U Minabarony pažalilisia, što ź imi nichto nie choča supracoŭničać, akramia Rasii
Pamočnik ministra abarony Biełarusi pa pytańniach mižnarodnaha vajennaha supracoŭnictva, načalnik departamienta mižnarodnaha vajennaha supracoŭnictva Valeryj Ravienka raskazaŭ u intervju «VojenTV», što ŭ biełaruskich vajskoŭcaj ciapier čamuści vielmi pahoršylisia adnosiny z Ukrainaj, Polščaj, Łatvijaj i Litvoj.
Samym balučym pytańniem jon nazvaŭ pytańnie adnosin z Ukrainaj. Pa słovach Ravienki, paśla Majdana pačałosia imklivaje paharšeńnie adnosin i ŭ 2016 hodzie adbyŭsia złom. Ukraina pačała spyniać dyjałoh i pierastała zaprašać biełaruskich śpiecyjalistaŭ na mierapryjemstvy vajennaj aktyŭnaści na svajoj terytoryi.
«Da 2022 hoda lik byŭ 14:1. My 14 razoŭ zaprašali, a nas zaprasili adnojčy ŭ 2017 hodzie», — adznačyŭ Ravienka.
Na dumku Ravienki, na Ukrainu chtości ŭździejničaje zvonku, i heta pryviało da taho, što Biełaruś bolš nie razhladaje jaje jak partniora. I vinavataja ŭ hetym, viadoma, Ukraina: «U 2022 hodzie byŭ šerah vostrych momantaŭ. Heta i vučeńni pravodzilisia na ŭkrainskim baku, plus fakty padrychtoŭki bajevikoŭ, pierapraŭki zbroi, parušeńni pavietranaj prastory. Usio sabrałasia ŭ kłubok. Stvarajecca ŭražańnie, što niechta pastaviŭ zadaču zrabić sa spačatku družalubnaj da Ukrainy dziaržavy niejtralnuju, a ź niejtralnaj — tuju dziaržavu, jakaja pravodzić samastojnuju palityku i ŭžo nie razhladaje Ukrainu jak partniora. Jany nas da hetaha pryviali za ruku», — zajaviŭ Ravienka.
U hetaj situacyi jon ličyć naturalnaj padtrymku Rasii z boku Biełarusi, ale pry hetym padkreślivaje, što Biełaruś nie źjaŭlajecca ŭdzielnikam uzbrojenaha supraćstajańnia. «Našaha asabovaha składu, techniki, uzbrajeńnia tam niama», — zajaviŭ Ravienka. Biełaruski bok ličyć, što z Ukrainaj pryjdziecca vybudoŭvać adnosiny, ale ciapier Kijeŭ nie hatovy da hetaha. Choć by tamu, što pry sprobach vieści pieramoŭny praces ukrainski bok uzdymaje pytańnie lehitymnaści biełaruskaj ułady.
U adnosinach z Polščaj raniej nibyta taksama było parazumieńnie, ale paśla 2020-ha Polšča spyniła dyjałoh ź Biełaruśsiu ŭ mižnarodnym vajennym supracoŭnictvie. Bo «inšy bok Polščy, jon rychtavaŭ, nazaviom heta adkryta, pieravarot u Respublicy Biełaruś. 20-y hod heta ahaliŭ», — zajaviŭ Ravienka.
Prablemy taksama jość u adnosinach ź Litvoj i Łatvijaj. Tut, jak śćviardžaje Ravienka, va ŭsim vinavatyja supiarečnaści vakoł budaŭnictva Biełaruśsiu atamnaj stancyi na miažy ź Litvoj.
Chto pavinien być prezidentam Biełarusi ŭ pierachodny pieryjad? Razvažajuć viadomyja biełarusy18
Kamientary