Śviet

Što spynić Pucina, čamu rasijskija vojski nie šturmujuć Kijeŭ i navošta rujnujuć Maryupal — raspaviadaje ŭkrainski vajenny ekśpiert

Try tydni Ukraina supraćstaić rasijskamu ŭvarvańniu. Płan Kramla, jaki praduhledžvaŭ chutkuju pieramohu, pravaliŭsia. Adnak rasijskaja armija płanamierna razburaje ŭkrainskija harady, zabivaje mirnych žycharoŭ i raŭniaje ź ziamloj infrastrukturu. Jak dalej mohuć raźvivacca padziei, jakija šancy Ukrainy na pieramohu, kali vajna moža skončycca, vydańniu «Hłavried» raspavioŭ ukrainski vajenny ekśpiert Aleh Ždanaŭ.

Aleh Ždanaŭ. Fota: «Hłavried»

— Rasija rychtavałasia da blickryhu, ale nie skłałasia, jaje płan A pravaliŭsia. Kali mierkavać pa pavodzinach RF i jaje vojskaŭ, to da čaho Maskva rychtujecca ciapier, jaki ŭ jaje płan B?

— Rasija sprabuje realizavać dva płany paralelna.

Pieršy ź ich — praciah nastupu. Miarkujučy pa pazicyi Łaŭrova na pieramovach i pa situacyi ŭ Kramli, Pucin usio jašče spadziajecca, što jašče adzin udar, jašče adzin kidok — i jany voźmuć Kijeŭ, Maryupal, i pieramoha budzie za Rasijaj.

Druhi płan sprabujuć ažyćciavić rasijskija vajskoŭcy. Naohuł, składvajecca ŭražańnie, što palityčnaje kiraŭnictva RF nie vałodaje poŭnaj infarmacyjaj i nie pradstaŭlaje realnuju vajennuju karcinu, jakaja skłałasia va Ukrainie. Rasijskija vajskoŭcy sprabujuć realizavać płan pierachodu da abarony i zamacavańnia na tych miežach, jakich jany dasiahnuli na siońniašni dzień.

U Maryupali 11 sakavika 2022 h. u žyłym domie paśla abstrełu tankami rasijskaj armii adbyŭsia vybuch. Fota: AP / Evgeniy Malaletka

Zadača maksimum Kramla ŭ hetaj vajnie na siońniašni dzień zvodzicca da prabićcia suchaputnaha kalidora ŭ Krym. Tamu Maryupal — heta klučavy horad i dla Rasii, i dla nas. Nam treba Maryupal utrymać, rasijanam — uziać.

Zadača minimum — zamacavacca na tych miežach, jakija jość na hety momant, i sabrać choć niejki rezierv dla ŭtrymańnia hetych miežaŭ.

— Zamacavacca na rubiažach… A dalej?

— A dalej handlavacca. Rasii ŭžo ciapier patrebnaja surjoznaja paŭza chacia b na miesiac-dva, kab sabrać nieabchodny rezierv, navučyć jaho, padciahnuć, pastavić u stroj, pierakinuć vojski.

Rasija nie spynicca. Tam i blizka niama dumki, što treba adychodzić ci kapitulavać. Jany žadajuć uziać harantavanuju paŭzu, heta značyć, być upeŭnienymi, što my nie budziem nastupać.

Pakul Pucin va ŭładzie, Rasija ni na jakija sastupki nie pojdzie. Pucin budzie źbirać bajazdolnyja čaści, ich askiepki, kamplektavać ich kim zaŭhodna.

U Maryupali situacyja dzikaja. Pierad našymi pazicyjami — pole, ŭsiejanaje trupami, ale rasijanie nie chočuć ich sabrać — jany pa trupach svaich ža sałdat iduć u ataku.

