«Doktar paćvierdziŭ rak». Jakija naviny ŭ spravie zatrymanych pa «zamachu» na Łukašenku?
Advakata Jurasia Ziankoviča, litaraturaznaŭcu Alaksandra Fiadutu i staršyniu Partyi BNF Ryhora Kastusiova zatrymali viasnoj u miežach spravy pa «zamachu» na Łukašenku i členaŭ jaho siamji. Usie jany źjaŭlajucca abvinavačanymi pa kryminalnym artykule 357 («Zmova abo inšyja dziejańni, ździejśnienyja z metaj zachopu dziaržaŭnaj ułady»). Palitykam pahražaje ad 8 da 12 hadoŭ źniavoleńnia.
Film-rasśledavańnie «Zabić prezidenta» z padrabiaznaściami spravy ANT vypuścili jašče ŭ krasaviku, ale jana pakul staić na miescy, choć śledčyja dziejańni pa joj i skončyli. Spytali ŭ svajakoŭ zatrymanych, ci jość niejkija naviny pra datu suda i jak siabie adčuvajuć źniavolenyja.
«Vielmi chočacca, kab blizki čałaviek daŭ chvarobie rady»
Infarmacyja pra paharšeńnie stanu zdaroŭja kiraŭnika partyi BNF Ryhora Kastusiova źjaviłasia vosieńniu: u jaho byli padazreńni na ankałohiju. Akramia taho, jon pieranios za kratami kavid i infarkt.
Palityka pieraviali ź SIZA KDB u turemny špital SIZA na Vaładarskaha. Svajakam doŭha nie kazali pra vyniki bijapsii. U vyniku dačka Ryhora Kaciaryna pryjšła na razmovu da doktara sama.
«Ja pryjšła da doktara i, choć i na słovach pakul, ale jon mnie paćvierdziŭ dyjahnaz. U baćki rak prastaty. Paśla hetaha z adnaho boku stała bolš tryvožna: vielmi chočacca, kab blizki čałaviek daŭ chvarobie rady. Ale ciapier choć źjaviłasia niejkaja vyznačanaść, i z punkta A možna ruchacca ŭ punkt B, prymać niejkija miery», — raskazvaje Kaciaryna Kastusiova.
U suviazi z pačaŭšymisia prablemami z mačavym, palityku treba budzie zrabić jašče niekalki UHD, atrymać kansultacyju ŭrołaha — i tam užo budzie bačna, jakoje lačeńnie pryznačać.
«Na dniach u baćki była advakat. I što mianie raduje, dyk heta toje, što nastroj u jaho badziory, jon bolš aptymistyčna nastrojeny, a heta ŭžo niamała», — dadaje Kaciaryna.
Z navinaŭ, jakija dačka jašče viedaje pra baćku, — toje, što jamu zabaranili ŭziać z saboj pled i televizar.
«My jašče žartavali: a jak biez televizara palitinfarmacyju da zatrymanych danosić? A jašče viedaju, kali ich niadaŭna chacieli vyvieści na špacyr, to vyzvalisia tolki dva čałavieki, tamu što vychad zatapiła vadoj niasłaba, i treba było iści praź jaje. Skazali, što inšaj darohaj nielha iści. Absurdnaja reč, kaniečnie. Zdavałasia b, takoha ŭ XXI stahodździ być nie pavinna».
Termin utrymańnia Kastusiovu praciahnuli na čarhovyja dva miesiacy — da lutaha 2022 hoda. Chadajnictvy ab źmienie miery ŭtrymańnia na chatni aryšt praz stan zdaroŭja da hetaha ŭvieś čas zastavalisia biez zadavalnieńnia.
«Z Vaładarki pakul nie dajšło nivodnaha lista»
U Alaksandra Fiaduty termin utrymańnia pad vartaj taksama praciahnuty: na dadzieny momant da 12 śniežnia. Žonka Maryna Šybko ŭpeŭnienaja, što jon budzie praciahvacca i dalej.
«Sprava idzie da zaviaršeńnia, artykuł usio toj ža — častka pieršaja 357-ha. Ale kali budzie sud, jašče nieviadoma. Śledčych dziejańniaŭ nie pravodziłasia ź listapada».
Apošni list Maryna atrymała taksama ŭ listapadzie, jašče z «amierykanki». Ź SIZA na Vaładarskaha, dzie palityk znachodzicca ciapier, pakul nie dajšło nivodnaha lista.
«U apošnim liście muž pisaŭ pra litaraturaznaŭcu Maryetu Čudakovu. Jana niadaŭna pamierła, a AIF (Alaksandr Iosifavič Fiaduta — Zaŭv. red) byŭ znajomy ź joj: jany razam byli na kanfierencyi pa Bułhakavu ŭ Kijevie: «Heta była dziŭnaja kabieta, poŭnaja enierhii stvareńnia.» Pisaŭ taksama, što hulajuć z sukamiernikami ŭ nardy. Zhadvaŭ Piatra Marcava i ŭsiu redakcyju tahačasnaj «BDH»».
«Na siońnia kažuć pra mahčymy sud u studzieni-lutym»
Žonka Jurasia Ziankoviča admoviłasia ad kamientaroŭ, ale jaho znajomyja i paplečniki pa partyi kažuć, što situacyja ŭ jaho takaja ž, jak i ŭ zatrymanych ź im pa adnoj spravie Fiaduty i Kastusiova. Ën prosta isnuje ŭ čakańni suda.
«Ź listami sprava zusim drennaja. Z tych, kaho ja viedaju, nichto ad jaho ničoha nie atrymlivaŭ», — prakamientavaŭ adzin z členaŭ partyi BNF.
Prablemy ź listavańniem adznačajuć i inšyja svajaki:
«Juraś sam listoŭ praktyčna nie atrymlivaje. Ad jaho da baćkoŭ taksama ich mała. Ale pačuvajecca jon bolš-mienš. Toje paćviardžaje i advakat (kali kazać pra fizičny stan). Śledstva idzie, i na siońnia kažuć pra mahčymy sud u studzieni-lutym».
Ci pryznajuć Fiadutu, Kastusiova i Ziankoviča palitviaźniami? Tłumačyć pravaabaronca
Viarnuŭsia z vajny, uładkavaŭsia ŭ Varšavie, pasvaryŭsia z usimi — i źnik. Pryjacieli pra eks-kalinoŭca Maksima Ralko, jakoha zatrymali ŭ Biełarusi1818
Kamientary