Jość pytańnie. Ci treba daviedka ad doktara ŭ škołu, kali dzicia prapuścić tolki 1-3 dni?
Razam z čaćviortaj chvalaj karanavirusa ŭ Biełaruś pryjšła i chvala siezonnych chvarob. U paliklinikach čerhi i tłum, tamu mnohija baćki aścierahajucca vadzić tudy svaich dziaciej. Ale što rabić, kali dzicia prastyła? Ci možna pakinuć jaho doma na paru dzion, prosta papiaredziŭšy nastaŭnicu? Raźbirajemsia.
«Dniami syn krychu prychvareŭ. Pačyrvanieła horła. Vyrašyli z žonkaj, što na paru dzion pakiniem jaho doma. Papiaredziŭ piedahoha ŭ kłasnym čacie, ale taja kateharyčna zapatrabavała ad nas aficyjnuju daviedku ad doktara.
Maŭlaŭ, trymać dzicia doma biez daviedki — niaŭvažnaja pryčyna propusku. Ale heta ž niejki ździek! — aburajecca Mikałaj ź Viciebska. — Škoła patrabuje daviedku, a paliklinika prosić nie vadzić dziaciej lišni raz. Paviadzieš dzicia da ŭčastkovaha z banalnym nasmarkam — dadomu pryviadzieš z kavidam. U paliklinikach ža ciapier natoŭpy chvorych na karanavirus pacyjentaŭ».
Mužčyna dadaje, što ŭ minułym hodzie ŭ škole dziejničali inšyja praviły. Praz zapisku kłasnaj abo zajavu na imia dyrektara možna było paviedamić pra adsutnaść syna na zaniatkach. Dazvalałasia pakidać dzicia na čas da troch dzion.
«Kali nie ačuniaje — tady ŭžo viali da doktara i brali daviedku. Łahična. A ŭ hetym hodzie, akazvajecca, biez daviedki nielha prapuścić ni dnia? Heta naohuł dzieści zamacavana zakanadaŭča?» — pytajecca Mikałaj.
Nastaŭnica: «Z hetaha hoda stali patrabavać daviedki ź luboj nahody»
«Raniej na piedsavietach da kłasnych kiraŭnikoŭ danosili infarmacyju pra mahčymaść troch prapuščanych dzion biez daviedki. Ale i tady heta było rekamiendacyjaj, dakładna nie zakonam, — raspaviadaje piedahoh pačatkovych kłasaŭ adnoj sa staličnych škoł Natalla Uładzimiraŭna. — Z hetaha hoda, miarkujučy pa tym, što mnie raspaviadajuć kalehi ź inšych škoł, stali patrabavać daviedki ź luboj nahody. U našaj škole takoha praviła niama.
Heta značyć, što ŭsio heta — nie bolš jak pierahiby školnaj administracyi. Chutčej za ŭsio korań prablemy ŭ «Rekamiendacyjach pa arhanizacyi adukacyjnaha pracesu va ŭmovach raspaŭsiudžvańnia COVID-19». Jany składzienyja sumiesna Ministerstvam achovy zdaroŭja i Ministerstvam adukacyi i dziejničajuć na praciahu vieraśnia-kastryčnika hetaha navučalnaha hoda.
Ale ŭ rekamiendacyjach nie paznačana, što vučań abaviazany prynieści daviedku ad doktara, kali jon nie byŭ u škole. Tam napisana, što kali ŭ vučnia tempieratura, da ŭrokaŭ jon nie dapuskajecca. Raśpisany taksama ałharytm dziejańniaŭ na vypadak, kali takoje dzicia pryjšło ŭ škołu, jak pravilna vymiarać tempieraturu i inš.
Cikava, što ŭ Kodeksie ab adukacyi kolkaść prapuščanych dzion nie rehłamientujecca. Ale što budzie, kali baćki ŭsio ž pakinuć dzicia doma na try dni biez daviedki? Ci moža pryncypovy nastaŭnik pryznać heta propuskam pa niaŭvažnaj pryčynie? Dzicia z-za hetaha mohuć vyklučyć sa škoły?
«Vyhnać dzicia za propuski nielha, a pakinuć na druhi hod jaho možna tolki, kali jon nie atestavany, — adznačaje nastaŭnica. — Pry hetym zakonnyja pradstaŭniki školnika pavinny prainfarmavać kłasnaha kiraŭnika ab tym, dzie i z kim vučań budzie pravodzić čas padčas svajoj adsutnaści. Daviedka ad doktara patrebna ŭ tym vypadku, kali vučań u pieryjad adsutnaści zachvareŭ».
Juryst: «Rašeńni administracyi škoły mohuć nasić tolki rekamiendacyjny charaktar»
«Jość Kodeks RB ab šlubie i siamji. Pa im siamja i zakonnyja pradstaŭniki dziciaci — u pryjarytecie. Jany majuć prava vybirać mietady, formy vychavańnia i adukacyi svajho dziciaci. Prostymi słovami, u situacyi, jakaja skłałasia, administracyja škoły moža tolki rekamiendavać prynieści zajavy pa ŭstanoŭlenym uzory, ale nie patrabavać.
Rasparadžeńni i zahady administracyj škoły majuć jurydyčnuju siłu, ale pa statusie jany nižejšyja za zakony Respubliki Biełaruś, — kamientuje juryst Alena Sałaŭjova. — Žyćcio i zdaroŭje dziciaci — hałoŭny pryjarytet. Razvažajem tak: u dziciaci jość prava na žyćcio, zdaroŭje i prava na adukacyju.
U dadzienaj situacyi žyćcio i zdaroŭje važniejšyja za adukacyju. Heta značyć, što rašeńnie ab praciahłaści karancinu kožny z baćkoŭ moža prymać indyvidualna. Dyktavać im niejki kankretny termin mahčymaj adsutnaści ŭ škole niezakonna».
Ajcišnik z EPAM, jaki žyvie ŭ ZŠA, naviedaŭ Biełaruś. Ciapier jamu pahražaje da siami hadoŭ kałonii2
Kamientary