U Biełarusi paŭtorna zatrymlivajuć byłych palitviaźniaŭ i «chimikaŭ». Što adbyvajecca?
Pavodle infarmacyi «Našaj Nivy», zatrymańni źviazanyja z čatam «Valejboł pa vychadnych», jaki pryznany «ekstremisckim farmavańniem».
Jašče ŭ studzieni pravaabaroncy paviedamlali, što supracoŭniki Kamiteta dziaržaŭnaj biaśpieki naviedali «chimii» PUAT-17 u Homieli, PUAT-45 u Suškach, PUAT-10 u Viciebsku dy inšyja papraŭčyja ŭstanovy adkrytaha typu. Palitviaźniaŭ-chimikaŭ dapytvali, u ich dla ekśpiertyzy zabirali mabilnyja telefony. 8 lutaha telefony viarnuli.
14 lutaha stała viadoma, što «ekstremisckim farmavańniem» pryznali čat «Valejboł pa vychadnych». Hetaje rašeńnie pryniaŭ Kamitet dziaržaŭnaj biaśpieki.
15 lutaha bresckija pravaabaroncy paviedamili pra zatrymańnie byłoha palitviaźnia Juryja Kaściuka, jaki vyzvaliŭsia 6 studzienia.
U hety ž dzień, pa infarmacyi pravaabaroncaŭ z Mahilova, supracoŭniki KDB praviali vobšuk i advieźli ŭ nieviadomym kirunku palitviaźnia Stanisłava Paŭlinkoviča. Jon znachodziŭsia ŭ PUAT-39 u Krupkach.
Taksama paviedamlali i pra zatrymańnie Hieorhija Vasilenki (PUAT-49 u Škłovie).
U toj ža dzień siłaviki naviedali PUAT-45 i dapytali Lavona Chałatrana jak śviedku pa kryminalnaj spravie.
15 lutaha taksama zabrali telefony ŭ viaźniaŭ PUAT-49. Pierastaŭ vychodzić na suviaź palitviazień Viktar Parchimčyk z PUAT-45.
U sieradu 16 lutaha pravaabaroncy «Viasny» paviedamlali, što na «chimii» ŭ Kamianieckim rajonie zatrymali palitviaźnia Dzianisa Hrachanava. Raniej jaho asudzili za nadpis «Nie zabudziem» kala miesca hibieli Alaksandra Tarajkoŭskaha. Palitviaźniu dali try hady «chimii».
Mahčyma, z toj ža spravaj źviazanyja vobšuki pa miescach prapiski Alaksieja Lipienia i Maryny Kasinieravaj. Vobšuk pravodzili supracoŭniki Kamiteta dziaržbiaśpieki ŭ ramkach spravy pa art. 361-1 KK RB «Stvareńnie ekstremisckaha farmavańnia albo ŭdzieł u im». Jany dapytali i Ludmiłu Nasienka, maci Kasinieravaj.
Sprava «Valejboła» pakazvaje, što ludzi ŭ Biełarusi praciahvajuć abjadnoŭvacca dla supolnych dziejańniaŭ.
U toj ža čas kryminalizacyja stvareńnia niezarehistravanych arhanizacyj i ŭdziełu ŭ ich daje siłavym strukturam jurydyčnuju padstavu dla zaviadzieńnia kryminalnych spraŭ suprać samaha šyrokaha koła hramadzian.
«Ekstremisckimi farmavańniami» byli ŭžo pryznanyja šmatlikija apazicyjnyja struktury, telehram-kanały, čaty mikrarajonaŭ i pasieliščaŭ i navat raniej lehalnyja ŚMI. Adpaviednaje rašeńnie prymaje navat nie sud, a niepasredna sami siłavyja struktury.
Na siońnia viadoma ab prykładna 7000 palityčna matyvavanych kryminalnych spravach, zaviedzienych u Biełarusi paśla 2020 hoda. Ułady Biełarusi adnosiać ich da «złačynstvaŭ ekstremisckaj skiravanaści».
Za pieryjad paśla 2020 hoda adbyłosia kala 45 000 palityčna matyvavanych zatrymańniaŭ. Pavodle niekatorych acenak, kala 70 000 čałaviek pakinuli Biełaruś, ratujučysia ad pieraśledu.
***
«Naša Niva» pakul nie vałodaje infarmacyjaj, što było ŭ čacie «Valejboł pa vychadnych», čamu jon staŭ abjektam uvahi siłavikoŭ. Kali vy viedajecie bolš pra hetuju spravu, pišycie ŭ @nasa_niva_bot.
Čytajcie jašče:
«Niadaŭna pra małako pisaŭ, zaraz pra kałabka…» Palitviazień Dzianis Ivanoŭ piša na «chimii» kazki dla syna
Łatuška pra 30 miljonaŭ jeŭra ad ES: Raniej za raźmierkavańnie adkazvaŭ Jahoraŭ. 33% išło na padtrymku rełakavanaha biznesu3
Kamientary