Jany iduć u łabavuju, jak u 1941 hodzie, i sprabujuć zakidać ciełami našy pazicyi. Ja nie kažu pra humanizm ci choć pra niejki zdarovy sens. Toje, što vytvarajuć rasijanie, i toje, jakim koštam jany hatovyja brać pieramohu, — za miežami čałaviečaha razumieńnia.

— Kolki, na vašu dumku, moža praciahnucca haračaja faza vajny?

— Ciapier tolki pieršy etap haračaj fazy. Da kulminacyi my jašče nie dajšli.

Druhi etap — kali nam daviadziecca pierachodzić u kontrnastupleńnie. Voś tut i budzie haračej za ŭsio, tamu što vieści nastupalnyja bai našmat ciažej, čym abarončyja. Kali budzie padsiłkańnie supiernika reziervami, to nam budzie ciažka. Adnak, kali my pabudujem svoj nastup bolš hramatna, to zmožam paźbiehnuć vialikich strat i krychu ablehčyć sabie zadaču. Ale haračaja faza vajny jašče napieradzie.

Ukrainskija sałdaty vykarystoŭvajuć amierykanski puskavy rakietny kompleks Javelin padčas vajennych vučeńniaŭ u Danieckaj vobłaści Ukrainy, sierada, 12 studzienia 2022 h. Fota: pres-słužba Minabarony Ukrainy / AP

— Heta značyć, tyja aptymisty, jakija śćviardžajuć, što vajna skončycca praz paru tydniaŭ, i Pucin budzie vymušany sieści za stoł pieramovaŭ, vielmi pierabolšvajuć?

— Tak, takija prahnozy zanadta aptymistyčnyja. Zrešty, jość adzin varyjant, pry jakim usio moža skončycca praz paru tydniaŭ — kali chtości ŭ bunkiery likviduje Pucina. Voś tady ŭ Rasii budzie novaja elita, pierachodny ŭrad, jaki-niebudź časovy kamitet vyratavańnia RF… Tady Rasija moža damovicca z nami pra toje, što jana całkam vyvodzić svaje vojski z našaj terytoryi, pryčym i z Danbasa, i z Kryma.

Taki varyjant mahčymy, ale jaho vierahodnaść — 50/50. Pucin razumieje situacyju, tamu i chavajecca ŭ bunkiery, nikoha da siabie nie padpuskajučy.

Tamu ja b nie byŭ takim aptymistyčnym. Vyzvaleńnie terytoryi Ukrainy — heta budzie ciažkaja ratnaja praca našych Uzbrojenych sił.

— Ci chopić u Rasii sił — i asabovaha składu, i techniki — dla taho, kab praciahvać haračuju fazu miesiac abo daŭžej?

— Dumaju, tak. Pa danych Centra abaronnych stratehij, na terytoryju Ukrainy ŭvajšło kala 160 tysiač asabovaha składu, čaćviortaja častka (prykładna 40 tysiač) — heta nie bajavyja častki, a Rashvardyja, AMAP, SOBR, KORD, heta značyć, palicejskaja misija. Jany ž raźličvali na blickryh i na toje, što adrazu daviadziecca ŭstaloŭvać pravavy režym RF, jak jany ciapier robiać u Chiersonie, Biardziansku i h.d.

Heta značyć, bajavych častak na terytoryi Ukrainy kala 120 tysiač. Kali raźličvać, što my nanieśli im da 30% strat, heta aznačaje, kala 25-30 tysiač, to bajavych častak zastałosia jašče 80-90 tysiač. Heta davoli vialikaja ličba. Takija častki realna mohuć akazvać supraciŭleńnie ŭ pazicyjnaj vajnie.

Adnak ustojlivaść ich abarony budzie zaležać ad zabieśpiačeńnia i padsiłkoŭvańnia resursami. Kali kazać pra resursy, to pakul što Pucin moža pastaŭlać tolki «harmatnaje miasa». Asabovy skład, jaki jany buduć zavozić na hruzavikach, aŭtobusach dla papaŭnieńnia strat — heta sapraŭdy budzie harmatnaje miasa, tamu što hetyja ludzi kali i projduć vajennuju padrychtoŭku, to paskoranuju, heta značyć, ać-dva na placy, para strełaŭ z aŭtamata, voś užo i sałdat. Kasku na hałavu — i napierad, u akopy.

