Zališniaja śmiarotnaść u Biełarusi mahła skłaści 32 tysiačy čałaviek — danyja ŭciečki
Nastojaŝieje Vriemia praviało daśledavańnie danych, atrymanych ad «Kibierpartyzanaŭ» — chakieraŭ, jakija zajavili pra ŭzłom sistemy «Pašpart» u Biełarusi. Jano pakazvaje, što z sakavika 2020 hoda da sakavika 2021 hoda zališniaja śmiarotnaść u krainie skłała 32 tysiačy čałaviek — u 14 razoŭ bolš, čym paviedamlali ŭłady.
Infarmacyja, jakaja analizujecca ŭ hetym artykule, atrymanaja šlacham uzłomu masivu piersanalnych źviestak hramadzian Biełarusi. Vykarystańnie škodnych prahram u Kryminalnym kodeksie Biełarusi karajecca terminam da 10 hadoŭ, a niesankcyjanavany dostup da kampjutarnaj infarmacyi — da dvuch hadoŭ. U MUS Biełarusi nie adkazali na zapyt Nastojaŝiemu Vriemieni z nahody hetaha ŭzłomu.
«Kibierpartyzany» ŭ lipieni 2021 hoda raspaviali ab uzłomie masivu danych z usimi piersanalnymi źviestkami biełarusaŭ — infarmacyjnaj sistemy «Pašpart». Chakiery śćviardžajuć, što fizična trapili na abjekty MUS Biełarusi, «adkryli niekalki dostupaŭ» va ŭnutranyja sietki i «praciahvajuć pracavać u ich», niahledziačy na sproby ŭładaŭ spynić uciečki.
«Kibierpartyzany» padzialilisia z Nastojaŝim Vriemieniem masivam piersanalnych danych 1,4 młn biełarusaŭ, pamierłych sa studzienia 2010-ha da sakavika 2021 hoda.
Da epidemii karanavirusa źviestki ab śmiarotnaści z AIS «Pašpart» mała adroźnivalisia ad taho, što publikavaŭ Nacyjanalny statystyčny kamitet (Biełstat). Tak, pavodle danych, źlitych z pašpartnaj sistemy, u 2019 hodzie ŭ Biełarusi pamierła 121 515 čałaviek, a pavodle Biełstata — 120 913 čałaviek.
Biełstat nie publikavaŭ novyja źviestki ab śmiarotnaści z červienia 2020 hoda. Va ŭciečcy AIS «Pašpart» źviestki abryvajucca 31 sakavika 2021 hoda. Da hetaha — u listapadzie, śniežni i studzieni — bačnaja rekordnaja miesiačnaja śmiarotnaść u paraŭnańni z danymi, prynamsi, z 2008 hoda. U 2020 hodzie, kali zychodzić z uciečki, u Biełarusi pamierła 145 tysiač čałaviek — heta najvyšejšy pakazčyk u paślavajennaj historyi krainy, akramia 2002 hoda, kali ŭ siłu roznych demahrafičnych abstavinaŭ, u pieršuju čarhu stareńnia nasielnictva, pamierła 146 tysiač.
Kolki ž ludziej pamierli ad karanavirusa? Aficyjna ŭ 2020 hodzie — 1424 čałavieki, a da kanca sakavika 2021-ha — 2247. Ale pavodle pakazčykaŭ zališniaj śmiarotnaści («załaty standart», pa jakim vyznačajuć maštaby epidemii) — na paradak bolš. U Biełarusi ŭ 2020 hodzie zališniaja śmiarotnaść skłała 25 tysiač čałaviek. Heta realnaja śmiarotnaść (145 tysiač) minus prahnazavanaja śmiarotnaść na asnovie danych papiarednich hadoŭ (120 tysiač).
25 tysiač čałaviek za 2020 hod — heta ŭ 17 razoŭ bolš, čym kažuć biełaruskija ŭłady.
Zališniaja śmiarotnaść z kanca sakavika 2020-ha pa kaniec sakavika 2021-ha skłała 32 tysiačy čałaviek. Heta ŭ 14,4 raza bolš, čym śviedčać aficyjnyja danyja.
25 śniežnia 2020 hoda Łukašenka zajaviŭ, što nie źbirajecca pryščaplacca ad karanavirusa. U hety dzień, zhodna z uciečkaj, u krainie pamierli 496 čałaviek. Dla paraŭnańnia, u toj ža dzień hodam raniej pamierła na 141 čałavieka mienš.
U Ministerstvie achovy zdaroŭja Biełarusi nie adkazali na zapyt Nastojaŝieho vriemieni.
«Uvarvalisia z dručkami». Śviedka raskazaŭ, jak siłaviki źbili aŭtaślesara ź Viciebska. Praz hod toj pamior4
«Uvarvalisia z dručkami». Śviedka raskazaŭ, jak siłaviki źbili aŭtaślesara ź Viciebska. Praz hod toj pamior
«Toje, što chtości siadzić za palityku, źjaŭlajecca častkaj piejzažu». Biełaruska, jakaja naviedała radzimu paśla doŭhaha pierapynku, padzialiłasia ŭražańniami99
Kamientary