Bank raźvićcia padtrymaje pradpryjemstvy pad sankcyjami? Abjom finansavańnia zasakrecili
Źjaviłasia pastanova Saŭmina «Ab ablihacyjach adkrytaha akcyjaniernaha tavarystva «Bank raźvićcia Respubliki Biełaruś». U joj dva punkty, pieršy ź jakich schavany pad hryfam dla słužbovaha karystańnia, a druhi skasoŭvaje papiaredniuju pastanovu ab vyznačeńni limitaŭ emisii ablihacyj Banka raźvićcia.
Ekanamisty ličać, što za hetymi farmuloŭkami chavajecca chitry chod. Adzin z apytanych nami bankiraŭ vykazaŭ zdahadku, što majecca na ŭvazie vypusk novych ablihacyj, častku ź jakich płanujuć raźmiaścić na rasijskim rynku, na jakim ich mohuć vykupić rasijskija banki, ale tolki pry palityčnaj zhodzie Kramla.
A atrymanyja srodki, imavierna, nakirujuć na padtrymku pradpryjemstvaŭ, jakija trapili pad zachodnija sankcyi.
Ekanamist BEROC Kaciaryna Barnukova ličyć, što havorka moža iści nie tolki pra Rasiju, ale i pra ŭnutrany rynak.
«Hrošy mohuć zajmać i ŭ bankaŭ, a banki — u Nacbanka. Ale hrošaj niama ni ŭ bankaŭ, ni ŭ biudžecie. Tak što, vyhladaje, zastajecca tolki rublovaja emisija dla vykupu ablihacyj, jakaja pahražaje viadomymi nastupstvami.
Pamier emisii ablihacyj u takim vypadku chavajuć, kab nie davać nahodaŭ dla rostu inflacyjnych čakańniaŭ i strachaŭ, źviazanych z emisijaj. Heta nie vielmi razumna — takija sakrety tolki raspalvajuć niehatyŭnyja čakańni jašče bolš, čym apublikavanyja ličby, heta naradžaje śpiekulacyi na temie, što i navošta chavajuć», — kaža Barnukova.
Nahadajem, niadaŭna Bank raźvićcia taksama staŭ novym harantam niedatykalnaha bankaŭskaha reziervu na 2 miljardy rubloŭ.
Hrošy hetaha fondu farmirujucca z unioskaŭ usich bankaŭ i mohuć być vykarystanyja, kali niejki bank «laža», kab kampiensavać depazity ŭkładčykam. Raniej harantami vystupali Minfin i Nacbank, ale z maja ŭ hety śpis dadaŭsia Bank raźvićcia.
«Vialiki absalutna čałaviek». Kola Łukašenka raskazaŭ, što dla jaho baćka i ŭ čym jahonaja apazicyjnaść14
Kamientary