Vyniesieny čarhovy prysud za kamientar u bok milicyjanta, što karcinna ŭpaŭ padčas pikieta Cichanoŭskaha
U sudzie Baranavič i Baranavickaha rajona vyniesieny prysud vychavacielnicy dziciačaha sadka Śviatłanie Ancipkinaj. Sudździa Julijana Ščerba pryznała žančynu vinavataj pavodle art. 369 KK i ahučyła prysud: 1,5 hoda «chatniaj chimii», piša «Viasna». Abvinavačvałasia jana za niehatyŭny kamientar u bok milicyjanta, što apynuŭsia na ziamli padčas pieradvybarčaha pikieta ŭ Hrodnie 29 maja 2020 hoda, na jakim byŭ zatrymany Siarhiej Cichanoŭski.

Pavodle viersii abvinavačańnia, žančyna ŭ «Adnakłaśnikach» pakinuła «źniavažlivy kamientar, jaki ŭtrymlivaŭ nienarmatyŭnuju formu rečavaha vykazvańnia» pad dopisam z fotazdymkam staršaha lejtenanta milicyi Leninskaha RAUS horada Hrodna Uładzimira Kazłoŭskaha, jakoha pryznali paciarpiełym pa spravie. Svaje maralnyja pakuty ad hetaha kamientara milicyjant acaniŭ u 1500 rubloŭ.
Heta nie pieršy sud paśla padziej 29 maja 2020 hoda z udziełam Kazłoŭskaha. Jon byŭ pryznany paciarpiełym na sudovych pracesach pa spravach Dźmitryja Furmanava, Jaŭhiena Raźničenki, Uładzimira Knihi, Rusłana Litvina, Andreja Vasileŭskaha, Alaksandra Antaškieviča. Ahułam jany vypłacili milicyjantu ŭžo 5500 rubloŭ maralnaj kampiensacyi.
Kamientary