Cieła vajskoŭca, zasypanaje śnieham, pobač sa źniščanaj rasijskaj vajskovaj reaktyŭnaj sistemaj załpavaha ahniu na ŭskrainie Charkava, Ukraina, 25 lutaha 2022 h. Fota: AP

Kolki Pucin zmoža tak źbirać — skazać vielmi ciažka. Heta budzie zaležać ad nastrojaŭ u samoj Rasii. Choć pacichu jany tam mianiajucca na našu karyść — antyvajennaja chvala padymajecca ŭsio bolš i bolš, tamu što pacharonak prychodzić usio bolš. Ciełaŭ niama, a pacharonki iduć.

Tak što nadychodzić samaja ciažkaja faza vajny — faza prasoŭvańnia našych sił napierad.

— Ci moža ciapier situacyja być zamarožanaja Rasijaj? Heta značyć, ci moža ŭ nas utvarycca, umoŭna kažučy, Prydniastroŭje ci Danbas (u bolšych maštabach) i zamierci na hady?

— Na žal, tak, heta mahčyma. Rasija moža źviarnucca da varyjantu zamarozki kanfliktu.

Z časoŭ pieršabytnaha čałavieka nichto nie prydumaŭ treciaha sposabu zakančeńnia vajny, ich tolki dva — pieramoha i paražeńnie. Dy i toje, niama harantyj, što zrynuty vorah praz čas nie pačnie źbirać siły na novuju vajnu…

Kali my znoŭ padpišam niejki miemarandum, umoŭna kažučy, Minsk-3, Danbas-1 ci Krym-1, heta prosta adkładzie vajnu na niekalki miesiacaŭ. A nastupnaja vajna budzie našmat kryvaviejšaj i bolš žorstkaj, čym ciapierašniaja.

Mienavita tamu nam ni ŭ jakim razie nielha iści ni na jakija sastupki ciapier, inakš my ŭsio prajhrajem.

— Harady, jakija padviarhajucca najbolš žorstkim i častym abstrełam: Vałnavacha, Maryupal, Čarnihaŭ, Charkaŭ, Hastomiel, Irpień, Buča… Dla čaho Rasija tak uparta i płanamierna sprabuje ścierci hetyja harady z tvaru ziamli?

— Rasija prymianiaje siryjskuju taktyku. Na poli boju jana baicca z nami zmahacca. Tamu RF vyrašyła «uciužyć» harady i zabivać jak maha bolš mirnaha nasielnictva, kab ludzi, jakija zastalisia, zmušali kiraŭnictva krainy iści na kapitulacyju i mir luboj canoj.

Tamu nanosiacca ŭdary pa balnicach, radzilnych damach, kamunikacyjach… Metanakiravana imknucca pakinuć harady bieź ciapła, śviatła i vady, to-bok stvaryć umovy humanitarnaj katastrofy.

— Šmat kažuć pra mahčymaść vykarystańnia Rasijaj chimičnaj i bakteryjałahičnaj zbroi. Jak vy ličycie, ci moža RF pajści na ich vykarystańnie suprać Ukrainy?

— Na žal, moža. Jadzierny šantaž Rasii nie zusim udaŭsia joj, nie prynios vynikaŭ ni zachop Čarnobylskaj AES, ni zachop Paŭdniovaŭkrainskaj stancyi. Tamu RF udaryłasia ŭ temu bijalahičnaj ci chimičnaj zbroi. Viartajučysia da dośviedu toj ža Siryi, u Rasii najbahaciejšy dośvied užyvańnia padobnaj zbroi.

