Stanisłaŭ Šuškievič: U mianie jość aptymizm

— Ja ŭ zachapleńni ad našych lekaraŭ, miedykaŭ. U nadzvyčaj ciažkich umovach, va ŭmovach pandemii jany samaaddana pracujuć. Samomu daviałosia znachodzicca ŭ špitalach, i žonka časta byvała ŭ paliklinicy. Ceły dzień miedyki ŭ maskach, u «skafandrach». Takich addanych svajoj spravie ludziej ciažka znajści.

Choć kavid — biada ahulnaja. Možna było lepiej ź joj zmahacca, ale kiraŭnictva krainy naohuł chacieła zmahacca traktaram i sportam. U tych umovach, što jość, miedyki śviata trymajucca klatvy Hipakrata. Biełaruś moža hanarycca svaimi lekarami.

Druhoje, što raduje: u Biełarusi źjavilisia lidary — nie biazhłuzdyja, jak našy hałoŭnyja kiraŭniki, nie tyja, što pracujuć pavodle pryncypu: «Ja načalnik, ty durań». Adkul zjaviłasia žančyna, jakaja viedaje zamiežnyja movy, jakaja prymajecca prezidentami zamiežnych krain?! Heta vielmi važna, što takija lidary zjaŭlajucca ŭ Biełarusi — hramatnyja, razumnyja, z abhruntavanaj pazicyjaj, palitałahičnaj śviadomaściu. Ja vielmi zachaplajusia hetaj žančynaj, jaje abajańniem, mužnaściu, rozumam.

Raduje toje, što jość u nas piśmieńniki, jakija zajmajucca histaryčnymi prablemami. Ja ź imi siabruju, jany dasyłajuć mnie ŭ elektronnaj formie svaje novyja knižki, tvory, daśledavańni. Šmat pišuć, dobra pišuć, zajmalna pišuć — čytać chočacca dalej. I daskanała viedajuć historyju. Ja prosta dziŭlusia, što možna padać historyju Biełarusi jak mastacki tvor! Ale voś nie mahu nazvać publična ich proźviščy — bo ŭ ich mohuć uźniknuć prablemy.

Na žal, naša dziaržava pabudavanaja pavodle pryncypu dziaržaŭnaha teraryzmu. I Dekłaracyja Arhanizacyi Abjadnanych Nacyj ab dziaržaŭnym teraryźmie 1987 hoda heta ŭsio tłumačyć. Ciapier heta ŭ nas u samym čystym vyhladzie. Ale ž heta było i ŭ Savieckim Sajuzie — tam taksama kiravaŭ strach. Ale tut jon doŭha panavać nie budzie, tamu što heta ŭžo niemahčyma. Kali Amnesty International pryznała palitźniavolenymi amal tysiaču biełarusaŭ — to što heta za dziaržava? Heta bandyckaja kraina i prymityŭnaje kiraŭnictva! Heta vajaŭničaje nievuctva. I heta pačynajecca ad našaha nielehitymnaha kiraŭnika.

Ułada ŭ nas zachvareła na narkamaniju. Ułada — heta dla ich narkotyk.

Zaŭvažcie: amierykanski kiraŭnik moža być prezidentam 2922 dni. I ni na adzin dzień bolš. A ŭ nas Łukašenka ŭžo ŭ 3,5 raza bolš! A što jon dobraha zrabiŭ? Pa asnoŭnych pakazčykach u Jeŭropie Biełaruś na apošnim miescy. Heta doŭha praciahvacca nie moža. Ludzi bačać, jak žyvuć palaki, jak žyvuć litoŭcy — heta zusim inšaje žyćcio. I tak doŭha ŭ Biełarusi ŭžo praciahvacca nie budzie.

Na žal, ja ŭžo nie mahu ŭdzielničać u tym, što chacieŭ by rabić. Ja ŭžo pieraŭzyšoŭ siaredniestatystyčny ŭzrost biełarusa — mnie 87.

Pavialičyć

U mianie jość zaprašeńni ŭ Harvard, u Jelski ŭniviersitet, u Kiembrydž, u Oksfard — ź lekcyjami ŭ hibrydnaj formie, z pajezdkami. Ja nie zmoh palacieć u Vienu — drenna adčuvaŭ siabie.

Ale ŭ mianie jość aptymizm. Ja pierakanany, što nam nakanavana losam: naša moładź pavinna žyć u narmalnaj, śvietłaj, dastojnaj, demakratyčnaj Biełarusi. Jana, mnie zdajecca, hetaha zasłuhoŭvaje. I idzie hetym šlacham.

«Pietryšenka pień. Sieviaryniec idzie na horku. A pra masonstva ničoha nie skažu». Vialikaja hutarka z Šuškievičam pierad jaho 85-hodździem

Čytajcie taksama:

Śviatłana Aleksijevič raskazała, što pabačyła dobraha ŭ 2021-m

Žurnalist Andrej Alaksandraŭ ź SIZA: Ja nie rasčaravaŭsia ŭ nivodnym čałavieku

• 0
• 0
• 0
• 0
• 0
• 0
• 0
• 0