Hramadstva1111

Čynoŭniki vypravili handlovy centr «Stalica» — jak «padziemka» pieratvaryłasia ŭ zapaviednik biełaruskaha

«My vypravili, zrabili «Stalicu» lepšaj», — adrapartavała ŭ dziaržaŭnych ŚMI namieśnica staršyni Minharvykankama Nadzieja Łazarevič napiaredadni vizitu tudy Alaksandra Łukašenki. «Stalicu» kančatkova pierafarmatavali ŭ šoŭrum ajčynnych brendaŭ ź ćviordaj upeŭnienaściu, što heta viernie handlovamu centru byłuju słavu. My pahladzieli, što prapanoŭvajuć tam pakupnikam paśla «rebrendynhu».

Na ŭvachodzie ŭ «Stalicu». Fota: fejsbuk handlovaha centra

Dla svajho času «Stalica» stała praryvam

Paśla niekalkich hod składanych padziemnych prac pad kiraŭnictvam hienpadradnika «Minskpramstroj» «Stalica» kančatkova adčyniła svaje dźviery ŭ 2007 hodzie. Dla svajho času heta byŭ praryŭ — pieršy vialiki handlovy centr epochi niezaležnaści, jašče i padziemny, tamu i trafik tam byŭ šalonym. «Stalica» była ŭlubionym miescam dla šopinhu jak u miascovych žycharoŭ, tak i turystaŭ, tam pryznačali spatkańni i biznes-sustrečy, arhanizoŭvali sumiesnyja pachody ŭ kino. Na pieršym paviersie kampanijami zaŭsiody źbirałasia moładź i studenty blizkich VNU.

Budaŭnictva HC «Stalica», 2005 hod. Fota: Minsk Live

Mienavita tam mnohija paznajomilisia z modnymi brendami Quick Style, Mango, Mexx, Jack&Jones i źviedali, što takoje tanny simpatyčny mas-markiet u kramach Calliope i Terranova.

Darečy, pierad tym jak u «Stalicy» ŭ 2009 hodzie adkryŭsia pieršy mahazin Mango, jaho pradstaŭnikam pakazvali handlovyja płoščy pad ziamloj i jany ispancam vielmi nie spadabalisia: «Niama ni kancepcyi, ni płyni pakupnikoŭ, ni vitryn patrebnaha farmatu». Ale vybaru tady ŭsio roŭna nie było — mienavita hetym možna patłumačyć, čamu i inšyja suśvietnyja brendy na toj momant «asiadali» ŭ «Stalicy».

Praŭda, załatyja hady ciahnulisia niadoŭha — roŭna da taho momantu, pakul u Minsku nie pačali źjaŭlacca novyja, bolš prasunutyja handlovyja centry, jakim možna było supraćpastavić tolki znachodžańnie ŭ samym centry kala mietro. Tym bolš, u «Stalicy» spačatku zakryŭsia kinateatr, a paŭnavartasnaha fudkorta tak i nie źjaviłasia. Naviedvalnaść pačała imkliva padać, i pastupova adtul sychodzili asnoŭnyja brendy-mahnity: Mexx, Vero Moda, Jack & Jones, Mango, Sister's, Savage, Tally Weijl, DeFacto, Terranova, Women's Secret.

Fota: bonusales.com

I choć u 2018 hodzie śpiecyjalisty hałoŭnaha kiravańnia spažyvieckaha rynku Minharvykankama zajaŭlali, što biznes-zapaŭnialnaść dla HC «Stalica» skłała 91 %, toje, što jany ŭ chutkaści pajšli na źnižeńnie stavak arendy ŭ siarednim na 30%, nie kazała na karyść hetamu faktu.

Karanavirus ža ŭ 2020-m dadatkova ŭdaryŭ pa šopinhu ŭ «padziemcy» — u 2021-m tam pustavała 4432 arendnyja kvadratnyja mietry. A trafik naviednikaŭ źniziŭsia amal na 70%.

«Syšli ad nas — sychodźcie! My budziem pradavać svajo»

Tady ž, hod tamu, u «Stalicu» byŭ praznačany novy kiraŭnik — Iryna Dmuchoŭskaja, jakaja adrazu padzialiłasia hrandyjoznymi płanami, kab udychnuć u HC novaje žyćcio (da «Stalicy» Dmuchoŭskaja kiravała «Minatelem», u strukturu jakoha siarod inšaha ŭvachodziać čatyry haścinicy Minharvykankama):

«Abnavić dyzajn: skažam, ustalavać panaramnyja akvaryumy ci zrabić panaramnuju padłohu sa škła, pad jakim budzie kałasicca załatoje biełaruskaje žyta».

Nu, i adna z hałoŭnych met novaj kiraŭnicy była — prasoŭvać biełaruskaje.

Skrynšot: videa «Puła pieršaha»

Z apošnim akurat skłałasia — «Stalica» zapoŭniłasia amal vyklučna ajčynnymi brendami. Ciapier tam pracuje 116 abjektaŭ. Kala 70% płoščy zaniata niecharčovymi kramami. Siarod ich — «Kamvol», Aršanski lnokambinat, «Elema», «Alesia», «Nioman», Mark Formelle. Charčovaja ž pramysłovaść pradstaŭlena «Kamunarkaj», «Spartakom», «Słodyčam», «Čyrvonym charčavikom», «Čyrvonym mazyraninam» i inšymi vytvorcami. Tut adkryli taksama kramu ź mierčam Łukašenki.

