Na dźviarach Viciebskaj abłasnoj stancyi pieralivańnia kryvi paviesili abjavu: «U suviazi z adsutnaściu finansavańnia z 29.11.2021 usie vypłaty prypynienyja». Miž tym kroŭ i płazmu ad donaraŭ prymajuć, ale… u doŭh.
My datelefanavalisia ŭ miedustanovu pa telefonie, jaki byŭ ukazany ŭ abjavie. Tam paćvierdzili — heta praŭda, hrošaj na donaraŭ niama.
«Vy ŭžo, napeŭna, dvaccaty čałaviek, jaki patelefanavaŭ da nas z hetym pytańniem, — uzdychnuła miedyk na tym kancy provadu i vielmi vietliva patłumačyła situacyju. — U nas sapraŭdy niama hrošaj, ale heta nie značyć, što kroŭ nielha zdać.
Usim svaim donaram my kažam, što hrošy im zapłaciać adrazu paśla taho, kali adnovicca finansavańnie. Ale kali heta zdarycca, ja nie viedaju.
Ja i nie kampietentnaja ŭ hetym pytańni, kali ščyra, ale nam kažuć, što paciarpieć pryjdziecca adin-dzva tydni. Spadziajusia, što tak i budzie, ale chto ja takaja, kab davać harantyi. Kažu vam toje ž samaje, što i mnie kazali».
«NN»: «Chto-niebudź z donaraŭ ŭžo admaŭlaŭsia ad zdačy kryvi abo płazmy z-za finansavych pierabojaŭ»?
«Čaściej za ŭsie ludzi z razumieńniem staviacca. Nu, viadoma, niekatoryja zasmučajucca. U asnoŭnym tyja, chto ŭvieś čas zdaje kroŭ za hrošy. Bo dla ich donarstva — dadatkovy zarobak. Ale jany ŭsio roŭna zdajuć z nadziejaj, što hrošy ŭsio ž atrymajuć».
Pa słovach miedyka, za zdaču kryvi donaram płaciać prykładna 130 rubloŭ. Za płazmu i jaje kampanienty — ad 150 rubloŭ i vyšej. I kali kroŭ pastajannyja donary zdajuć prykładna raz na try miesiacy, to zdavać płazmu niekatoryja prychodziać dva razy na miesiac.
«Plus płacim amal 30 rubloŭ na adnaŭleńnie sił u dzień zdačy kryvi ci płazmy, vyzvalajem ad vučoby abo pracy, dzie abaviazanyja zachavać jašče i siaredni zarobak, — kaža miedyk i natchniona dadaje. — Ale, viedajecie, siarod našych donaraŭ značna bolš tych, chto prychodzić zdać kroŭ ci płazmu biaspłatna. Jany robiać heta dziela taho, kab dapamahčy chvorym ludziam.
Jość vypadki, kali płazma kryvi pierachvarełaha na kavid čałavieka padymaje na nohi ciažkich pacyjentaŭ. Z kavidam i śmierciu rodnych ad jaho sutyknulisia mnohija našyja donary. Jany viedajuć, jak heta ciažka. Tamu i prychodziać da nas — nie chočuć, kab heta zdaryłasia ź inšymi».
Čytajcie taksama:
«Pryjedzieš u Maskvu, i ciabie sa «Sputnikam» pasadziać na karancin». Vyśviatlajem, čamu Rasija nie pryznaje svaju ž vakcynu
«Ja pryjechała ŭ 4:50 i była ŭ čarzie 77-ja». Jak ryełtarka nabyvała dla siabroŭki kvateru ŭ elitnym ŽK Minska9
Kamientary