Maskva prapanavała Kijevu, kab Biełaruś była ŭ śpisie krain — harantaŭ biaśpieki Ukrainy 

«Rasija prapanavała, kab Biełaruś była adnoj z krain-harantaŭ budučyni rasijska-ŭkrainskaj damovy, ciapier usie pytańni, u tym liku skład krain-harantaŭ, uzhadniajecca», — zajaviŭ kiraŭnik MZS RF Siarhiej Łaŭroŭ. 

«Nie chaču ŭdavacca ŭ detali pieramoŭnaha pracesu i źmiestu. Chaču tolki skazać, što pa prośbie ŭkrainskaha boku niejtralny, pazabłokavy, biaźjadzierny status pavinien supravadžacca harantyjami biaśpieki Ukrainy. Siarod harantaŭ biaśpieki ŭkrainskija susiedzi chacieli b bačyć usie prylehłyja da Ukrainy krainy i jašče ceły šerah dziaržaŭ, uklučajučy pastajannych členaŭ Rady Biaśpieki AAN», — skazaŭ Łaŭroŭ pa vynikach pieramovaŭ z kiraŭnikom MZS Armienii.

«My prapanavali, kab u liku takich krain-harantaŭ abaviazkova była b Respublika Biełaruś. I ciapier usie hetyja pytańni, uklučajučy poŭnaje koła krain — harantaŭ, uzhadniajucca. My vystupajem za toje, kab Biełaruś była siarod ich», — cytuje Łaŭrova RIA «Novosti».

Pra toje, što Biełaruś moža paŭdzielničać u pieramoŭnym pracesie, zajaviŭ učora na pasiadžeńni Rady biaśpieki Alaksandr Łukašenka.

«Nie moža być pieramovaŭ biez udziełu Biełarusi, kali vy ŭviazali nas u heta, pieradusim zachodnija krainy, tam na hetych pieramovach, naturalna, pavinna prahučać pazicyja Biełarusi. (…) Tamu nijakich sieparatnych, za śpinaj Biełarusi, damoŭlenaściaŭ być nie moža, i ja absalutna pierakanany i viedaju, što Rasija takuju pazicyju razumieje. I ŭ hetym ničoha kiepskaha niama, ale heta budzie supiarečyć zadumie Zachada, i heta nie značyć, što my pavinny tancavać pad dudku Zachada», — kazaŭ učora Łukašenka.

Razam z tym Uładzimir Makiej zajaviŭ, što harantyi biaśpieki pavinny być dadzienyja i Biełarusi.

Pierad napadam na Ukrainu Alaksandr Łukašenka ŭ intervju rasijskamu prapahandysckamu TB zajaŭlaŭ, što vajna va Ukrainie praciahniecca 3—4 dni. Padčas vajny jon niekalki razoŭ zaklikaŭ kiraŭnictva Ukrainy kapitulavać, pahražajučy, što inakš toje samaje pryjdziecca zrabić paźniej na horšych umovach.

U vystupie na Radzie biaśpieki 7 krasavika Alaksandr Łukašenka źmianiŭ ton i ŭžo zychodziŭ z taho, što likvidavać i rasčlanić Ukrainu Rasii nie ŭdasca.

• 1
• 0
• 21
• 8
• 0
• 0
• 3
• 0