Urad pryniaŭ pastanovu ab sankcyjach: u «čorny śpis» patrapiła miasa, małako, kandytarka i sadavina ź ES, ZŠA i Kanady. Što heta značyć?
Saviet Ministraŭ Biełarusi pryniaŭ pastanovu №700 «Ab prymianieńni śpiecyjalnych mier u dačynieńni da asobnych vidaŭ tavaraŭ». U hetaj pastanovie vyznačyli peŭnyja katehoryi tavaraŭ, zabaronienyja da ŭvozu i realizacyi ŭ Biełarusi z krain ES, ZŠA, Kanady, Narviehii, Ałbanii, Isłandyi, Paŭnočnaj Makiedonii, Złučanaha Karaleŭstva, Čarnahoryi i Šviejcaryi.
Pastanova №700 Saviet Ministraŭ pryniaŭ 6 śniežnia hetaha hoda. Jak napisana ŭ samim dakumiencie, jaje pryniali, kab «zabiaśpiečyć abaronu nacyjanalnych intaresaŭ Respubliki Biełaruś».
Što nielha budzie ŭvozić?
Śpis zabaronienych tavaraŭ dosyć šyroki i vyhladaje tak:
- žyvyja śvińni,
- miasa bujnoj rahataj žyvioły (BRŽ), śviežaje, achałodžanaje, zamarožanaje,
- śviežaja, achałodžanaja i zamarožanaja śvinina,
- subpradukty BRŽ i inšych žyvioł,
- miasa i charčovyja subpradukty chatniaj ptuški,
- salonaje miasa, sušanaje i vendžanaje, charčovaja muka ź miasa i miasnych subpraduktaŭ,
- małako i małočnaja pradukcyja, za vyklučeńniem biezłaktoznaj pradukcyi,
- harodnina, za vyklučeńniem pasiaŭnoha materyjału,
- frukty i arechi,
- tłušč śviniej, ptuški, BRB, aviečak i koz, lard-stearyn i inšyja žyviolnyja masła,
- kaŭbasy i anałahičnyja pradukty,
- kandytarskija vyraby (akramia kakava-parašku),
- sol,
- inšyja charčovyja pradukty (kody TN ZED 1901 90, 2106 90).
Zabarona nie zakranaje tavary dla asabistaha spažyvańnia, dziciačaha charčavańnia i krytyčnaha impartu.
Kali pačnie dziejničać zabarona?
Pastanova budzie dziejničać na praciahu 6 miesiacaŭ z 1 studzienia 2022 hoda.
Ciapier z palic uvieś impart buduć zdymać?
Nie. Pastanova nie raspaŭsiudžvajecca na tavary, što byli ci buduć uviezienyja da 1 studzienia 2022 hoda, kali jano ŭstupić u siłu.
Chto moža ŭvozić «sankcyjonku»?
Zvyčajnyja ludzi, kali viazuć z-za miažy niešta dla asabistaha spažyvańnia. Vytvorcy dla pierapracoŭki ŭ miežach śpiecyjalnych kvot.
A što budzie zamiest zabaronienych tavaraŭ?
Saviet Ministraŭ u svajoj pastanovie patrabuje ad Ministerstva sielskaj haspadarki, «Biełdziaržcharčprama», abłvykankamaŭ i Minharvykankama zabiaśpiečyć «nasyčeńnie ŭnutranaha rynku šyrokim asartymientam charčovaj pradukcyi vytvorčaści Respubliki Biełaruś».
Miž tym cikava, što zhodna z pastanaŭleńniem, MARH i Ministerstva sielskaj haspadarki buduć ustaloŭvać śpiecyjalnyja kvoty na asobnyja vidy tavaraŭ, kab «zabiaśpiečyć zbałansavanaść na spažyvieckim rynku».
Vidać, ceny vyrastuć?
Saviet Ministraŭ taksama patrabuje, kab MARH, Ministerstva sielskaj haspadarki i «Biełdziaržcharčpram», a taksama vytvorcy i handlovyja arhanizacyi prytrymlivalisia «ŭstanoŭlenaha paramietra indeksa spažyvieckich koštaŭ».
Chto budzie kantralavać uvoz zabaronienych tavaraŭ i što z rasijskaj miažoj?
Zhodna z dakumientam, na zabaronienyja tavary budzie raspaŭsiudžvacca dziejańnie śpiecyjalnaha dakumienta — pałažeńnia «Ab paradku dziejańnia ŭ dačynieńni da zabaronienych tavaraŭ». Jaho pryniali, kali zabaraniali aŭtamabili Shkoda i pradukcyju Nivea.
U pryvatnaści, na praduktovuju sankcyjonku budzie raspaŭsiudžvacca punkt 2 i raździeł 2.
Dyk voś punkt dva kaža pra toje, što kantralavać uvoz zabaronienych tavaraŭ budzie mytnia. A biełaruska-rasijski ŭčastak miažy buduć patrulavać śpiecyjalnyja «mabilnyja padraździaleńni» mytnikaŭ, milicyi, pamiežnikaŭ, a taksama Ministerstva sielskaj haspadarki i padnačalenyja jamu arhanizacyi.
Ci buduć u Biełarusi źniščać sankcyjonku, jak heta rabili ŭ Rasii?
Raździeł dva pałažeńnia «Ab paradku dziejańnia ŭ dačynieńni da zabaronienych tavaraŭ» bolš miłaserny, čym rasijskaje zakanadaŭstva. Arhanizacyju, što pryviezła zabaronieny tavar, abaviažuć jaho vyvieźci. A za niepadparadkavańnie patrabavańniu słužbovaj asoby pa artykule 24.3 KaAP pahražaje štraf ad 2 da 100 bazavych vieličyń.
Kamientary