«Heta było majo pieršaje znajomstva z SBU». Biełarus raskazaŭ, jak dapamahaŭ u zatrymańni ahienta ŭ Kijevie
U Kijevie zatrymali miascovaha žychara, jaki sprabavaŭ padpalić mašynu pad padjezdam adnoj z hramadskich arhanizacyj. SBU zajaviła, što heta biełaruski ahient, jaki i raniej ładziŭ pravakacyi. «Našaj Nivie» stali viadomyja padrabiaznaści hetaj śpiecapieracyi.
Zatrymańnie adbyłosia pozna ŭviečary ŭ aŭtorak. Da Hleba, jaki žyvie akurat u domie, kala jakoha ledź nie padpalili mašynu, paśla pryjšoŭ čałaviek z SBU.
«Jon raspytvaŭ, ci pražyvaje pa hetym adrasie taki čałaviek, pakazvaŭ dakumienty i ŭsio astatniaje. Ničoha dakładnaha nie skazaŭ: prosta chtości pabiŭsia, byŭ zachop pa spravie chulihanstva, — raskazvaje biełarus. — Heta było majo pieršaje znajomstva z SBU. Ja spužaŭsia, zabyŭsia pahladzieć, jak tam imia i proźvišča čałavieka, jaki pryjšoŭ. Na nastupny dzień jany mnie pazvanili sami i raskazali bolš infarmacyi.
Pa ich słovach, heta chłopiec z Ukrainy, jaki šukaŭ padpracoŭku. Jon farbavaŭ dźviery, viešaŭ ściahi čyrvona-zialonyja na ŭsialakich hramadskich arhanizacyjach. Jany taksama skazali, što jon rabiŭ štości kala Biełaruskaha doma, zajmaŭsia «cicharyzmam» — to-bok jaho naniali zdymać na kamieru ludziej na mitynhach u Kijevie.
Ja pražyvaju ŭ budynku, jaki značycca jak adras rehistracyi adnoj dabračynnaj arhanizacyi biełarusaŭ u Kijevie. U taho čałavieka było zadańnie pryhnać siudy mašynu (jon kupiŭ niejkuju staruju z ukrainskimi numarami), praz try dni pryjści, ablić jaje bienzinam i padpalić. Paśla hetaha musiŭ zrabić fatahrafiju ci videa i dasłać aktyvistam z paznakaj: «Vy nastupnyja».
Za heta jamu abiacali sto tysiač hryvien (kala $3500, — «NN»). SBU za im sačyła, uziała jaho paśla taho, jak jon abliŭ mašynu dźviuma kanistrami bienzinu».
Nakolki Hlebu viadoma, raniej taho čałavieka pryciahvali da adkaznaści, naprykład, za kradziež u kramie butelki kańjaku.
Na videa, apublikavanym SBU, jon pryznajecca, što pa zadańni kurataraŭ fatahrafaŭ pad vajenkamatam Žytomira mašyny, jakija tam stajali. Pa jaho słovach, prychodzili taksama ŭkazańni zapuścić salut kala ambasady ci zrabić mini-mitynh. Nakiroŭvali taho čałavieka praz ananimnyja telehram-kanały.
SBU paviedamiła, što toj čałaviek taksama datyčny da zapałochvańnia pradstaŭnikoŭ ŚMI i zamiežnych hramadzian. Dla hetaha jon pakidaŭ pahrozy i ładziŭ pravakacyi kala ich damoŭ u Kijevie. Jon taksama źbiraŭ źviestki pra ŭkrainskich vajskoŭcaŭ z pamiežnych rajonaŭ.
Na zatrymanaha zaviali kryminalnuju spravu pa artykułach za dziaržaŭnuju zdradu i terarystyčny akt.
«U SBU skazali, što biełarusy va Ukrainie mohuć adčuvać siabie spakojna, bo z ulikam situacyi na miažy za našymi hramadzianami idzie bolš uzmocnieny kantrol, čym za inšymi zamiežnikami», — dadaje Hleb.
Čytajcie jašče:
SBU: Zatrymany biełaruski ahient, jaki płanavaŭ terakt u Kijevie
Chto toj palitviazień ź Ivanava, jaki vypłaciŭ $600 tysiač kampiensacyi za danaty i ŭsio adno atrymaŭ vialiki termin?3
Chto toj palitviazień ź Ivanava, jaki vypłaciŭ $600 tysiač kampiensacyi za danaty i ŭsio adno atrymaŭ vialiki termin?
«Na praciahu 30 hadoŭ niezaležnaści biełaruskamoŭnyja biuleteni zadavalniali ŭsich». Kamunisty abvinavacili Bondaravu ŭ raspalvańni varožaści na moŭnaj hlebie1616
Kamientary