Conflict Intelligence Team: Šmat rasijskaj techniki kala Rečycy. Tut niama palihonaŭ, ale blizka da miažy z Ukrainaj
Daśledčaja hrupa Conflict Intelligence Team (CIT) zajaŭlaje, što rasijskija reaktyŭnyja sistemy załpavaha ahniu «Urahan», jak miarkujecca, znachodziacca kala Rečycy. U hetaj miascovaści niama vajskovych palihonaŭ, ale blizka da miažy z Ukrainaj.
Zdahadka CIT zasnavanaja na materyjale ŭ błohu Digital Forensic Research Lab pry ekśpiertnaj hrupie Atlantic Council ab prybyćci rasiejskich vojskaŭ u Biełaruś, fota aŭtara artykuła Majkła Šełdana ŭ Tvitery i tvicie karystalnika @danvan71, jaki hieałacyravaŭ padobny kadr na videa z TikTok na šašy M10 u rajonie prypynačnaha punkta «Ivanaŭka» ŭ 7 km ad Rečycy.
CIT adznačaje, što ŭ hetym rajonie niama palihonaŭ, na jakich pavinny prajści biełaruska-rasijskija vučeńni «Sajuznaja rašučaść», ale adsiul kala 40 km da Čarnihaŭskaj vobłaści i kala 90 km da Kijeŭskaj.
Uličvajučy zajavy krynic CNN ab tym, što, zhodna sa źviestkami vyviedki, Rasieja moža pasprabavać zachapić Kijeŭ i skinuć uładu ŭ Ukrainie, prysutnaść rasijskaj techniki la ŭkrainskaj miažy vyklikaje aściarohi, piša CIT.
«Sprava ŭ tym, što ŭsie asnoŭnyja ŭradavyja budynki ŭ Kijevie znachodziacca na zachodnim bierazie Dniapra, a mahčymy nastup z poŭnačy dazvalaje nie pieraadolvać takuju značnuju vodnuju pieraškodu (u adroźnieńnie ad nastupleńnia z boku rasijska-ŭkrainskaj miažy)», — adznačaje kamanda CIT.
Aŭtary materyjała adznačajuć, što kolkaść rasijskich vojskaŭ na poŭnač ad Kijeva dakładna nieviadomaja, bo častka vojskaŭ prajšła da miescaŭ praviadzieńnia vučeńniaŭ.
«Na dadzieny momant nam zdajecca vierahodnym, što meta hetaha zasiarodžvańnia — prymusić ukrainskaje kamandavańnie trymać častku siłaŭ na zachodnim bierazie Dniapra dla prykryćcia Kijeva, što abmiažuje mahčymaści supraćdziejańnia patencyjnaj rasijskaj apieracyi na ŭschodzie Ukrainy», — ličać u CIT.
Kamientary