«Možna skazać, što ŭ rasijskaha boku źjaviŭsia peŭny ryčah cisku na Łukašenku». Što značyć intervju Cichanoŭskaj «Echu Moskvy»?
Intervju Śviatłany Cichanoŭskaj radyjo «Echo Moskvy» jašče da vychadu narabiła šumu. Što staić za hetaj uvahaj da biełaruskich demakratyčnych sił? Havorać ekśpierty.
Karbalevič: «Heta nie jość źmiena staŭleńnia Maskvy da biełaruskaj apazicyi»
Jak miarkuje palitołah Valer Karbalevič, heta adzin z elemientaŭ kanfliktu pamiž Minskam i Maskvoj, jaki razhareŭsia apošnim časam.
«Hety kanflikt vyjšaŭ u publičnuju prastoru. Tut i historyja z «Kamsamolskaj praŭdaj», i niepryjezd Pucina na samity Jeŭrazijskaha ekanamičnaha sajuza i SND u Minsk, i adsutnaść sustrečy Łukašenki z Łaŭrovym, kali toj byŭ u Minsku, i źliŭ sacyjałahičnaha apytańnia, praviedzienaha VCIOM u Biełarusi, apytańnia, vielmi niepryjemnaha Alaksandru Łukašenku, i asabisty vypad biełaruskaha telebačańnia suprać Pucina.
Intervju Cichanoŭskaj prosta ŭdar u adkaz. Heta nie jość źmiena staŭleńnia Maskvy da biełaruskaj apazicyi — heta prosta kab naškodzić Łukašenku, začapić jaho», — ličyć ekśpiert.
Samastojnaść «Echa Moskvy» jak miedyja jon nazyvaje adnosnaj, tamu źjaŭleńnie tam u efiry Cichanoŭskaj nie moža być vypadkovym.
«Bo viadoma, chto źjaŭlajecca haspadarom hetaha resursu — «Hazpram». Heta dazvolenaja apazicyjnaść. Praz hety resurs Kreml źlivaje zajavy, jakija nie chacieŭ by rabić naŭprost.
Toj ža Vieniedyktaŭ ahučvaje niejkija rečy, pra jakija dumajuć u Kramli, ale nie hatovy heta publična skazać. Tamu toje, što intervju źjaviłasia mienavita ŭ hety momant abvastreńnia adnosin, nie prosta tak, heta było ŭzhodniena z Kramlom», — razvažaje Valer Karbalevič.
Kazakievič: «Heta moža być vielmi tryvožnym znakam dla Łukašenki»
U intervju «Salidarnaści» dyrektar instytuta «Palityčnaja śfiera» Andrej Kazakievič kaža, što adzin z važnych pasyłaŭ u razmovie byŭ adrasavany Kramlu.
«Adzin z adkazaŭ Cichanoŭskaj, jaki ŭsie abmiarkoŭvajuć, ab tym, što Pucin moža być pasiarednikam u pieramovach pamiž režymam Łukašenki i demakratyčnym hramadstvam Biełarusi.
Pry hetym jana adznačyła, što Rasija moža vystupić pasiarednikam i harantam vyrašeńnia kryzisu, jak i inšyja krainy, — havoryć ekśpiert. —
Ale sama hatoŭnaść pryznać Pucina ŭ jakaści pasiarednika — heta byŭ pravilny miesiedž, uličvajučy toje, što ciapier u adnosinach Kramla i aficyjnaha Minska ŭźnikła niekatoraja napružanaść. Ja dumaju, jon budzie zaŭvažany».
Reakcyja na hety miesiedž, na jaho dumku, moža stać dadatkovym ryčahom u rukach Kramla ŭ adnosinach da Łukašenki.
«Heta moža być vielmi tryvožnym znakam dla Łukašenki. Maskva moža hetym skazać, što, kali ŭ dalejšym u ich buduć prablemy ŭ dasiahnieńni jakich-niebudź damoŭlenaściej, u ich jość taki resurs — mahčymaść kamunikacyi z apazicyjnymi siłami, čaho, viadoma, biełaruskim uładam chaciełasia b paźbiehnuć, — ličyć ekśpiert. — Pazicyja Łukašenki i biełaruskich uładaŭ palahaje ŭ tym, kab całkam ihnaravać najaŭnaść niejkich unutranych palityčnych sił.
I Łukašenka ŭsio robić dla taho, kab usie pytańni vyrašalisia tolki praź jaho. Heta tyčycca nie tolki Maskvy. My bačym, jak Łukašenka demanstruje svaju pazicyju ŭ mihracyjnym kryzisie. Maŭlaŭ, razmaŭlać treba sa mnoj, na roŭnych, i nijakich kantaktaŭ ź jahonymi apanientami.
Kantakt Kramla z demakratyčnymi siłami Biełarusi — heta, sapraŭdy, toje, čaho Łukašenka vielmi baicca. Dumaju, kab hetaha paźbiehnuć, jon sapraŭdy hatovy budzie navat pajści na niejkija sastupki Kramlu.
Kaniešnie, usie karty 4 listapada jon nie padpiša, ale pa asobnych pytańniach, mahčyma, damovicca stanie praściej. Možna skazać, što ŭ rasijskaha boku źjaviŭsia peŭny ryčah cisku na Łukašenku. Jak jany stanuć jaho vykarystoŭvać, u jakuju hulniu dalej budzie hulać Kreml, ubačym».
Čytajcie taksama:
«Pakul aścierahajusia jechać u Rasiju» — Cichanoŭskaja dała intervju radyjostancyi «Echo Moskvy»
Jakija nastupstvy budzie mieć apytańnie, jakoje pakazała, što rejtynh Łukašenki mienšy, čym u Cichanoŭskaj, Babaryki i Kaleśnikavaj?
Takarčuk: Moža, za Jahorava prahałasavać, jaki budzie Łukašenku nohi całavać? Jazyki paadryvać by hetym hałasunam1
Kamientary