Kryłataja rakieta dalokaha radyusa dziejańnia «Kalibr» zapuščana karablom VMS Rasii va ŭschodnim Mižziemnamorji, 19 žniŭnia 2016 h. Fota: pres-słužby Minabarony RF / AP

Rasija całkam moža prymianić chimičnuju i bakteryjałahičnuju zbroju, dapuścim, na Danbasie — u Łuhansku, Daniecku abo jakim-niebudź inšym nasielenym punkcie, jaki kantraluje RF, kab abvinavacić u hetym Ukrainu. Ale znoŭ-taki heta budzie hulnia ŭ adny varoty, navat bolš — streł Rasii sabie ŭ nahu.

Na siońniašni dzień usia suśvietnaja presa akredytavała stolki svaich žurnalistaŭ va Ukrainie, i jany bačać realnuju karcinu i našy mahčymaści, viedajuć, što ŭ nas niama chimičnaj zbroi. 

Ale Rasija ŭparcicca i sprabuje naviazać hetyja naratyvy. 

— Vy zhadali jadzierny šantaž. Jak vy ličycie, ci zdolny Pucin nanieści jadzierny ŭdar, ci heta prosta zapałochvańnie?

— Nie, heta nie pustyja słovy. Całkam vierahodna, što Pucin naniasie previentyŭny jadzierny ŭdar. Takuju pahrozu nielha skidvać z rachunkaŭ. Zrešty, heta budzie ŭžo krajniaja miera. Pucin źvierniecca da hetaha tady, kali budzie razumieć, što projhryš nie za harami.

Uspomnicie Hitlera ŭviesnu 1945-ha. Jon ličyŭ, što, kali jaho navukoŭcy zrobiać jadzierny zarad, jon adrazu ž skinie atamnuju bombu na sajuźnikaŭ i skaža im: «Zdavajciesia, ja vyjhraŭ vajnu». Taki ž samy raźlik i ŭ Pucina.

Chutčej za ŭsio, jadziernaja zbroja moža być prymienienaja Pucinym pa jakim-niebudź asobnym abjekcie NATA, jak previentyŭny ŭdar dla zapałochvańnia. Adnak heta budzie mieć strašnyja nastupstvy, tamu što NATA adkaža takim ža previentyŭnym udaram pa terytoryi Rasii, pa jakim-niebudź rasijskim abjekcie niedzie ŭ hłybini terytoryi.

Adzin sa sposabaŭ praduchileńnia hetaha scenaryja — heta parušeńnie viertykali kiravańnia, heta značyć, kamanda ad Pucina da puskavoj ŭstanoŭki moža nie dajści, zhubicca. Na siońniašni dzień heta, na žal, samy vierahodny scenaryj praduchileńnia jadziernaj vajny. 

— Jakaja vierahodnaść šturmu Kijeva? Čamu sapiernik marudzić, choć daŭno heta płanavaŭ? 

— Prablema Rasii jak raz u tym, što ŭ jaje niama dastatkovych sił dla šturmu Kijeva. Dy i naohuł, pytańnie šturmu Kijeva ciapier nie staić na paradku dnia.

Dla taho, kab šturmavać Kijeŭ, treba było ŭsie 120 tysiač sałdat, poŭny skład bajavych častak, vieści na Kijeŭ. Heta mahło b zabiaśpiečyć poŭnuju abłohu horada, ale nie jaho šturm.

Kijeŭ, 15 sakavika 2022 h. Fota: AP.

Rasijanie sprabavali rušyć napierad, kab uziać Kijeŭ chacia b u paŭkoła. Ale paśla taho, jak siły sapiernika byli raźbityja pad Bravarami i kali byŭ adnoŭleny kantrol nad Hastomielem, navat takija sproby ŭžo niemahčymyja. Heta značyć, my pastupova adsoŭvajem supiernika ad Kijeva.

Kali jany nie mohuć uziać Kijeŭ u abłohu, to pra jaki šturm havorka? Ciapier na ŭsich napramkach jany buduć abkopvacca i pierachodzić da abarony.

