«Mnie prapanoŭvali źjechać za dzień da pačatku vajny». Dzie ciapier Jarasłaŭ Ramančuk?

Ad samaha pačatku była viera ŭ pieramohu

Jarasłaŭ kaža, što jašče za tydzień da pačatku vajny atrymlivaŭ prapanovy ad jeŭrapiejskich i amierykanskich kaleh pierajechać u biaśpiečnyja krainy. Pa jaho słovach, jaho papiaredžvali, što ŭ vypadku nastupleńnia rasijskaj armii i zachopu Kijeva jon, jak praciŭnik pucinskaha i łukašenkaŭskaha režymaŭ, moža być paprostu źniščany.

«Apošni raz mnie prapanoŭvali źjechać z Ukrainy za dzień da pačatku vajny. Navat niahledziačy na najaŭnaść u mianie ciažkaści z naviedvańniem ES, bok, jaki zaprašaŭ mianie, byŭ hatovy vyrašyć hetyja pytańni, ale ja pryniaŭ rašeńnie zastacca ŭ Kijevie».

Jarasłaŭ Ramančuk nie staŭ pakidać Kijeŭ i paśla pačatku aktyŭnych bajavych dziejańniaŭ.

«Pa šerahu pryčyn ja nie chacieŭ adsiul źjazdžać. Mnie chaciełasia maralna i psichałahična padtrymać maich kaleh i siabroŭ, jakija zastavalisia tut. Mnie było važna zastavacca na miescy, kab u mianie była mahčymaść prymianić svaje viedy i vopyt. Akramia taho, ucioki z Kijeva — heta pieramiaščeńnie niezrazumieła kudy, a ŭ mianie ŭsio jašče śviežyja ŭspaminy pra maje ucioki ź Biełarusi. 

Pieražyvać usio heta znoŭ zusim nie chaciełasia, tamu, uzvažyŭšy ŭsie za i suprać, ja vyrašyŭ zastacca. Režym niejkich časovych schoviščaŭ i abmiežavańniaŭ zdavaŭsia mnie bolš prymalnym, čym čarhovy pierajezd. Da taho ž u mianie ad samaha pačatku była viera ŭ pieramohu. Hledziačy na situacyju praz 41 dzień ad pačatku vajny, ja zrazumieŭ, što zrabiŭ pravilny vybar. Dobra, što zastaŭsia, inakš ja nie zmoh by zrabić stolki ŭsiaho karysnaha dla Ukrainy i dla svabody ŭ cełym», — pryznajecca Ramančuk.

24 lutaha musiŭ vystupać z prezientacyjaj

Ekanamist uspaminaje, što 23 lutaha jon sustrakaŭsia ź siabrami i kalehami, a na 24-ha ŭ jaho była zapłanavanaja prezientacyja prahramy padvajeńnia VUP «Ukraina — novy Zachad».

«Ranicaj ja vyjšaŭ z domu, kab nakiravacca ŭ naš ofis na Parkavaj. Na toj momant ź niezvyčajnaha na vulicach byli chiba što vielizarnyja zatory. Viadoma, užo viedaŭ, što pačałasia vajna, ale nie dumaŭ, što heta budzie ŭ takich maštabach. Pahutaryŭ ź siabrami, jany skazali biehčy dadomu.

Ab mahčymym napadzie kazali ŭžo nie adzin miesiac, ale praktyčna nichto nie prymaŭ heta ŭsurjoz. Nichto prosta nie moh pavieryć, što takoje mahčyma. Tak, paśla pryznańnia Rasijaj tak zvanych «Ł/DNR» pryjšło peŭnaje razumieńnie, što mahčymaja eskałacyja kanfliktu na Danbasie, ale kab napali na Kijeŭ i inšyja harady — to pra heta nichto nie moh padumać».

U Kijevie Jarasłaŭ žyvie na levym bierazie Dniapra. U hetaj častcy ŭkrainskaj stalicy było adnosna spakojna. U jaho rajonie nie było razbureńniaŭ damoŭ. Da najbližejšaj stancyi mietro 20 chvilin pieššu, tamu u samyja niebiaśpiečnyja momanty Ramančuku prychodziłasia chavacca ŭ padvale.

