U Karei pamiłavali eks-prezidentku, asudžanuju na 20 hadoŭ za karupcyju. Tam heta ŭžo amal tradycyja
Pak Kyn Chie, jakaja była prezidentkaj Karejskaj Respubliki u 2013—2017 hadach, pamiłavanaja karejskimi ŭładami. U źniavoleńni jana była z sakavika 2017-ha.
Los Pak Kyn Chie dla bolšaści inšych krain byŭ by pakazalnym i pavučalnym. Ale dla jaje radzimy jon chutčej typovy. Paŭdniovaja Kareja admietnaja tym, što tam mała jaki prezident nie padviarhaŭsia paśla zakančeńnia svaich paŭnamoctvaŭ kryminalnamu pieraśledu za karupcyju.
U siaredzinie 1990-ch na łavie padsudnych za karupcyju i chabarnictva apynulisia adrazu dva byłyja prezidenty — Čon Du Chvan (1980—1988) i Ro De U (1988—1993). Akramia karupcyi, ich jašče abvinavacili va ŭzbrojenym zachopie ŭłady i zadušeńni pratestaŭ. Za heta Čon Du Chvan spačatku byŭ prysudžany da śmiarotnaha pakarańnia, a Ro De U — da 23 hadoŭ źniavoleńnia. Ale ŭrešcie jany, možna skazać, abyšlisia lohkim pierapudam, bo nieŭzabavie terminy im pamianiali na bolš miakkija, a ŭ 1998 hodzie ŭvohule amnistavali.
Nastupnyja dva prezidenty, Kim Jon Sam i Kim De Čžun, u turmy paśla prezidenctva nie trapili, choć abvinavačvańni ŭ karupcyi nie minuli i ich. Syn Kim Jon Sama navat byŭ na niekalki hadoŭ asudžany. Paźbieh suda dy źniavoleńnia i nastupny prezident, No Mu Chion (2003—2008), ale tolki tamu, što ŭ 2009 hodzie, kali jaho źbiralisia aryštoŭvać, skončyŭ žyćcio samahubstvam, saskočyŭšy z vysokaj skały.
A voś nastupnik No Mu Chiona i papiarednik pamiłavanaj Pak Kyn Chie, Li Mion Bak (2008-2013) u 2018 hodzie byŭ aryštavany i asudžany na 17 hadoŭ źniavoleńnia za chabarnictva, rastraty i złoŭžyvańnie ŭładaj. I ciapier znoŭ siadzić, choć raniej na paŭtara hoda byŭ vyzvaleny pa stanie zdaroŭja.
Takim čynam, šlach z prezidenckaha pałaca ŭ turmu dla Paŭdniovaj Karei staŭ užo amal tradycyjnym.
Za apošnija 40 hadoŭ ź siami byłych prezidentaŭ Paŭdniovaj Karei apynulisia za kratami čatyry, a adzin skončyŭ žyćcio samahubstvam.
Praŭda, prysudžanyja im strašnyja sudovyja terminy na spravie, jak praviła, akazvajucca bolš simvaličnymi, bo pakul što nichto nie adsiedžvaŭ navat traciny.
Šmatdzietnaja maci Volha Załatar vyjšła na svabodu, całkam adbyŭšy čatyrochhadovy termin6
Kamientary