Pa słovach Alaksieja (imia źmienienaje pa prośbie surazmoŭcy), apošnija niekalki dzion unutrany kurs valuty na jaho firmie štodzionna raście na 50 kapiejek, a składy praciahvajuć puścieć.

«Pierad vychadnymi kurs dalara ličyli z raźliku šeść rubloŭ za dalar, jeŭra — pa šeść z pałovaj rubloŭ. Kankurujučyja firmy pracujuć prykładna pa toj ža schiemie. Navat kali jany zakładvajuć mienšy kurs, to pavyšajuć canu za košt handlovaj nadbaŭki. Pa vyniku cana zakupki dla aptovych klijentaŭ va ŭsich pastaŭščykoŭ pryblizna adnolkavaja.

Roźničnyja pradaŭcy razumiejuć, što zaŭtra im, chutčej za ŭsio, pryjdziecca zakuplać tavar pa bolš vysokaj canie, i vymušanyja zakładać u košt dadatkovyja ryzyki. Bolšaść detalaŭ i raschodnikaŭ — impartnaj vytvorčaści, adsiul majem, što surjoznaje padaražańnie jość praktyčna pa ŭsich hrupach tavaraŭ».

Pry hetym śpiecyjalist śćviardžaje, što rost cen — heta jašče nie hałoŭnaja prablema, ź jakoj nieŭzabavie mohuć sutyknucca biełaruskija aŭtamabilisty.

«Ciapier praktyčna niama śviežych pastavak zapčastak u krainu. Pryčyny roznyja: u kahości bank trapiŭ pad sankcyi i niama mahčymaści raźličycca za tavar, u niekatorych vypadkach sami vytvorcy nie viedajuć, što rabić z klijentami ź Biełarusi, i kab nie ryzykavać reputacyjaj, adhruzki dla našaj krainy nie ažyćciaŭlajuć.

U kaleh byŭ vypadak, kali mašyna adpraviłasia za ŭžo prapłačanym tavaram, ale ŭvieźci jaho ŭ Biełaruś nie atrymałasia. Litoŭskaja mytnia admoviłasia afarmlać dekłaracyju i znajšła padstavy, kab nie vypuścić hruz. Pastaŭščyk byŭ vymušany viartacca z tavaram na skład», — kaža Alaksiej.

Sa słoŭ mieniedžara, zapasy zapčastak rastajuć, z hetaj nahody niekatoryja firmy ŭžo prypynili pracu rehijanalnych pradstaŭnictvaŭ u rajonnych centrach, pakinuŭšy tolki Minsk i abłasnyja harady.

«Na biahučy momant užo nazirajecca niedachop matornych alejaŭ biudžetnaha siehmientu. Pa niekatorych pazicyjach zamiest raniej dastupnych piaci-siami varyjantaŭ, prychodzicca vybirać z adnaho-troch. Kali situacyja nie źmienicca, to chutka my možam sutyknucca z tym, što impartnyja alei, filtry, ramiani, roliki stanuć deficytnym tavaram.

Hetaja katehoryja zapčastak adnosicca da «raschodnikaŭ», jakija zaŭsiody buduć karystacca popytam. Da taho ž heta tyja rečy, jakija nielha zamianić b/u detalami».

Alaksiej miarkuje, što z pryłaŭkaŭ aŭtakram u pieršuju čarhu buduć źnikać tavary, vyrablenyja ŭ Jeŭropie. Ale i z kitajskimi detalami nie ŭsio tak prosta.

«Kitajskija vytvorcy zapčastak nie mohuć całkam źmianić toje, što robiać u Jeŭropie. Ich asartymient nijak nie zabiaśpiečyć rynak na ŭsie 100%. Na mnostva marak i madelaŭ aŭtamabilaŭ «kitajskich» zapčastak naohuł nie isnuje».

Śpiecyjalist miarkuje, što, tearetyčna, kitajskija ci tureckija vytvorcy mohuć zamianić jeŭrapiejskich, ale heta vielmi doŭhi praces.

«Kali na biahučy momant zavod nie vypuskaje tuju ci inšuju detal, to ad zajaŭki na jaje vytvorčaść da pastavak u Biełaruś moža spatrebicca da 12 miesiacaŭ.

Zychodziačy z hetaha, možna kazać, što kali situacyja z pastaŭkami zapčastak ź ES nie źmianicca, to ŭ niedalokaj budučyni cełyja hrupy tavaraŭ mohuć praktyčna całkam źniknuć ź biełaruskich kram i aŭtaservisaŭ».

Čytajcie taksama:

«Situacyja na miažy paniki». Biznes u transie, bo ni z Rasijaj, ni ź Jeŭropaj pracavać stanovicca niemahčyma

«Da 80% usioj biełaruskaj IT-haliny źniknie». Tysiačy prahramistaŭ ź siemjami biahuć ź Biełarusi prosta ŭ hetyja chviliny

Клас
1
Панылы сорам
0
Ха-ха
0
Ого
0
Сумна
0
Абуральна
0