 Ci ŭdasca Łukašenku i Biełarusi paźbiehnuć aficyjnaha ŭstupleńnia ŭ hetuju vajnu?

— Kali Łukašenka lotaŭ u Maskvu, to naŭrad ci. Łukašenka sprabuje prykryvacca novaj kanstytucyjaj i kazać, što «takija pytańni z kandačka nie vyrašajucca». 15 sakavika ŭ Biełarusi nabyvaje moc novaja kanstytucyja, i Łukašenka sprabuje spasłacca na toje, što ŭsio budzie vyrašać narodny schod.

Biełaruś aktyŭna manitoryć situacyju. Tam bolš za 50% vajskoŭcaŭ suprać udziełu ŭ bajavych dziejańniach va Ukrainie. Kali jany ŭkliniacca ŭ našu terytoryju na Vałyni, to tam hrupoŭka našych vojskaŭ dastatkovaja, kab ich razhramić.

Biełaruskija vajskoŭcy mohuć zrabić hetak ža, jak rasijskija terminovaj słužby: albo raźbiehčysia paśla pieršaha boju, albo zahinuć, kali jany buduć nastrojenyja rašuča. Bo biełaruskaje vojska nikoli nidzie nie vajavała, nie ŭdzielničała ni ŭ jakich kanfliktach.

Dla nas udzieł biełarusaŭ — heta, viadoma, minus, ale my ŭžo vytrymajem. Dla nas heta ŭžo niekrytyčna.

— Pieramoŭny praces. Jak vy ličycie, ci moža na hetym etapie vajna być spynienaja pieramovami? Užo havorycca ab tym, što Zialenski hatovy sustrecca z Pucinym, i Pucin byccam by nie suprać. 

— Dumaju, ciapier u takoj sustrečy niama nijakaha sensu. Tym bolš, niama sensu sustrakacca sam-nasam, tamu što pazicyi bakoŭ prama supraćlehłyja. Kali niechta (ci Pucin, ci Zialenski) pojdzie chacia b na jotu sastupki, heta budzie projhryš dla jaho. Zamarozka kanfliktu siońnia niemahčymaja, tamu što vajennaja mašyna raskručanaja na ŭsiu katušku.

Što moža być na takoj sustrečy? Zialenski prapanuje Pucinu zdacca, a Pucin — Zialenskamu?

Ciapier u Ukrainy niama vybaru, palityčny abo vajenny šlach. U nas adzin šlach — vajenny. Pakul my na poli boju nie pačniem kavać svaju pieramohu, kazać ab pierahavornym pracesie niemahčyma. 

Udzielniki skaŭckaj arhanizacyi «Płast» platuć maskirovačnyja sietki ŭ Ivana-Frankoŭsku, 28 lutaha 2022 h. Fota: Taras Kašuba / UNIAN

Tak što nijakija kampramisy ŭ hetaj situacyi niemahčymyja. Luby kampramis ź luboha boku budzie ličycca parazaj.

Pucin na kampramisy nie pojdzie — jon pastaviŭ na kartu svajo žyćcio. Lubaja sastupka ź jaho boku — hetaha nie zrazumieje jaho asiarodździe i prosta źjeść jaho. Nie fizična, dyk palityčna. U bunkiery začyniać i nie vypuściać.

Dla Zielanskaha situacyja takaja ž. Jon što, pryjedzie ŭ Kijeŭ i skaža, maŭlaŭ, chłopcy, ja damoviŭsia, my kryšku sastupim? U takim vypadku jaho prosta vyniasuć z Bankavaj.

Vojski pajšli ŭ chod, i hetuju mašynu ŭžo niemahčyma spynić. Biez vychadu na dziaržaŭnuju miažu hety praces užo spynić nielha.

Niekatoryja analityki i ekśpierty ŭ nas razvažajuć pra toje, što, u pryncypie, u pytańniach niejtralitetu my mahli b pajści nasustrač… Heta zdrada i kapitulacyja. Kali my pahodzimsia na niejtralitet, ličycie, my prajhrali vajnu. 

