Maci piaciarych dziaciej Volhu Załatar prysudzili da čatyroch hadoŭ kałonii

Załatar nie pryznała svaju vinu i na sudzie zajaŭlała, što jaje źbivali paśla zatrymańnia. Śledčy kamitet na heta zajaviŭ, što «zajavy Załatar ab pryčynieńni joj cialesnych paškodžańniaŭ nie adpaviadajuć rečaisnaści, pakolki jany mieli miesca da jaje zatrymańnia»

Prakuror Žanna Baranava zapatrabavała dla Volhi piać hadoŭ kałonii. 

U svaim apošnim słovie na sudzie Volha Załatar skazała: «Majo serca rviecca na častki, bo hradus nianaviści raście, pavialičvajecca kolkaść bolu i kryŭdaŭ. Nieabchodnaje pakajańnie i ŭzajemnaje prabačeńnie. Tolki tak mahčyma spynić hramadska-palityčny kryzis u krainie. U materyjałach spravy maim dziejańniam nadadzieny sens, jaki ja nie mieła na ŭvazie. Zvyčajnyja čałaviečyja ŭčynki, reakcyi i pačućci kryminalizavanyja. U materyjałach spravy jość fota płakata, na jakim napisana «Mir. Luboŭ. Svaboda». I ja padpisvajusia pad kožnym słovam. Ja chaču mira dla svajoj rodnaj krainy».

***

Volha Załatar była zatrymanaja 18 sakavika supracoŭnikami HUBAZiKa, kali viezła dačku ŭ muzyčnuju škołu, zatym prajšoŭ pieratrus dadomu, paśla hetaha advieźli jaje ŭ centralny ofis upraŭleńnia, dzie pa jaje słovach, jaje katavali, prymušajučy pradastavić dokazy suprać siabie. Pad ciskam žančyna skazała parol ad mabilnaha telefona i «Telehrama». Ale navat paśla hetaha da jaje prymianiali hvałt. 

Volha Załatar była naziralnicaj na vybarach u 2020-m na učastku ŭ Ždanovičach, ale na padlik hałasoŭ čalcy kamisii jaje nie puścili. Paśla razhonaŭ pratestaŭ i žorstkich zatrymańniaŭ žančyna vałancioryła na Akreścina, u sudach, dapamahała zatrymanym i ich siemjam. 

Da kryminalnaha pieraśledu jaje trojčy zatrymlivali pa administratyŭcy, dva razy spravy dachodzili da suda, dzie joj davali vialikija štrafy — pa zakonie, niemahčyma adpravić na «sutki» žančynu, jakaja vychoŭvaje niepaŭnaletnich dziaciej. Dadomu da jaje prychodzili ź inśpiekcyi pa žyllovych umovach, kab acanić, jak žyvuć dzieci.

U vyniku joj pastavili ŭ vinu nastupnyja artykuły Kryminalnaha kodeksa: č. 1 art. 361-1 (stvareńnie ekstremisckaha farmavańnia), č. 1 i 2 art. 342 (navučańnie asob dla arhanizacyi dziejańniaŭ, jakija hruba parušajuć hramadski paradak), č. 1 art. 16 č. 1 art. 342 (dapamahańnie ŭ arhanizacyi dziejańniaŭ, jakija hruba parušajuć hramadski paradak).

Palitźniavolenuju abvinavačvali u tym liku ŭ stvareńni ekstremisckich farmavańniaŭ — telehram-čataŭ «Ždanovičy siońnia», «Ždanoviči 2020 — kłub lubitielej piesien Coja», jakija ŭłady pryznali ekstremisckimi praź siem miesiacaŭ paśla zatrymańnia Volhi. 

Volha nie pryznała vinu ni pa adnym artykule Kryminalnaha kodeksa.

Sacyjalna-palityčny chaos i plaskańnie ŭ dałoni. Što akazałasia ŭ abvinavačvańni šmatdzietnaj maci Volhi Załatar

• 0
• 0
• 0
• 0
• 0
• 0