalnyja prablemy sa zdaroŭjem.

Dahetul niezrazumieła, čamu spravu Iny Možčanki razhladali mienavita ŭ Breście, kudy žančynu pryvieźli z žodzinskaha izalatara, a nie ŭ Minsku (dzie jana žyła i pracavała).

Pavodle abvinavačvańnia, jakoje ŭ sudzie pradstaŭlaŭ prakuror Alaksandr Baciuška, vynikała, što Ina Možčanka pakidała publičnyja kamientaryi ŭ pieryjad z 9 žniŭnia 2020 hoda pa 28 vieraśnia 2021 hoda pra zahinułaha supracoŭnika KDB Dźmitryja Fiedasiuka, pra jaho maci i ŭ cełym pra supracoŭnikaŭ KDB. U niekatorych kamientaryjach, pavodle dziaržaŭnaha abvinavaŭcy, byli prykmiety abrazy, a ŭ inšych uhledzieli prykmiety naŭmysnaha raspalvańnia varožaści ŭ dačynieńni da pravaachoŭnikaŭ.

Adnak, jak zaŭvažajuć pravaabaroncy, u sudova-linvistyčnaj ekśpiertyzie, dałučanaj da spravy, zhadvalisia tolki paviedamleńni Iny Možčanki, što byli napisanyja 29 vieraśnia 2021 hoda. Prakuroru daviałosia na stadyi sudovych sprečak karektavać abvinavačańnie: kančatkova žančynu abvinavacili tolki za «abraźlivyja i raspalvajučyja varožaść» paviedamleńni mienavita 29 vieraśnia 2021 hoda.

Jakija mienavita dopisy byli abraźlivyja — dakładna nie viadoma, bo na sudzie jany całkam nie ahučvalisia. Razam z tym, z praviedzienaj u ramkach spravy sudovaj ekśpiertyzy vynikaje, što aŭtarka dopisaŭ spryčyniłasia da «farmavańnia niehatyŭnaha stereatypu ŭ dačynieńni da supracoŭnikaŭ pravaachoŭnych orhanaŭ».

Ale prakuror Baciuška ŭ kančatkovym abvinavačańni traktavaŭ paviedamleńni kudy šyrej. Pavodle jaho słovaŭ, Ina Možčanka mieła na ŭvazie i ŭchvaleńnie ŭčynku Andreja Zielcera, i «padbuchtorvała da hvałtoŭnych dziejańniaŭ nad pravaachoŭnikami». Takim čynam, pa mierkavańni prakurora, jość skład złačynstva pa artykule ab raspalvańni varožaści.

U vyniku 7 vieraśnia 2022 hoda sudździa Viera Fiłonik ahučyła mienavita toje pakarańnie dla Iny Možčanki, pra jakoje prasiŭ prakuror Alaksandr Baciuška: try hady pazbaŭleńnia voli ŭ kałonii ahulnaha režymu i štraf pamieram 100 bazavych vieličyń (3200 rubloŭ).

• 4
• 0
• 2
• 6
• 5
• 6
• 30
• 0