Kali my vyjhrajem vajnu, my možam padumać ab pryniaćci zakona, jak u Šviejcaryi. Chacia zastavacca niejtralnymi ŭ centry Jeŭropy — heta samahubstva. Majučy dźvie tysiačy kiłamietraŭ miažy z RF — tym bolš…

Bo, navat prajhraŭšy, Rasija budzie źbirać siły dla nastupnaha ryŭka. Voś ubačycie, kali my pieramožam, litaralna praz hod-dva novaje kiraŭnictva Rasii budzie budavać usiu palityku adradžeńnia Rasii na tym, kab adpomścić Ukrainie. Heta impierskaja ideałohija, jana tam nikoli nie vyvietrycca. Jaje napałmam nie vypališ u Rasii nikoli.

Tady, atrymlivajecca, my ryzykujem na hady i dziesiacihodździ zatrymacca ŭ stanie, kali budziem vymušanyja čakać novaha napadu z boku RF i novych rakietnych udaraŭ…

— Mienavita tak. Taki naš los. Treba ci hieahrafična pieranosić krainu, ci žyć, jak žyvie Izrail.

Udzielniki terabarony trenirujucca kidać kaktejli Mołatava ŭ Žytomiry, 1 sakavika 2022 h. Fota: Ratynski Viačasłaŭ / UNIAN

Ukraina pavinna stać napałovu vojskam, nacyja pavinna stać napałovu vajenizavanaj. Tolki takoje ŭzmacnieńnie krainy budzie strymlivać sapiernika, dajučy jamu zrazumieć, što pachod va Ukrainu dla jaho skončycca vielmi sumna. Heta naš adziny šaniec na vyratavańnie.

Vajskovy ekśpiert: Rasijskaja apieracyja była niepadrychtavanaj avanturaj

Ekśpiert: Krytyčna važnaje značeńnie dla ekanomiki Biełarusi maje nieŭstupleńnie ŭ vajennyja dziejańni z Ukrainaj

Kamientary

88-hadovy apalny eks-kiraŭnik Pinskdreva Arynič žyvie ŭ Biełastoku ŭ zdymnaj kvatery za košt svajakoŭ

88-hadovy apalny eks-kiraŭnik Pinskdreva Arynič žyvie ŭ Biełastoku ŭ zdymnaj kvatery za košt svajakoŭ

Usie naviny →
Usie naviny

Što adbyvajecca z klimatam? Takaja śpioka letam budzie zaŭsiody?5

Biełarusa zatrymali paśla adpačynku ŭ Italii3

«Vyjšli chłopčyki z čamadančykami». Lidar hurta RSP raskazaŭ, jak Łukašenka pryjazdžaŭ na zdymačnuju placoŭku5

Respublikanskaja partyja aficyjna vyłučyła Trampa kandydatam u prezidenty ZŠA9

U Kabardzina-Bałkaryi biełarus sarvaŭsia sa skały2

Tramp nazvaŭ svajho kandydata ŭ vice-prezidenty22

Niekatoryja biełarusy sustrakali ŭčarašni ŭrahan, kupajučysia ŭ voziery VIDEA

Źmitra Daškieviča buduć sudzić pa novaj kryminalnaj spravie ŭžo na hetym tydni7

Łatuška: Ja mahu bajacca pić vadu ci kavu ŭ hramadskich miescach14

bolš čytanych navin
bolš łajkanych navin

88-hadovy apalny eks-kiraŭnik Pinskdreva Arynič žyvie ŭ Biełastoku ŭ zdymnaj kvatery za košt svajakoŭ

88-hadovy apalny eks-kiraŭnik Pinskdreva Arynič žyvie ŭ Biełastoku ŭ zdymnaj kvatery za košt svajakoŭ

Hałoŭnaje
Usie naviny →