Łakdaŭny, u adroźnieńnie ad abaviazkovaha našeńnia masak, nie dapamahajuć źnizić śmiarotnaść ad kavidu — novaje daśledavańnie ŭniviersiteta Chopkinsa
Praca ŭniviersiteta Džona Chopkinsa śviedčyć, što łakdaŭny istotna źnizili kolkaść vypadkaŭ kavidu, ale śmiarotnaść upała niaznačna — tolki na 0,2%. A voś zakryćcio restaranaŭ i abaviazkovaje našeńnie masak sapraŭdy dapamahli źnizić śmiarotnaść.
Zhodna z novym daśledavańniem univiersiteta Džona Chopkinsa, łakdaŭny va ŭsim śviecie padčas pandemii źnizili śmiarotnaść ad kavidu ŭsiaho na 0,2%. Takim čynam, jany nie prajavili siabie jak efiektyŭny sposab źmienšyć śmiarotnaść padčas pandemii, piša nationalpost.com.
Važna, što ŭ hetym daśledavańni navukoŭcy vyvučali ŭpłyŭ łakdaŭna vyklučna na pakazčyki śmiarotnaści. Jany nie daśledavali ŭpłyŭ łakdaŭna na kolkaść chvorych ci špitalizavanych.
Zakryćcio navučalnych ustanoŭ i miežaŭ, a taksama abmiežavańnie svabody schodaŭ, jak i łakdaŭny, taksama nie mieli značnaha ŭpłyvu na śmiarotnaść. Naprykład, zakryćcio miežaŭ źniziła śmiarotnaść ad kavidu tolki na 0,1%.
Z ulikam taho, što łakdaŭny majuć i drennyja nastupstvy (naprykład, dla ekanomiki), aŭtary pracy parekamiendavali admovicca ad ich jak ad instrumienta rehulavańnia pandemii.
Jakija ž miery tady akazalisia karysnymi? Navukoŭcy acanili zakryćcio ŭstanoŭ, praca jakich nie źjaŭlajecca žyćciova nieabchodnaj, naprykład, baraŭ. Daśledčyki ličać, što takaja miera, mahčyma, źniziła śmiarotnaść ad kavidu na 10%.
Svaju pracu navukoŭcy zasnavali na analizie inšych daśledavańniaŭ pa temie, u jakich taksama byli cikavyja vysnovy. Tak, adna z tych prac śviedčyła, što zakryćcio restaranaŭ i abaviazkovaje našeńnie masak sapraŭdy dapamahli źnizić śmiarotnaść, ale pry hetym zakryćcio spa-centraŭ nie pryniesła nijakaj karyści.
Zhodna ź inšaj pracaj, jakuju vyvučyli daśledčyki z univiersiteta Chopkinsa, poŭnyja łakdaŭny i chutkaje zakryćcio miežaŭ, mahčyma, dapamahli značna źnizić kolkaść vypadkaŭ kavidu. Adnak hetyja miery čamuści nie paŭpłyvali tak mocna na śmiarotnaść.
Kamientary