Ukrainski spartsmien abniaŭsia z rasijskim na pjedestale honaru ŭ Piekinie
Siońnia na spabornictvach pa łyžnaj akrabatycy na Alimpijadzie ŭ Piekinie, na jakich niaŭdała vystupili biełaruskija spartsmieny, druhoje i treciaje miesca zaniali adpaviedna, ukrainiec Alaksandr Abramienka i rasijanin Illa Buraŭ. Pierad uznaharodžańniem jany abnialisia i paziravali fatohrafam.
Hetaja situacyja była b zvyčajnaja, kab nie varožyja adnosiny pamiž dźviuma krainami. Anałahičny epizod padčas letniaj Alimpijady ŭ Tokio, jakaja adbyłasia letam 2021 hoda, vyklikaŭ va Ukrainie vialiki skandał.
Tady ŭkrainskaja skakucha ŭ vyšyniu Jarasłava Mahučych paśla zakančeńnia spabornictvaŭ padyšła da rasijanki Maryi Łasickienie, kab pavinšavać jaje ź pieramohaj i zrabić tradycyjny sumiesny zdymak. Daloka nie ŭsie suajčyńniki pastavilisia da hetaha stanoŭča. Mahučych sutyknułasia sa škvałam krytyki, zaŭvahi joj rabili i ŭ miascovym Minsportu.
Abramienka, adnak, robić heta nie pieršy raz. Na papiaredniaj Alimpijadzie 2018 hoda ŭ karejskim Pchiončchanie Abramienka z Buravym taksama byli na pjedestale: ukrainiec — pieršym, rasijanin — trecim. Na pjedestale jany abnialisia dla fatahrafii i Abramienka abharnuŭ tavaryša ŭkrainskim ściaham. Tady za heta taksama daviałosia apraŭdvacca.
Vidać, treba hetaha čakać i ciapier. Tym bolš što Minsportu Ukrainy pierad pačatkam spabornictvaŭ papiaredžvała, što z rasijanami ŭkrainskim spartsmienam ciesnych kantaktaŭ padčas Hulniaŭ mieć nie varta, dy i padčas ich užo było niekalki skandałaŭ, źviazanych z pravakacyjnym staŭleńniem da ŭkraincaŭ z boku rasijskich ŚMI.
Čytajcie taksama:
Rasijskija ŚMI dajmajuć ukraincaŭ na Alimpijadzie pytańniami pra ruskuju movu. «Što, nam u adkaz pytacca ab dopinhu i ahresii?»
Ukrainski fihuryst na pres-kanfierencyi adkazaŭ rasijskim žurnalistam pa-anhlijsku. Dla ich heta było niečakana
Va Ukrainie zahinuła 24-hadovaja biełaruskaja dobraachvotnica Maryja Zajcava20
Kamientary