«U Vialikuju Ajčynnuju vajnu nichto nie pytaŭsia pra zarpłatu». U Rasii dyrektar zavoda ŭciamna patłumačyŭ niavypłatu zarobkaŭ
Uralski kampresarny zavod z-za vajny nie vypłaciŭ zarobki rabočym. Tyja, piša ahienctva JEAN, nie atrymali častku zarpłaty za krasavik i maj. Hienieralny dyrektar zavoda Dzianis Tasakoŭ zajaviŭ, što prablemy ŭźnikli z-za sankcyj, jakija ŭviali suprać Rasii z-za ŭvarvańnie va Ukrainu.
«Mnohija pradpryjemstvy, ź jakimi my supracoŭničajem, trapili pad sankcyi, u ich zaviśli hrošy ŭ sankcyjnych bankach na śpiecrachunkach. U niekatorych byli ekspartnyja kantrakty, za jakija jany nie mohuć atrymać hrošy, plus kurs valut praktyčna da straty ŭsich pryvodzić. Adpaviedna, hetyja pradpryjemstvy nie raźličvajucca z nami. My — maleńkija i apynulisia apošnimi ŭ hetym łancužku», — skazaŭ jon.
Pa słovach Tasakova, da vyrašeńnia prablemy padklučyŭsia hubiernatar Śviardłoŭskaj vobłaści Jaŭhien Kujvašaŭ, deputaty i fiederalnyja ŭłady. Siońnia rabočyja, jakija ŭdzielničali ŭ strajku, pavinny atrymać častku hrošaj za krasavik. A tych, chto nie ŭdzielničaŭ u strajku, raźličać całkam.
Dyrektar zavoda ličyć, što ludzi pavinny ŭvajści ŭ situacyju i «adumacca».
«Ja chacieŭ by, kab ludzi adumalisia. Ja ni ŭ kaho nie chaču prasić prabačeńnia, tamu što ŭsie pavinny razumieć situacyju. U Vialikuju Ajčynnuju vajnu nichto nie pytaŭsia pra zarobak, a ŭ nas dziaržabaronzakaz, i jon ciapier pad pahrozaj zryvu. Ludzi hinuć, i heta, mnie zdajecca, važniej. A ciapier usie takija razumnyja stali, zabastoŭki ŭ nas!
Choć nie vychodzić na pracu 50 čałaviek, a kalektyŭ — 370», — skazaŭ jon.
Kamientary