Stukačy, miantoŭskija prakładki, ssučanyja. Sańnikaŭ apublikavaŭ post, u jakim dastałasia ŭsim: «Našaj Nivie», Cichanoŭskaj, navat Šrajbmanu

U svaim poście Sańnikaŭ narakaje na toje, što historyja Płoščy 2010 hoda była «pierapisanaja», pryčym «nie z dapamohaj tych ubohich kinošak i artykułaŭ prydvornych miedyja, maŭlaŭ na Płošču vyjšła kupka zmoŭščykaŭ, a puściŭšy ŭ chod mocna źbityja falšyŭki, jakija raspaŭsiudžvali praz «niezaležnyja» kanały».

«Jašče znachodziačysia pad śledstvam u turmie KDB, ja čuŭ cytaty z presy ab tym, što my ŭsio zrabili nie tak. Što padstavili ludziej, što zhulali na ruku Maskvie (pa viersii tych ža «niezaležnych», ja byŭ pramaskoŭskim kandydatam), što kinuli pad dubinki dziaciej, što pazbavili Biełaruś spakojnaha «evalucyjnaha» šlachu (heta pry dyktatury!). I śledaki, i kiraŭnictva KDB cytavali zusim nie «Savieckuju B.», košt materyjałaŭ jakoj viadomy, a «Radyjo Svaboda», «Biełhazietu», «Salidarnaść» i asabliva časta «Našu Nivu».

Na pytańni zekaŭ, čamu svaje topiać svaich, Sańnikaŭ adkazvaŭ tłumačeńniami, i jaho adkaz zeki nibyta razumieli, bo, udakładniaje Sańnikaŭ,

«sistemu stukačoŭ, danosaŭ, miantoŭskich prakładak i ssučanych vydatna viedali».

Sańnikaŭ znoŭ piša, što ŭ 2010 hodzie ŭ jaho byŭ płan, chacia nie raskryvaje jaho. Ale tyja, chto čuŭ hety płan, nibyta «ŭzdychali i kryŭdavali, što znoŭ nie vysłuchali načalnika transpartnaha cecha». To-bok Sańnikava tady nie pačuli.

Jak mieŭ racyju jon i napiaredadni 2020 hoda, u adroźnieńnie ad usich astatnich.

«Napiaredadni, prykładna z pačatku 2019 hoda da krasavika 2020-ha, pieravažnaja bolšaść tych samych «niezaležnych» srodkaŭ zvykła paŭtarała: ničoha nie budzie, Łukašenka ŭsio kantraluje, apazicyja źniščanaja, usio zastaniecca pa-raniejšamu. Heta paŭtarali amal usie takija ž «niezaležnyja» analityki. Ich praniklivyja analizy zvodzilisia da takich voś hłybakadumnych dumak, jak, naprykład, u Arcioma Šrajbmana: «Apazicyja ŭ Biełarusi pa zmaŭčańni (sic!) nie maje šancaŭ na pieramohu».

U adroźnieńnie ad usich astatnich, Sańnikaŭ i jaho kamanda ŭsio pradbačyli. I nie tolki pradbačyli, ale i nablizili vybuch 2020 hoda, śćviardžaje aŭtar.

«My nie prosta viedali, što ŭ 2020-m adbuducca masavyja chvalavańni, a ŭ svajoj stratehii zychodzili z hetaha. Inšymi słovami, z 2017 hoda my aktyŭna rychtavali hod 2020-ty», — piša Sańnikaŭ.

Ščodra prajšoŭsia były kandydat u prezidenty pa Cichanoŭskaj i jaje štabie.

«Paśla dnia vybaraŭ vakoł Cichanoŭskaj stali adbyvacca niezrazumiełyja rečy, u tym liku jaje adjezd ź Biełarusi praz CVK i śpiecsłužby.

Paśla zjaŭleńnia Cichanoŭskaj u Vilni na jaje stali nalipać dziŭnyja asoby, jakija siońnia i kirujuć tak zvanym ofisam Cichanoŭskaj pry jaje, zrazumieła, padtrymcy».

«Vilenski ofis vielmi chutka arhanizavaŭ svaju dziejnaść tak, kab kamfortna isnavać samim jaho žycharam i źvieści da minimumu pahrozu režymu Łukašenki».

Hledziačy na ŭsio heta, Sańnikaŭ prahnazuje takoje raźvićcio padziej: «Skłałasia ŭ mianie ŭstojlivaje adčuvańnie, što takija lidary buduć rabić usio, kab spuskać situacyju na tarmazach. Buduć zajmacca razmnažeńniem bieskarysnych inicyjatyŭ, źbirać nikomu nie patrebnyja virtualnyja hałasy ŭ padtrymku siabie, pryznačać i pierapryznačać vybary, pisać niepatrebnyja kanstytucyi, abjaŭlać virtualnyja amnistyi, padstaŭlać ludziej u Biełarusi praz zum-razmovy, jakija zapisvajucca hebnioj. A jašče duryć hałovy zachodnim palitykam šalonymi pražektami i niazbytnymi abiacańniami».

Sańnikaŭ abiacaje paźniej abnarodavać svoj płan dziejańniaŭ.

Andrej Sańnikaŭ — eks-kandydat u prezidenty 2010 hoda, kaardynatar hramadzianskaj kampanii «Jeŭrapiejskaja Biełaruś». Byŭ zatrymany padčas mitynhu suprać vynikaŭ prezidenckich vybaraŭ 19 śniežnia 2010 hoda ŭ Minsku. Jamu było vystaŭlenaje abvinavačvańnie ŭ arhanizacyi masavych biesparadkaŭ. 14 maja 2011-ha jaho prysudzili da 5 hadoŭ pazbaŭleńnia voli ŭ kałonii ŭzmocnienaha režymu. 14 krasavika 2012 hoda Sańnikaŭ byŭ vyzvaleny pavodle ŭkaza Łukašenki ab pamiłavańni. U kastryčniku 2012 hoda atrymaŭ palityčny prytułak u Vialikabrytanii.

• 1
• 0
• 1
• 0
• 0
• 0