«Rasija dabivajecca ŭsiaho, čaho chacieła». Ekśpierty, čynoŭnik i siłavik kamientujuć padpisańnie intehracyjnych prahram
Łukašenka siońnia ŭ anłajn farmacie sustreŭsia z Pucinym. Jany padpisali 28 intehracyjnych kart, jakija ciapier nazyvajucca «prahramami». Što tam — nichto nie viedaje i pakul kamientavać nie biarecca. Ale jak uvohule aceńvać vyniki samoj sustrečy?
«Heta sastupka Łukašenki, jaki jašče dva hady tamu nie chacieŭ padpisvać kart»
«Što padpisali, my tak i nie viedajem, miarkujučy pa źlitaj transpartnaj sajuznaj karcie — tam zbolšaha techničnyja dakumienty z masaj detalaŭ ab budučaj harmanizacyi i ŭnifikacyi, — adznačyła akademičny dyrektar BEROC Kaciaryna Barnukova. — Ahułam, da publikacyi dakumientaŭ havaryć składana, ale cyrymanijalnaje padpisańnie adbyłosia.
Heta sastupka Łukašenki, jaki jašče dva hady tamu nie chacieŭ padpisvać kart. Ale i z rasijskaha boku, miarkujučy pa ścisłym źmieście kart, šmat sastupak — nijakich nadnacyjanalnych orhanaŭ nie płanujecca. Pry hetym dystancyjny charaktar padpisańnia nie dazvoliŭ damovicca ab novym kredycie».
«Rasija dabivajecca ad biełaruskich uładaŭ usiaho, čaho jana chacieła, nievialikaj canoj»
«Rasija damahajecca ŭsiaho, čaho jana choča ŭ realizacyi svaich intaresaŭ u Biełarusi. Heta tranzit Biełarusi ŭ Rasiju, pastupovy, ale tranzit, — skazaŭ były dypłamat Pavieł Macukievič.
— Padpisańnie nie značyć, što zaŭtra ŭžo my staniem častkaj Rasii — heta nie ŭ jaje intaresach.
Rasiju zadavalniaje, što farmalna heta niezaležnaja dziaržava, subjekt mižnarodnych adnosin z hołasam u AAN. Ale jana kantraluje tut užo šmat čaho. Pa fakcie my zamykajem klučavyja ekspartnyja pazicyi, jakimi, zaŭvažu, handlujem z trecimi krainami, na Rasii.
U nas užo dva vučebna-bajavyja centry, Łukašenka praciahnuŭ damovy arendy pa vajennych abjektach. Rasija dabivajecca ad biełaruskich uładaŭ usiaho, čaho jaho jana chacieła — pryčym nievialikaja canoj.
Što ad hetaha Biełarusi? Ja b pastaviŭ pytańnie inakš: što ad hetaha Łukašenku. Heta treba jamu, kab dziakujučy rasijskaj padtrymcy ŭtrymałasia jaho ŭłada».
«Hetyja dakumienty nie pryznajucca cyvilizavanymi krainami»
«Biełarusy nie inicyjavali hety praces, biełarusy nie prymali ŭdziełu ŭ abmierkavańni, nie aceńvali hetuju avanturu i nie davali Łukašenku paŭnamoctvaŭ zajmacca pieramovami za svajoj śpinaj, — ličyć daradca Śviatłany Cichanoŭskaj Valer Kavaleŭski. — Tamu padpisańnie hetych dakumientaŭ — jaho pryvatnaja inicyjatyva.
Hetyja dakumienty nie pryznajucca cyvilizavanymi krainami, ich pryznaje tolki Rasija. Ale lubaja padtrymka nielehitymnaj ułady budzie kaštavać tym, chto jaje padtrymlivaje».
«Vyhladaje jak zdrada rešcie svaich prychilnikaŭ»
Na ŭmovach ananimnaści nakont sustrečy Łukašenki i Pucina «Našaj Nivie» vykazalisia taksama dziejny dypłamat i vysokapastaŭleny siłavik ź sistemy MUS.
«Nachilili…. I jak ciapier svaim u vočy hladzieć? Tym, kamu Kačanava dy Siarhiejenka jašče z červienia 2020 raskazvali, jak nas ciśnie Rasija i jak tolki Łukašenka moža hetamu supraćstajać. Heta pierad vybarami jany kazali abmiežavanamu kołu kiraŭnikoŭ siłavych orhanaŭ», — vykazaŭsia dziejny siłavik ź sistemy MUS.
«Faktyčna, Rasija padtrymała asłableny minski režym, kab uzmacnić hieapalityčny kantrol nad Biełaruśsiu, — skazaŭ «Našaj Nivie» dziejny dypłamat. — U toj ža čas padpisanyja 28 prahram achoplivajuć tolki ekanamičnyja pytańni, dzie Biełaruś vyznačyła svaje intaresy zadoŭha da 2020 hoda.
Varta čakać, što pradpryjemstvy dźviuch krain u vyniku buduć pracavać u adnolkavych padatkovych i jurydyčnych umovach. Vyklučeńniem z ekanamičnaj častki źjaŭlajecca pryniaćcie Vajskovaj daktryny hetak zvanaj «Sajuznaj dziaržavy».
Biełaruskich vajskoŭcaŭ možna pavinšavać: jany ciapier faktyčna ŭ adzinaj vajskova-stratehičnaj prastory z Rasijaj, čaho tak nie chacieli siarednija aficery.
Akramia taho, na pasiadžeńni prahučała pryznańnie z boku Łukašenki Kryma jak častki Rasii: paprasicca ŭ Krym — heta de-fakta pryznańnie.
Čas zadać pytańnie: ułady pačali ŭ krainie pahrom, kab u suchim astatku addacca Rasii? Heta vyhladaje jak zdrada rešcie svaich prychilnikaŭ».
«Vialiki absalutna čałaviek». Kola Łukašenka raskazaŭ, što dla jaho baćka i ŭ čym jahonaja apazicyjnaść14
Kamientary