«Heta nie miratvorcy, a na Danbasie nie hienacyd». Hienieralny sakratar AAN asudziŭ dziejańni Rasii
Arhanizacyja Abjadnanych Nacyj całkam padtrymlivaje suvierenitet, palityčnuju niezaležnaść i terytaryjalnuju cełasnaść Ukrainy. Rasijskich sałdat, jakija buduć uviedzienyja na terytoryi samaabvieščanych «DNR» i «ŁNR», nielha ličyć miratvorcami. Ab hetym zajaviŭ hienieralny sakratar AAN Antoniu Huteryš nakont padziejaŭ va Ukrainie.

Huteryš zajaviŭ, što śviet sutyknuŭsia z najbujniejšym hłabalnym kryzisam miru i biaśpieki.
Rašeńnie RF pryznać niezaležnaść asobnych rajonaŭ Danieckaj i Łuhanskaj abłaściej źjaŭlajecca parušeńniem terytaryjalnaj cełasnaści i suvierenitetu Ukrainy i prosta supiarečyć statutu AAN i jaje Dekłaracyi ab družalubnych adnosinach.
Kiraŭnik AAN adznačyŭ, što nie zhodny z zajavaj Pucina ab tym, što na Danbasie adbyvajecca hienacyd.
— Hienacyd — heta złačynstva, jakoje dakładna vyznačanaje, i prymianieńnie [užyvańnie hetaha vyrazu] pavinna ažyćciaŭlacca ŭ adpaviednaści ź mižnarodnym pravam. Ja dumaju, što heta nie toj vypadak, — skazaŭ Huteryš.
Jon taksama vykazaŭ zaniepakojenaść u suviazi sa «skažeńniem paniaćcia miratvorčaj dziejnaści».
— Kali vojski adnoj krainy ŭvachodziać na terytoryju inšaj krainy bieź jaje zhody, jany nie źjaŭlajucca miratvorcami, — zajaviŭ Huteryš.
Hienieralny sakratar padkreśliŭ, što AAN całkam padtrymlivaje suvierenitet, palityčnuju niezaležnaść i terytaryjalnuju cełasnaść Ukrainy ŭ miežach jaje mižnarodna pryznanych miežaŭ.
— Zaklikaju ŭsich ustrymacca ad dziejańniaŭ i zajavaŭ, jakija daviali b hetuju niebiaśpiečnuju situacyju da miažy, — zajaviŭ kiraŭnik arhanizacyi.
Kamientary