Siońnia ŭ Mahilovie byŭ vyniesieny prysud bresckim błohieram Siarhieju Piatruchinu i Alaksandru Kabanavu. Im dali pa 3 hady kałonii ahulnaha režymu, paviedamlajuć pravabaroncy.
U Mahilovie vynieśli prysud bresckim błohieram Siarhieju Piatruchinu i Alaksandru Kabanavu. Sudździa suda Kastryčnickaha rajona Volha Kraŭčanka pryznała ich vinavatymi ŭ arhanizacyi i padrychtoŭcy dziejańniaŭ, jakija hruba parušajuć hramadski paradak, abrazie pradstaŭnika ŭłady. Piatruchina taksama pryznali vinavatym u abrazie sudździ. Piatruchina i Kabanava prysudzili da 3 hadoŭ kałonii ahulnaha režymu. Samich błohieraŭ u sud tak i nie dapuścili: ich vydalili z zały suda jašče ŭ pačatku pracesu, usie chadajnictvy ab udziele abvinavačanych u pracesie sudździa Kraŭčanka adchiliła, piša Tut.by.
Dziaržabvinavaŭca prasiła sud pryznačyć Kabanavu i Piatruchinu pa 3 hady ŭ kałonii ahulnaha režymu. Piatruchina — jašče i abaviazać vypłacić štraf pa prysudzie suda Bresta ŭ 360 bazavych (10 440 rub.). Pazoŭ amapaŭca da padsudnych u sumie 1,5 tysiačy rubloŭ pastanoŭlena zadavolić u poŭnym abjomie.
Pazicyja abvinavačvańnia zvodziłasia da taho, što śledstva i prakuratura ličać, što masavyja pratesty pa ŭsioj Biełarusi ŭ 2020 hodzie pačalisia ŭ tym liku i z-za Piatruchina i Kabanava, jakija dziejničali ŭ źviazku ź Siarhiejem Cichanoŭskim, Mikałajem Statkievičam, Paŭłam Sieviaryncam.
Abarona fihurantaŭ spravy nazvała ŭsie abvinavačvańni zdahadkami, pryviedzienyja dziaržabvinavaŭcam fakty — vyrvanymi z kantekstu i niedatyčnymi da Piatruchina i Kabanava i nastojvała na spynieńni kryminalnaha pieraśledu.
Sud pačaŭsia 11 lutaha. U sud tady žurnalistaŭ niedziaržaŭnych ŚMI nie puścili. A Piatruchina z Kabanavym sudździa ŭ vyniku vydaliła z zały suda. Tak što dalej na praces ich nie dastaŭlali.
Zhodna z abvinavaŭčym zaklučeńniem, padsudnyja raźmiaścili na YouTube-kanale «Narodny reparcior» fatahrafiju amapaŭca Vitala Aŭtušenki z abraźlivymi kamientarami. Milicyjanta pryznali paciarpiełym, jon sprabavaŭ spahnać z abvinavačanych 1,5 tysiačy rubloŭ za maralnuju škodu.
Fotazdymak siłavika źjaviŭsia ŭ internecie paśla jahonaha ŭdziełu ŭ zatrymańni błohiera Siarhieja Cichanoŭskaha pad Mahilovam 6 maja. Fota Aŭtušenki ŭbačyŭ na YouTube-kanale «Narodny reparcior» 8 maja. Jon nastojvaŭ na tym, što kamientar da filma demanizuje jaho i abražaje jaho honar i hodnaść. Aŭtušenka paviedamiŭ sudu, što jahonyja susiedzi pierastali razmaŭlać ź jahonymi baćkami paśla źjaŭleńnia fatahrafii.
Jašče adzin paciarpieły — sudździa Bresckaha abłasnoha suda Andrej Leščanka. Pavodle abvinavaŭčaha źniavoleńnia, jaho abraziŭ Siarhiej Piatruchin.
Kamientary