Prapahanda kryčyć pra «biełaruski ekspartny cud». Usio akazałasia tryvijalnym

Vadzim Hihin — pryznačany Alaksandram Łukašenkam kiraŭnik tavarystva «Viedy» tut fihuruje jak «palityčny analityk» — u efiry STV havoryć:

«Kali našy praciŭniki kažuć: oj, niečakana tak akazałasia, Biełaruś nastolki ŭstojlivaja pierad sankcyjami. Tak ustojlivaja jana nie vypadkova, nie tamu, što niejki cud zdaryŭsia, jak ja čuŭ ad ich analitykaŭ — «ekspartny cud». Cud prychodzić, kali ty na jaho pracuješ. U ekanomicy asabliva cudaŭ nie byvaje, heta ŭsio vynik napružanaj pracy. I mienavita heta i źjaŭlajecca stratehijaj Alaksandra Łukašenki», — kaža praŭładny palityčny kamientatar.

Padniali statystyku: abjomy biełaruskaha ekspartu ŭ adnosna paśpiachovym 2021 hodzie nie vyhladali jak niejki «cud» na fonie susiednich krain. 

U 2021 hodzie Biełaruś z nasielnictvam 9,4 młn čałaviek ekspartavała tavaraŭ na 39 miljardaŭ dalaraŭ. 

U tym ža 2021-m Litva, jakaja maje ŭ amal u try z pałovaj razu mienšaje nasielnictva (2,8 młn) ekspartavała tavaraŭ amal na anałahičnuju sumu — na 37 miljardaŭ dalaraŭ.

U Łatvii ŭ minułym hodzie ekspart tavaraŭ skłaŭ 19 miljardaŭ dalaraŭ. Heta ŭ 2 razy mienš, čym u Biełarusi. Ale nahadajem, što nasielnictva Łatvii mienšaje za 2 młn čałaviek. 

Polšča ŭ 2021 hodzie ekspartavała tavaraŭ na 331 młrd dalaraŭ. Heta bolš čym u 8 razoŭ bolš za pakazčyki Biełarusi (chacia nasielnictva Polščy bolšaje za biełaruskaje tolki ŭ 4 razy). 

Takim čynam, hetyja krainy ekspartujuć tavaraŭ na dušu nasielnictva ŭ razy bolš, čym Biełaruś, i nichto ź ich nie kryčyć pra «ekspartny cud». Zrešty, i finansavanych ź dziaržaŭnaha biudžetu tavarystvaŭ «Viedy» ŭ hetych krainach taksama niama.

Varta adznačyć, što struktura tavarnaha ekspartu pieraličanych krain našmat bolš raznastajnaja, čym biełaruskaha, jaki ŭ značnaj miery abapirajecca na tannyja rasijskija enierharesursy. Bolšuju častku biełaruskaha ekspartu składajuć kalijnyja ŭhnajeńni i naftapradukty, vyrablenyja z rasijskaj nafty. U vypadku Litvy, Łatvii i Polščy dola vysokatechnałahičnych tavaraŭ u eksparcie našmat bolšaja. 

Rost abjomu ekspartu ŭ 2021 hodzie — heta nie zusim zasłuha biełaruskich vytvorcaŭ. Jany nie stali raptam vypuskać niejkuju novuju pradukcyju. U pieršuju čarhu na ažyŭleńni zamiežnaekanamičnaj dziejnaści adbiłasia imklivaje adnaŭleńnie suśvietnaj ekanomiki paśla pandemii karony i rost cen na naftu i kalij na suśvietnym rynku. 

Ale heta byŭ 2021 hod. Represii, ataka mihrantami na Polšču i Litvu, a paśla i suŭdzieł ŭ ahresii suprać Ukrainy stali pryčynami ŭviadzieńnia sankcyj suprać Biełarusi. Efiekt ad sankcyj pačaŭsia ŭ 2022 hodzie.

Biełaruski ekspart tavaraŭ u pieršaj pałovie 2022 hoda źniziŭsia. Pieršy namieśnik premjera Snapkoŭ pryznaŭ, što pa vynikach hoda ekspart moža abvalicca na 30%. 

• 36
• 41
• 5
• 4
• 4
• 5