Hienprakuratura naličyła 400 jašče žyvych «nacysckich złačyncaŭ»
Hienprakuratura Biełarusi dasłała šeśćdziasiat zapytaŭ u vasiamnaccać krain u suviazi sa spravaj ab «hienacydzie biełarusaŭ», piša TASS sa spasyłkaj na načalnika Hałoŭnaha ideałahičnaha ŭpraŭleńnia Minabarony Leanida Kasinskaha. I naličyła 400 jašče žyvych «nacysckich złačyncaŭ».
«Hienieralnaja prakuratura Respubliki Biełaruś na pačatku 2022 hoda, vałodajučy infarmacyjaj ab miescach znachodžańnia nie mienš jak 400 žyvych nacysckich złačyncaŭ, jakija karystajucca abaronaj zamiežnych dziaržaŭ, nakiravała 60 prośbaŭ ab akazańni pravavoj dapamohi pa spravie ab hienacydzie biełaruskaha naroda ŭ 18 krain», — zajaviŭ Kasinski, vystupajučy na «I Mižnarodnym antyfašysckim kanhresie» ŭ Maskvie. Pavodle jaho, zapyty nakiravanyja ŭ Kanadu, ZŠA, Vialikabrytaniju, Arhiencinu, Braziliju, Aŭstraliju, Litvu, Łatviju i inšyja krainy.
Pa słovach ideołaha, Litva i Łatvija adrazu admovili ŭ akazańni «pravavoj dapamohi» režymu Łukašenki, spasłaŭšysia na toje, što zadavalnieńnie prośbaŭ Minska «naniasie škodu biaśpiecy ich dziaržaŭ».
Uličvajučy toje, što z hoda zakančeńnia niamieckaj akupacyi Biełarusi, 1944-ha, sioleta spoŭniłasia 78 hadoŭ, samamu maładomu «nacysckamu złačyncu» musić być užo jak minimum pad sotniu hadoŭ. Uličvajučy, što da takoha ŭzrostu ŭ pryncypie dažyvajuć niamnohija, ličba ŭ 400 čałaviek vyhladaje nievierahodnaj. Navat kali dapuścić, što ŭ rasparadžeńni Hienieralnaj prakuratury sapraŭdy jość 400 proźviščaŭ ludziej, jakija ŭ časy Druhoj suśvietnaj vajny znachodzilisia ŭ składzie niamieckich i praniamieckich farmavańniaŭ na terytoryi Biełarusi i žyvuć dahetul, słaba vierycca, što ŭ dačynieńni da kožnaha ź ich prakuratura mahła sabrać pierakanaŭčyja dokazy piersanalnaj viny va ŭčynieńni złačynstvaŭ. Suśvietnaja praktyka pakazvaje, što hety praces praz stolki hadoŭ zvyčajna vielmi doŭhi i składany. Kali, viadoma, pravodzić jaho pa cyvilizavanych praviłach.
Kamientary