Śmiarotnaje pakarańnie pahražaje pinčuku, jakoha abvinavacili ŭ padrychtoŭcy teraktaŭ
Siońnia ŭ Minskim abłasnym sudzie pačali sudzić 36-hadovaha ŭradženca Pinščyny Viačasłava Malejčuka pa «fakcie arhanizacyi 25 sakavika 2021 aktaŭ teraryzmu ŭ haradach Barysavie i Minsku». Jaho abvinavačvajuć pa šerahu artykułaŭ Kryminalnaha kodeksa: art. 14 i č. 1 i 3 art. 289 (zamach na akt teraryzmu hrupaj asobaŭ), č. 3 i č. 4 art. 295 (niezakonnyja dziejańni ŭ dačynieńni da vybuchovych rečyvaŭ), č. 1 art. 295-3 (niezakonnyja dziejańni ŭ dačynieńni da pradmietaŭ, dziejańnie jakich zasnavanaje na vykarystańni haručych rečyvaŭ). Spravu razhladaje sudździa Uładzimir Areška. Sud prachodzić u zakrytym režymie, piša «Viasna».
Nahadajem, 26 sakavika 2021 hoda MUS zajaviła, što praduchiliła terakty ŭ Čyžoŭcy i ŭ vajskovaj čaści ŭ Piečach. Na videa pakazali Malejčuka, jaki kazaŭ, što atrymaŭ zahad ad kahości z BYPOL. Sa słovaŭ Viačasłava na videa vynikaje, što ŭ jaho byŭ saŭdzielnik Jaŭhien, ale siońnia sudziać adnaho Malejčuka.
Adrazu ž paśla zatrymańnia Malajčuk raskazvaje na kamieru pra toje, što metaj «terakta» było «vyražeńnie hramadzianskaj pazicyi». Blizkija mužčyny źviarnuli ŭvahu «Jeŭraradyjo» na niecharakternyja dla jaho suchija pratakolnyja słovy i vyrazy: «proiźviesti vzryv», «izdielije», «transportnoje sriedstvo», «ostanovočnyj punkt». A kali apieratyŭnik pytaje jaho pra metu, Malajčuk niaŭpeŭniena adkazvaje: «Nu, napeŭna, destabilizacyi…» Na śledčym ekśpierymiencie Malejčuku znoŭ zadajuć pytańni, i jon znoŭ časta adkazvaje kazionnymi farmuloŭkami.
Viadoma, što kryminalnuju spravu suprać Malejčuka rasśledavała śledčaje ŭpraŭleńnie KDB. Spravu raspačała Hienieralnaja prakuratura. Fihurantami hetaj spravy źjaŭlajecca nie tolki Malejčuk, a i ŭdzielniki inicyjatyvy BYPOL.
«Ustanoŭlena, što da supraćpraŭnaj dziejnaści nazvanaj niezarehistravanaj arhanizacyi datyčnyja Śviatłana Cichanoŭskaja, Pavieł Łatuška, a taksama 15 hramadzian Biełarusi, jakija znachodziacca za miažoj.
U jakaści abvinavačanych pa kryminalnaj spravie pa č. 4 art. 16 i č. 3 art. 289 KK Biełarusi (akt teraryzmu, učynieny arhanizavanaj hrupaj) pryciahnutyja 18 asobaŭ. Fihuranty abvieščanyja ŭ mižnarodny vyšuk», — zajaŭlaŭ KDB 2 krasavika minułaha hoda.
Paśla zatrymańnia KDB unios Viačasłava i astatnich fihurantaŭ hetaj spravy ŭ śpis asobaŭ, jakija majuć dačynieńnie da terarystyčnaj dziejnaści.
Čym skončyłasia śledstva i jak prachodzić sud, nieviadoma, bo jaho adrazu zrabili zakrytym.
Byłyja siłaviki z BYPOL miarkujuć, što pinčuk staŭ achviaraj pravakacyi. Jaje metaj było kinuć cień na Cichanoŭskuju i inšych praciŭnikaŭ Alaksandra Łukašenki, jakija da hetaj historyi niedatyčnyja.
Chto padpadzie pad «rasstrelny» artykuł paśla źmienaŭ u Kryminalnym kodeksie?
«Zašmat u vas dziaciej». Jak žyvie siamja ź siamiu dziećmi, jakoj daviałosia vyjechać ź Biełarusi6
Kamientary