PandaDoc acenieny minimum u $1 młrd — ciapier heta kampanija-adnaroh
Startap PandaDoc ź biełaruskimi karaniami zaviaršyŭ inviestraŭnd C. Dakładnaja suma inviestycyj nie raskryvajecca. Pa vynikach raŭnda kampanija aceńvajecca jak minimum u miljard dalaraŭ. Ab hetym paviedamlaje Techcrunch. PandaDoc staŭ pieršym adnaroham z faŭndarami-biełarusami. Paniaćcie «kampanii-adnarohi» ŭ 2013 hodzie prydumała zasnavalnica Cowboy Ejlin Li. Jano prymianiajecca da kampanij, košt jakich aceńvajecca bolš čym u $1 młrd.
Raŭnd uznačalili OMERS Growth Equity i G Squared. Taksama ŭdzielnikami raŭnda vystupili Altos Ventures, Rembrandt Venture Partners, One Peak Partners i vienčurnaje padraździaleńnie Microsoft M12.
— My płanujem pašyrać i pahłyblać tyja vobłaści, u jakich my ŭžo pracujem. Taksama płanujem vyjści na suśvietny rynak u hetym hodzie i inviestavać u łakalizacyju i mižnarodny rost, — zajaviŭ zasnavalnik kampanii Mikita Mikada.
Pavodle infarmacyi Techcrunch, klijenty PandaDoc ciapier raźmiaščajucca prykładna ŭ 130 krainach. Za apošni hod baza karystalnikaŭ kampanii vyrasła na 80%, vyručka — na 63%.
Faŭndary PandaDoc — Siarhiej Barysiuk i Mikita Mikada.
Zasnavalnik PandaDoc Siarhiej Barysiuk prakamientavaŭ u Fejsbuku navinu pra toje, što kampanija pryciahnuła inviestycyi i stała adnaroham:
— Siońnia vialiki dzień dla PandaDoc.
My pačali pracavać jašče ŭ 2011 hodzie. Nievialikaja kamanda ź Biełarusi biez dośviedu pracy z B2B SaaS. Na samaj spravie praktyčna biez dośviedu. My źmiašali zapał, bačańnie i pradprymalnickija zdolnaści Mikity z majoj cikavaściu da inžynirynhu i dyzajnu.
Nam vielmi pašancavała dadać novaha adnaroha, stvoranaha biełarusami, u śpis 0,7% kampanij, jakija vyjšli na hety ŭzrovień.
Sama kampanija łakalizujecca ŭ San-Francyska, ofis u Biełarusi ciapier likvidujecca. Rašeńnie ab zakryćci ofisa PandaDoc ułaśniki pryniali jašče ŭ lutym hetaha hoda. Heta źviazana ź letašnimi padziejami.
Uletku 2020 hoda Mikita Mikada i Siarhiej Barysiuk inicyjavali zbor hrošaj dla siłavikoŭ, jakija vyrašyli źmianić prafiesiju.
Užo ŭ vieraśni ŭ ofisie kampanii prajšli pieratrusy. Čatyry supracoŭniki PandaDoc apynulisia ŭ SIZA, ich abvinavacili ŭ machlarstvie. Paźniej traim ź ich źmianili mieru strymańnia i vypuścili ź SIZA. Daŭžej za ŭsich u niavoli ŭtrymlivaŭsia mieniedžar pa pradukcie Viktar Kuŭšynaŭ, jon vyjšaŭ na volu tolki ŭ žniŭni, praz amal hod paśla zatrymańnia.
Kamientary