Ułady PAR abviaścili ab źmiakčeńni abmiežavańniaŭ. Pra heta havorycca ŭ zajavie na sajcie ŭrada krainy.
Urad paviedamlaje, što za tydzień z 19 pa 25 śniežnia ŭ krainie vyjavili 89,7 tysiačyy vypadkaŭ zaražeńnia kavidam, u toj čas jak tydniem raniej hety pakazčyk pieravyšaŭ 127 tysiač. «Usie pakazčyki śviedčać ab tym, što kraina, mahčyma, pieraadoleła pik čaćviortaj chvali na nacyjanalnym uzroŭni», — havorycca ŭ zajavie.
Zachvorvalnaść skaraciłasia va ŭsich rehijonach krainy, za vyklučeńniem Zachodnie-Kapskaj i Uschodnie-Kapskaj pravincyj.
Va ŭradzie PAR padkreślili, što pakazčyki špitalizacyi padčas vyklikanaj «amikronam» chvali byli nižejšyja, čym padčas papiarednich chval.
U suviazi sa źnižeńniem zachvorvalnaści ŭ krainie admianili kamiendanckuju hadzinu, zhodna ź jakoj, na vulicu nielha było vychodzić z poŭnačy da čaćviortaj ranicy, i źmiakčyli šerah inšych abmiežavańniaŭ.
Novy štam karanavirusa «amikron» upieršyniu vyjavili ŭ Paŭdniovaj Afrycy ŭ kancy listapada, nieŭzabavie SAAZ prysvoiła jamu status — «vyklikaje aściarohi». Navukoŭcy papiaredžvali, što novy štam moža być mienš usprymalny da vakcyn i antyciełaŭ, adnak chvaroba nibyta praciakaje ŭ bolš lohkaj formie.
Kamientary