Kab dakazać, što źvierstvaŭ u Bučy nie było, łukašenkaŭcy źviarnulisia da francuza

Jon dvojčy pryjazdžaŭ va Ukrainu z vałanciorskaj misijaj pa dastaŭcy humanitarnaj dapamohi, miedycynskaha abstalavańnia i lekavych preparataŭ.

Śćviardžajecca, što Bakie byŭ na zachadzie Ukrainy, na polska-ŭkrainskaj miažy i ŭ Bučy, dzie, nibyta, ubačyŭ katavańni i zabojstvy rasijskich vajennapałonnych. Taksama jon śćviardžaje, što staŭ śviedkam taho, jak ukrainskija vajskoŭcy viali padrychtoŭku da insceniroŭki masavych zabojstvaŭ mirnaha nasielnictva.

Bakie dadaŭ, što bačyŭ katavańni i zabojstvy rasijskich vajennapałonnych na poŭnačy Bučy ŭ adnym z anharaŭ ŭ pieršych dniach krasavika. Vałancior raskazaŭ, što časta razmaŭlaŭ z ukrainskimi vajskoŭcami, a taksama «azoŭcami». Jon ličyć ich staŭleńnie da ruskich, jaŭrejaŭ i pradstaŭnikoŭ inšych nacyjanalnaściaŭ biesčałaviečnym.

Bakie śćviardžaje, što ŭ pačatku krasavika jon bačyŭ pravakacyju, jakuju nibyta rychtavali ŭkraincy, kab abvinavacić Rasiju ŭ masavych zabojstvach mirnaha nasielnictva.

«Kali my zajechali ŭ Buču na aŭtamabili, ja znachodziŭsia na pasažyrskim siadzieńni. I kali my prajazdžali pa horadzie, ja bačyŭ na abočynach vulic trupy, i pry hetym u mianie na vačach z hruzavikoŭ dastavali cieły ludziej, jakija vykładvali pobač ź ciełami, jakija lažać na ziamli, kab nadać efiekt masavaści hibieli ludziej», — adznačyŭ jon.

Adnak nijakich danych, jakija paćviardžajuć jaho znachodžańnie ŭ Bučy, hety čałaviek nie pradstaviŭ.

Spačatku padčas efiraŭ Bakie zajaŭlaŭ, što ŭ jaho jość «sotni videa vajennych złačynstvaŭ ukrainskich vajskoŭcaŭ».

Ale jon nie pakazaŭ nivodnaha. Paźniej eks-vajskoviec śćviardžaŭ, što «azoŭcy» zabaraniali jamu rabić foty i videa. Ale ž čamu raniej jon kazaŭ inšaje? 

Pavialičyć

Isnuje tolki niekalki fotaŭ, zroblenych u Lvovie ŭ składzie humanitarnaj misii, u jakoj braŭ udzieł Bakie. Miascovyja paćviardžajuć, što Bakie pryjazdžaŭ dvojčy ŭ Lvoŭ, ale nikoli sistematyčna nie pracavaŭ ź miascovymi humanitarnymi arhanizacyjami. 

Pahavaryć z Adryjanam miascovym nie ŭdavałasia: jon nie razumieŭ ni ruskaj, ni ŭkrainskaj (chacia ŭ svaich intervju Adryjan Bakie śćviardžaje, što trochi razumieje ruskuju i ŭkrainskuju, dziakujučy čamu nibyta daviedaŭsia, pra što havaryli pamiž saboj «ukrainskija nacysty z połka «Azoŭ» u Bučy»).

Raskaz Bakie nie adpaviadaje i chranałohii padziej ŭ Bučy. Ź siaredziny pa kaniec krasavika 2022 hoda, kali jon moh naviedvać Ukrainu, u Bučy ŭžo nie adbyvałasia vajennych dziejańniaŭ, tam nie było ni paranienych, ni tym bolš nie było uziatych u pałon rasijskich vajskoŭcaŭ. Buča była akupavanaja rasijskimi vojskami z kanca lutaha da 1 krasavika. Užo 1 krasavika ŭviečary było apublikavanaje pieršaje videa ź miortvymi ciełami na vulicach horada. Heta značyć, Bakie nijakim čynam nie moh znachodzicca ŭ Bučy i bačyć «nieanacystaŭ, jakija ździajśniali vajennyja złačynstvy».

Bakie nikoli nie nazyvaje dakładnych dat svaich vizitaŭ va Ukrainu. Ale

jak daviedalisia francuzskija žurnalisty, Adryjan Bakie na praciahu krasavika ažyćciaŭlaŭ tolki karotkaterminovyja vizity na terytoryju Ukrainy. Upieršyniu jon zajechaŭ va Ukrainu praz punkt propusku Šehini 4 krasavika i vyjechaŭ u toj ža dzień. Jaho druhi vizit adbyŭsia z 5 pa 6 krasavika. Paźniej jon viarnuŭsia va Ukrainu tolki 17 krasavika, zajechaŭšy praz punkt propusku Krakaviec, i pakinuŭ terytoryju krainy 19 krasavika — heta samy praciahły vizit Bakie, jaki taksama zaniaŭ nie bolš za 72 hadziny. Apošniaje prachodžańnie Bakie polska-ŭkrainskaj miažy adbyvałasia pamiž 19 i 20 krasavika. Hetyja danyja abviarhajuć mahčymaść pajezdki ŭ Bučy, jakaja znachodzicca, jak minimum, za 7 hadzin jazdy ad Lvova (z ulikam błokpastoŭ realnaja daroha ŭ krasaviku zaniała b našmat-našmat bolš). Na znajomstva i znosiny z bajcami «Azova» ŭ Bučy ŭ Bakie prosta nie było b času, navat kali jon by niejkim čynam tudy paśpieŭ. 

Adryjan Bakie svaim vydumanym raskazam naviazvaje hramadskaj dumcy Zachadu arhumienty, jakija Rasija vykarystoŭvaje dla apraŭdańnia ahresii suprać Ukrainy. A łukašenkaŭskija ŚMI čarhovy raz biazdumna retranślujuć hetuju chłuśniu.

• 18
• 0
• 8
• 129
• 7
• 15
• 97
• 0