Pavodziać siabie jak haspadary, pradajuć toje, što narabavali va Ukrainie. Što raspaviadajuć pra rasijskich vajskoŭcaŭ na Homielščynie
«Svaboda» pahutaryła z žycharami Homielskaj vobłaści pra prysutnaść tam rasijskich vajskoŭcaŭ, techniki i niabožčykaŭ.
«Rasijanin daŭ mnie ahitku pra toje, što jany niasuć mir»
Šmat rasijskaj techniki i vajskoŭcaŭ było 29 sakavika ŭ Brahinskim rajonie. «Kałony tankaŭ, BTR i «Urałaŭ» byli biaskoncymi. Ja sprabavaŭ razmaŭlać z rasijskimi vajskoŭcami, ale jany byli vielmi złosnyja. Nakolki ja daviedaŭsia, im zabaroniena kantaktavać z nami, nazyvać svaje niejkija źviestki», — raskazaŭ žychar Brahinskaha rajona.
Rasijski vajskoviec daŭ jamu ahitacyjnuju ŭlotku. Tam napisana: «Pavažanyja tavaryšy, siabry, nam nie patrebnaja vajna! My nie źbirajemsia napadać i bambić harady. My pryjšli zmahacca nie z ukrainskim narodam, a z nacyjanalistami, ad ruk jakich hinuć mirnyja ludzi. Adnojčy my pieramahli fašyzm i nie majem prava zdavać pazicyi».
«Pavodziać siabie jak haspadary žyćcia»
Maksim (imia źmienienaje dziela biaśpieki. — RS) nazyvaje situacyju z prysutnaściu rasijan u Mazyry žacham.
«Rasijanie pavodziać siabie ŭ Mazyry jak haspadary žyćcia. Kala vioski Bokaŭ Mazyrskaha rajona ŭ ich aeradrom i łahier, tam ich vielmi šmat. Adzin miascovy hulaŭ tam — dyk jaho spynili rasijanie, pačali čaplacca: «Što ty tut chodziš, što ty tut robiš». Akružyli jaho i vyklikali KDB. Jaho vieźli na dopyt, prystaviŭšy da boku pistalet», — raspavioŭ žychar Mazyra.
Jon kaža, što ŭ zatrymanaha nie znajšli ničoha, aproč padpiski na niejki telehram-kanał, tamu «abyšłosia «sutkami».
«Śpiać u chlavach, nie myjucca, tamu taki smurod ad ich»
«Natoŭpy ich u kramach, chodziać pa barach. Čaplajucca da ludziej. Adzin naš pryjaciel maje doŭhija vałasy.
Dyk da jaho ŭ bary pryčapiŭsia rasijski vajskoviec. Maŭlaŭ, ty čaho maješ takija doŭhija vałasy? U nas by za takoje zabili! Niedzie tam «u ich», ci ŭ Čuvašyi, ci ŭ Zabajkalli.
Jašče takaja admietnaść — ad ich mocna śmiardzić, pa pachu možna zrazumieć, kali zachodziš u kramu, što jany tam. Bo, dumaju, jany nie myjucca.
Kamandziry žyvuć u narmalnych umovach — u hateli «Prypiać». Sałdaty — u lesie ŭ namiotach i navat u chlavach. U vioscy Prudok jany žyvuć u chlavach fiermy.
Tam śpiać na dyvankach. Moža tamu i taki smurod ad ich», — razvažaje Maksim.
Jon kaža, što ŭ morhach Mazyra ciapier niama trupaŭ rasijan — «ich adrazu hruziać i niekudy vyvoziać».
«Kali ich vynosiać i vyvoziać, to ludziej nie puskajuć u pryjomny pakoj. Jašče i ačapleńnie staviać. Ja nie viedaju, chto heta, jany ŭ cyvilnym. Lekary ničoha nie raspaviadajuć, im zabaranili. Im navat skazali, što kali chto budzie cikavicca, dakładvać kiraŭnictvu», — dadaŭ mazyranin.
«Pradajuć narabavanaje va Ukrainie i paliva»
Illa (imia źmienienaje. — RS) žyvie ŭ Mazyry i štodzień bačyć rasijskija samaloty ŭ niebie, vajskoŭcaŭ — na vulicach rodnaha horada.
«Kiroŭcy ich pradajuć dyzielnaje paliva — pa 15 rubloŭ za kanistru. Jany viazuć «trafiei» z Ukrainy, narabavanaje, i prapanoŭvajuć na prodaž miascovym žycharam. Ladoŭni, bytavuju techniku, aŭtašyny, dy što tolki pad ruki papadziecca», — kaža Illa.
«Dobraha ničoha nie skažu. Niepryjemna, kali našy dziaŭčaty «ź nievysokaj sacyjalnaj adkaznaściu» hulajuć ź imi. Nie viedaju, dzie jany znajomiacca — ci na vulicy, ci ŭ internecie. Bojki ŭčyniajuć, kali pjanyja, u barach», — dadaŭ miascovy žychar.
«U asnoŭnym i šmat biaruć harełki»
Šmat techniki i rasijskich vajskoŭcaŭ u Naroŭli. Tut taksama raźmieščany palavy špital. Paranienym rasijanam tut akazvajuć pieršuju dapamohu. Potym ich viazuć u Mazyr ci Homiel. Trupy adpraŭlajuć u Rasiju.
«Palavy špital achoŭvajuć zvonku rasijskija sałdaty. Peŭna, kab nichto nie fatahrafavaŭ. Tudy latajuć viertaloty ŭ asnoŭnym. Šmat ich kružlaje i nad Naroŭlaj, pryčym latajuć vielmi nizka», — kaža žychar Naroŭli.
Jon zaŭvažyŭ, što rasijanie «udaskanalili» svaju techniku.
«Mašyny «zašyli» biarvieńniem, źvierchu halinki lažać, navaryli na dźviery i na paliŭny bak žaleźzie — vidać, kab nie prastrelili», — padzialiŭsia nazirańniami žychar rajonnaha centra.
Kaža, što padbituju rasijskuju techniku ramantujuć u Naroŭli.
«U kramie staŭ śviedkam — rasijanin nabraŭ harełki i vina, a kartka nie pracuje. Pajšoŭ, pastaviŭ usio nazad. Ale bolšaść kuplaje ŭsio. U asnoŭnym i šmat biaruć harełki. Taksama «śnikiersy», «rołtany», cyharety», — dadaŭ žychar Naroŭli.
«Tam stolki paranienych rasijan lažyć — prosta žach. Strašna źniaviečanyja. Ich stohn na ŭvieś špital niemahčyma słuchać»
U Mazyry rasijski vajskovy KamAZ ź litaraj V źmiaŭ lehkavik
Papularny tyktokier z Rasii tusić u darahich restaranach Minska: «Byccam bamžu padali. Žarycie, na zdaroŭje»12
Kamientary