Skrynšot: videa «Puła pieršaha»

Z byłych zamiežnych brendaŭ, što zachavali svaje pazicyi, naprykład, turecki Colin's i rasijski «Tvajo». U astatnim siońniašniaja «Stalica» mała adroźnivajecca ad «humaŭ-cumaŭ».

«Narešcie zrabili biełaruski HC — heta ŭžo dobra. Syšli ad nas — sychodźcie! My budziem pradavać svajo», — uchvaliŭ Łukašenka, daŭšy paralelna paradu staršyni «Biellehprama» Taćcianie Łuhinoj nakont taho, jak pravilna treba zamiaščać impartnaje: «Ubačyła niešta impartnaje — pryniesła na pradpryjemstva — rabicie. Voś tak pakrysie pavinny rabić svajo».

Łukašenka naviedvaje «Stalicu». Siarod navinak u handlovym centry — punkt prodažu rasady i sadžancaŭ ad Minskaha ciapličnaha kambinata. Fota: «Puł pieršaha».

Što tyčycca zabaŭ, to ŭ «Stalicy» pracujuć «Tyktok-park» i «Nieon-park». Pobač sa znajomymi ŭsim kafe «Maestra» i KFC z Hotfix adkryłasia siamiejnaje kafe ad kambinata školnaha charčavańnia i svaje kropki «Minskchlebprama». Vyhladajuć jany nastupnym čynam:

U «Stalicy» ciapier pradajuć sałatu ź zialonaj cybuli pa recepcie Łukašenki
Vyvieska kala kropki «Minskchlebprama»

Kab pryciahvać moładź, «Stalicu» płanujuć addavać pad vystupy i tvorčaść studentaŭ Univiersiteta kultury i Akademii mastactvaŭ.

Praŭda, na dumku kiraŭnikoŭ, u HC usio dobra i tak: padčas vizitu Łukašenki jamu dakłali pra «98,5% zahruzki» i 12 tysiač naviednikaŭ u dzień. Natchniŭšysia spravazdačaj sa «Stalicy», Łukašenka daručyŭ zrabić taki ž biełaruskaaryjentavany abjekt-dvajnik i na miescy daŭhabuda «Mahnit Minska», što znachodzicca na skryžavańni praśpiekta Niezaležnaści i vulicy Kalinoŭskaha. Nasuprać doŭhabuda — HC «Dana Moł».

Čytajcie taksama:

Z 2023 hoda IP pazbaŭlajuć ilhot pa vypłatach u FSAN. Kaho zakranuć źmieny i što jašče źmienicca dla pradprymalnikaŭ?

Pačvarny budynak na miescy muzieja VAV na Kastryčnickaj płoščy ŭžo raspradajuć. Pryčym Dana Holdings vyzvalili ad PDV

Kamientary11

  • maleńkaja architektarka ciemry
    23.07.2022
    "Dla svajho času «Stalica» stała praryvam"
    dy nu?) heta była ŭsiaho tolki čarhovaja kalka z Maskvy. na pradmiet "čto rabić z hetaj płoščaj?" pravodziŭsia konkurs. byli roznyja prajekty. ja na karotki čas apynułasia tady ŭ majsterni, jakoj dastałasia prava raspracoŭki prajekta. tam pravodziŭsia mini-konkurs svoj. znoŭ byli roznyja idei. ale "pieramahała" heta "mahiła". urezalisia ŭ pamiać słovy architektarki (stałaj žančyny), jakaja spračałasia, baroniačy svoj varyjat: "da nikto v vašu jamu nie pojdiet!"
    voś prajšli hady... i jana akazałasia prava
  • "poślednije novosti Biełarusi i mira"
    23.07.2022
    šostaje fota... "na pamiať o Biełarusi" (kiosk s ćvietami)
    zvučit kak-to złovieŝie... v riealijach novoho vriemieni
  • maleńkaja architektarka ciemry
    23.07.2022
    hetu płošču pazbavili jaje funkcyi - administratyŭnaj. bo pieršyja mitynhi źbiralisia tam

Jakimi buduć vybary 2025 hoda? Razvažajuć Viačorka, Łatuška i Šrajbman

Jakimi buduć vybary 2025 hoda? Razvažajuć Viačorka, Łatuška i Šrajbman

Usie naviny →
Usie naviny

Viadučaja ANT Iryna Rambalskaja pakazała svaje harsety na tydni mody ŭ Paryžy9

U mašynie chłopca, što stralaŭ u Trampa, znajšli vybuchoŭku7

Apakalipsis u Mazyry. Štorm nakryŭ Homielščynu8

U Hiermanii biełarus pabiŭsia z małdavaninam. Apošni byŭ parezany

U Indyi ženicca syn samaha bahataha čałavieka krainy. Na viasielle patracili šalonyja hrošy11

Łukašenka achviaravaŭ ministram: jak i za što pazbaŭlalisia ad samych važnych čynoŭnikaŭ jaho sistemy

Marharyta Laŭčuk vypuściła pieśniu, jakuju zapisała razam z mužam5

Eduardu Babaryku prysudzili dadatkova bolš, čym paŭtara hoda1

Kolki biełarusaŭ chočuć mieć dziaciej, a kolki ŭchvalajuć razvody7

bolš čytanych navin
bolš łajkanych navin

Jakimi buduć vybary 2025 hoda? Razvažajuć Viačorka, Łatuška i Šrajbman

Jakimi buduć vybary 2025 hoda? Razvažajuć Viačorka, Łatuška i Šrajbman

Hałoŭnaje
Usie naviny →