Makron anansavaŭ sankcyi suprać 80 rasiejskich aliharchaŭ. U śpisach mohuć taksama apynucca Kabajeva i patryjarch Kirył

Šosty pakiet, jaki ŭklučaje embarha na rasijskuju naftu i adklučeńnie ad SWIFT Śbierbanka, «nadzvyčaj važny», zajaviŭ Makron, kamientujučy vyniki dvuchdzionnaha samita lidaraŭ JEZ. «Jon dazvalaje ŭvieści sankcyi suprać 80 aliharchaŭ», a taksama zabaranić viaščańnie troch dziaržaŭnych telekanałaŭ, tamu ŭjaŭlaje saboj novy etap stratehii jeŭrapiejskich krain u dačynieńni da Rasii, padkreśliŭ prezident Francyi.

Uzhodnieny ŭ noč na aŭtorak paśla amal miesiaca zakulisnych pieramovaŭ sankcyjny pakiet budzie kančatkova aformleny ŭ sieradu abo čaćvier, zajaviŭ kiraŭnik Jeŭrarady Šarl Mišel.

«Jurydyčnaja pracedura pačniecca zaŭtra», — skazaŭ jon, dadaŭšy, što ŭsie farmalnaści moža spatrebicca dzień ci dva.

Krynicy Bloomberg, znajomyja z tekstam dakumienta, jaki ŭzhadnili lidery ES, śćviardžajuć, što ŭ pieralik piersanalnych sankcyj ŭklučanaja Alina Kabajeva, jakuju na Zachadzie ličać kachankaj prezidenta RF Uładzimira Pucina i maci niekalkich jaho dziaciej.

Razam ź dziasiatkami rasijskich vajskoŭcaŭ, jakim staviać u vinu złačynstvy suprać mirnych žycharoŭ Ukrainy, u «čornyja śpisy» trapiŭ i patryjarch Kirył, jaki padtrymaŭ uvarvańnie, kažuć krynicy Bloomberg. Usim im pahražaje zabarona na ŭjezd u Jeŭrasajuz i zamarozka aktyvaŭ u jeŭrapiejskich krainach.

Pa dadzienych na kaniec krasavika, u JEZ užo była zabłakavanaja źviazanaja z Rasijaj ułasnaść na 35 młrd jeŭra, u tym liku 23,5 młrd jeŭra ŭ Francyi, 10 młrd — u Bielhii, 4, 2 młrd — u Danii, 1,1 młrd — u Italii, 0,9 młrd — u Irłandyi.

Pradmiety mastactva, raskošnyja viły i jachty — usio heta apynułasia pad kantrolem jeŭrapiejskich uładaŭ, jakim treba budzie vyrašyć, jak vykarystoŭvać bahaćci, jakija trymalisia rasijskimi elitami na Błakitnym bierazie ci pablizu italjanskich azior.

Ciapier Jeŭrakamisija rychtuje papraŭki ŭ zakanadaŭstva, jakija daduć krainam-siabroŭkam bolš paŭnamoctvaŭ dla aryštu aktyvaŭ, atrymanych złačynnym šlacham. Zhodna z płanam, krainy ES pavinny stvaryć ofisy pa viartańni aktyvaŭ, a taksama centralizavany rejestr ź infarmacyjaj ab aryštavanaj, kiravanaj i kanfiskavanaj majomaści.

Čytajcie taksama:

Jeŭrasajuz uzhadniŭ šosty pakiet sankcyj suprać Rasii

• 10
• 0
• 0
• 0
• 0
• 0
• 1
• 0