Pavialičyć

«U našym domie źnikła aciapleńnie, u takim režymie my pražyli dva tydni. Potym ciapło ŭ dom viarnułasia. Prablem sa śviatłom, haračym i chałodnym vodazabieśpiačeńniem za ŭvieś pieryjad vajny nie było. Taksama nie było pierabojaŭ z suviaźziu. Jašče adnoj prablemaj stała błakavańnie kartak hramadzian Rasii i Biełarusi. Ad hetaha mianie nie vyratavała ni prava na pracu, ni najaŭnaść VNŽ. Niejki čas daviałosia pazyčać hrošy», — uspaminaje ekanamist.

Jarasłaŭ kaža, što ad ŭśviedamleńnia taho, što Biełaruś faktyčna stała suahresaram, było hidka i baluča.

«Ź inšaha boku, heta pasłužyła jašče bolšaj matyvacyjaj zastavacca va Ukrainie, dapamahać joj i dakazvać usim, što jość Łukašenka, jakoha na toj momant padtrymlivała nie bolš za 20-25% hramadzian, a jość biełaruski narod, jaki nie padtrymlivaje vajnu i ŭžo 27 hadoŭ znachodzicca pad uładaj žorstkaj dyktatury».

Źmieny staŭleńnia da siabie Jarasłaŭ Ramančuk nie adčuŭ.

«Ja źjaŭlajusia častkaj ukrainskaha dyskursu, u mianie jość kałonki na «Cenzary», «Novym časie». Maja pazicyja jasnaja i adkrytaja. Usie razumiejuć, što my razam zmahajemsia suprać Pucina i Łukašenki.

Što tyčycca staŭleńnia ŭkraincaŭ u cełym, to ŭžo dzieści praz dva tydni paśla pačatku vajny narod pačaŭ dobra ŭśviedamlać, što jość biełarusy, jakija suprać vajny, a jość režymy Pucina i Łukašenki», — ličyć jon.

Nie zaŭvažyŭ ekanamist i jakoj-niebudź varožaści ŭ dačynieńni da ruskamoŭnych ludziej i movy ŭ cełym.

«Značnaja častka kijaŭlan havaryła i praciahvaje havaryć na ruskaj. Jakich-niebudź prablem na moŭnaj hlebie nie było i niama. Ciapier lohka sustreć ludziej sa zbrojaj, jakija achoŭvajuć horad, razmaŭlajučy pry hetym pa-rusku. Užo padčas vajny ja vystupaŭ na pasiadžeńni Kamiteta Viarchoŭnaj rady pa ekanamičnaj palitycy. Časta rablu prezientacyi na ŭkrainskaj, ale kažu na ruskaj. Heta ni ŭ kaho nie vyklikaje pytańniaŭ», — adznačyŭ Ramančuk.

Horad pačynaje ažyvać

Što tyčycca bytavych pytańniaŭ, to, pa nazirańniach ekanamista, horad pačynaje ažyvać.

«Kali pieršyja dva tydni vulicy byli dosyć biaźludnyja i niekatoryja kiroŭcy ŭžo paśpieli pryvyknuć jeździć, nie hledziačy na sihnał śviatłafora, to ŭ apošnija tydni paŭtary horad staŭ častkova viartacca da narmalnaha žyćcia. Pačali adčyniacca maleńkija kramy, kafe. Pašyrajecca vybar praduktaŭ. Na minułych vychadnych było dobraje nadvorje, u parkach i na vulicach było šmatludna, choć mer Kijeva Vital Kličko kazaŭ, što heta niebiaśpiečna. Ale ludzi ŭsio roŭna sprabujuć choć niejak viartacca da narmalnaha žyćcia, nakolki heta mahčyma.

Častkova funkcyjanuje hramadski transpart, mietro pa-raniejšamu nie pracuje ŭ poŭnym abjomie. U horadzie šmat błokpastoŭ i akopaŭ», — dzielicca ŭražańniami naš surazmoŭca.

Čytajcie taksama:

New York Times: Spadarožnikavyja zdymki całkam abviarhajuć viersiju Rasii, što zabojstvy ŭ Bučy adbyvalisia paśla sychodu jaje vojskaŭ 

Miadźviedzieŭ: Tudy joj i daroha, takoj Ukrainie! Navukaj budzie nie tolki ciapierašniaja śpiecapieracyja

• 24
• 0
• 1
• 0
• 1
• 2
• 1
• 0