«Ja tut kožny dzień». Darja Łosik pra toje, jak dniuje pad ścienami SIZA, dzie sudziać muža
Sud u spravie błohiera i kansultanta «Radyjo Svaboda» ciahniecca ŭžo bolš za dva miesiacy. Blizkija palitviaźnia nia viedajuć nijakich padrabiaznaściaŭ ab pracesie.
Ihara Łosika zatrymali 25 červienia 2020 hodu. Sud u jaho spravie pačaŭsia amal roŭna praz hod paśla zatrymańnia, 24 červienia 2021-ha. Ihara sudziać razam ź Siarhiejem Cichanoŭskim, Mikołam Statkievičam, Uładzimieram Cyhanovičam, Arciomam Sakavym i Dźmitryjem Papovym. Praces idzie za začynienymi dźviaryma na terytoryi homielskaha SIZA № 3, dzie trymajuć usich abvinavačanych. Nichto ź ichnych blizkich nia moža na jaho trapić, usie advakaty znachodziacca pad padpiskaj ab nievydavańni, jany nia mohuć raskazvać nia tolki ab padrabiaznaściach spravy, ale i pra toje, chto sudzić Ihara i inšych i chto pradstaŭlaje dziaržaŭnaje abvinavačańnie.
Žonka Ihara Darja Łosik ad samaha pačatku sudu kožny dzień pracesu znachodzicca pobač z budynkam SIZA ŭ Homieli. Joj admovili ŭ pravie prysutničać na pracesie, adnak Darja ŭsio adno čakaje vynikaŭ pracesu tam.
«Ja tut kožny dzień, z aŭtorka pa piatnicu, jak idzie sud, — raskazvaje Darja. — Pryjaždžaju z Baranavičaŭ u Homiel u paniadziełak uviečary. Užo bolš za dva miesiacy tak.
Ale pa-raniejšamu ničoha nieviadoma ni pra chod pracesu, ni pra toje, kali jon skončycca. Nijakich terminaŭ nie nazyvajuć. Ja navat nia viedaju, na jakim etapie praces. Mianie tut ludzi ŭžo paznajuć časam. Kali nadvorje dazvalaje, ja tut na łavačcy siadžu, dzie pieradačy prymajuć. Ludzi padychodziać pahavaryć, spytać, jak spravy.
Ja ŭžo šmat kaho viedaju, chto prynosić pieradačy svaim rodnym. Nia tolki «palityčnym», absalutna roznym ludziam».
Pa słovach Darji, u apošnija tydni suviaź ź Iharam praź listy naładziłasia. Jany vielmi drenna dachodzili paśla pačatku pracesu i prykładna da 9 žniŭnia. Ale ciapier usio značna lepš.
«Raniej albo adzin list dachodziŭ na tydzień, albo ŭvohule ničoha, — raskazvaje Darja. — Ciapier stała lepš. Ad 2 da 5 listoŭ mnie za tydzień prychodzić. Ja ich atrymlivaju, kali viartajusia z Homla ŭ Baranavičy ŭ piatnicu.
Nastroj u Ihara mianiajecca vielmi, kali mierkavać pa listach. Piša, što stamlajecca ad taho, što niechta vyrašyŭ voś tak usio zrabić. Kab čałaviek siadzieŭ biaź niejkaj viny. Piša, što nazvać heta sudom u pryncypie niemahčyma, nazyvaje praces «ździekami». Piša, što tak i nia zmoh zrazumieć padčas pracesu, u čym jon vinavaty. Kali piša pra sud, to samo hetaje słova zaŭsiody biare ŭ dvukośsi. Sama ja b nazvała heta ŭsio cyrkam, ale dumaju, što cenzura taki vyraz nie prapuścić».
U čym abvinavačvajuć Ihara Łosika, dakładna nie viadoma. Advakat nia moža nazvać usich artykułaŭ, pavodle jakich abvinavačvajuć jaho padabaronnaha. Takija ŭmovy padpiski ab nievydavańni, jakuju daŭ abaronca. Viadomyja tolki dva z troch artykułaŭ abvinavačvańnia — častka 2 artykułu 293 Kryminalnaha kodeksu («Udzieł u masavych biesparadkach»), a taksama artykuł 342 KK («Arhanizacyja i padrychtoŭka dziejańniaŭ, što hruba parušajuć hramadzki paradak, albo aktyŭny ŭdzieł u ich»).
U kancy žniŭnia Jury Vaskrasienski zajaviŭ, što ŭklučyŭ Ihara Łosika ŭ śpis pieršych sta palitviaźniaŭ, jakich jon maje namier prapanavać vyzvalić Łukašenku. Rodnyja Łosika i jon sam hetaj infarmacyi nie kamentujuć. Siarhiej Cichanoŭski na pačatku vieraśnia paviedamiŭ z-za krataŭ, što nichto z abvinavačanych u jaho spravie prašeńnia ab pamiłavańni na imia Łukašenki nie pisaŭ.
Kamientary