14 padsudnych, 109 paciarpiełych milicyjantaŭ. Pačaŭsia sud pa «masavych biesparadkach» paśla vybaraŭ u Pinsku
U sudzie Maskoŭskaha rajona Bresta 23 sakavika pačaŭsia razhlad kryminalnaj spravy suprać 14 pinskich palitviaźniaŭ. Ich usich abvinavačvajuć va ŭdziele ŭ masavych biesparadkach u noč na 10 žniŭnia ŭ Pinsku (č. 2 art. 293). Na łavie padsudnych — pinčuki ad 19 da 44 hadoŭ: muž i žonka, dva siabry, aktyvist ruchu «Za svabodu», taksist, u jakoha dahetul traŭmy paśla źbićcia siłavikami. Paciarpiełymi pa spravie vystupajuć 109 supracoŭnikaŭ milicyi, bolšaści jakich pryčynienyja škody, jakija nie paciahnuli za saboj karotkačasovaha rasstrojstva zdaroŭja. Da niekatorych paciarpiełych, pa materyjałach spravy, «sprabavali ŭžyć hvałt». Prakuratura vystaviła pazoŭ na sumu 24 tysiačy rubloŭ — u stolki acanili škodu ad dziejańniaŭ pratestoŭcaŭ u Pinsku. Na sudovy praces puścili tolki svajakoŭ abvinavačanych i dziaržaŭnuju presu — niezaležnyja žurnalisty i naziralniki nie zmahli patrapić u zału, paviedamlaje spring96.org.
Uviečary 9 žniŭnia pinčuki pačali źbiracca kala svaich vybarčych učastkaŭ, kab daviedacca pra vyniki vybaraŭ pa svaich rajonach. Adnak tam ich pačali adpraŭlać da harvykankama, bo ŭsie źviestki nibyta ŭžo tam. Kali ŭviečary kala harvykankama sabrałasia kala tysiačy čałaviek, da ich ź miehafonam vyjšaŭ načalnik Pinskaha HAUS Dźmitryj Karaviakoŭski i čynoŭnik.
Było prapanavana vyłučyć ad ludziej piać delehataŭ, jakija zmohuć pahutaryć z kiraŭnictvam horada. Pa słovach pinčukoŭ, ludzi prosta chacieli daviedacca vyniki vybaraŭ. Kali piać čałaviek uvajšli ŭ budynak harvykankama, načalnik milicyi skazaŭ usim čakać. Kala budynka harvykankama jany pračakali kala dźviuch hadzin, ale svaich piaci delehataŭ u toj viečar jany tak i nie dačakalisia.
Za hetyja dźvie hadziny ŭ horad prybyło padmacavańnie siłavikoŭ. Ludziej stali akružać. Apynuŭšysia ŭ takoj situacyi, ludzi pačali praryvacca z «kalca». Pa słovach miascovych, dalej pačalisia sutyknieńni z AMAPam: siłavikoŭ pačali adciskać. Pačalisia masavyja žorstkija zatrymańni. Zatrymanych źbivali na praciahu niekalkich dzion.
Na łavie padsudnych: 36-hadovy manalitčyk Raman Bahnaviec, 20-hadovy fanat FK «Chvala» Daniił Bohnat, 31-hadovy Ryhor Huńko, 28-hadovy rabotnik «Pinskdreva» Siarhiej Laženka, 43-hadovy dalnabojščyk Stanisłaŭ Michajłaŭ, 44-hadovaja sanitarka Alena Maŭšuk, 20-hadovy Devid Maścicki, 35-hadovy taksist Viačasłaŭ Rahaščuk, 19-hadovy fanat FK «Chvala» Aleh Rubiec, 37-hadovy aktyvist ruchu «Za svabodu» Ihar Sałaviej, 35-hadovy Alaksandr Ciareška, 32-hadovy Artur Chalimončyk, 20-hadovy Viačasłaŭ Šelamiet.
Usie, akramia Siarhieja Maŭšuka, znachodziacca ŭ bresckim SIZA-7. Siarhieju abranaja miera strymańnia ŭ vyhladzie chatniaha aryštu, a jaho žonka ŭžo bolš vaśmi miesiacaŭ utrymlivajecca pad vartaj.
Pavodle viersii abvinavačvańnia, 14 abvinavačanych, «pryniaŭšy 9 žniŭnia 2020 hoda ŭdzieł u niesankcyjanavanym masavym mierapryjemstvie kala budynka Pinskaha rajvykankama, hruba parušyli hramadski paradak».
«U jaho raźvićcio ŭčynili pahromy, nanieśli supracoŭnikam milicyi ŭdary rukami, nahami i roznymi pradmietami — doškami, pałkami, vuličnymi skryniami, frahmientami tratuarnaj plitki i bietonnych parapietnych plit, butelkami, kamianiami, mietaličnymi vyrabami i armaturaj. Paśla čaho naŭmysna źniščyli i paškodzili transpartnyja srodki i inšuju majomaść, jakija naležali AUS, fizičnym i jurydyčnym asobam».
Z usich paciarpiełych trom pryčynienyja paškodžańni, jakija paciahnuli doŭhi razład zdaroŭja na termin da 4 miesiacaŭ: Viačasłavu Šelestu (zakryty pierałom stupni), Alaksandru Baryčeŭskamu (nadryŭ źviazki kalena), Siarhieju Simončyku (pierałom kiści ruki). U materyjałach spravy pieraličvajecca kala 35 supracoŭnikaŭ AUS, jakija vystupajuć u jakaści paciarpiełych, z farmuloŭkaj «da ich sprabavali ŭžyć hvałt i pryčynić cialesnyja paškodžańni ŭ vyhladzie źbićcia». 54 supracoŭnikam AUS pryčynienyja paboi biez udakładnieńnia paškodžańniaŭ.
Škoda ad dziejańniaŭ pratestoŭcaŭ prakuratura acaniła ŭ 24 tysiačy rubloŭ. Da abvinavačanych zajaŭleny pazoŭ ab spahnańni škody ŭ salidarnym paradku. U materyjałach spravy pieraličanyja pradmiety, jakim naniesieny ŭron dziejańniami pratestoŭcaŭ: 11 mietaličnych supraćudarnych ščytoŭ (adzin — 145 rub. 33 kap.), 18 šlemaŭ «Džeta» z zabrałam (adzin — 140 rub.), 4 kuleachoŭnyja šlemy biez zabrała (adzin — 540 rubloŭ), 5 broniekamizelek (adna — 595 rub. 50 kap.), humovych 10 pałak (adna — 2 rub. 66 kap.), 17 hazavych bałončykaŭ «Standart piakučy pierac» (adzin — 6 rub. 78 kap.), 13 skryń (adna — 34 rub. 20 kap.), 30 raślin «Pietunija» (adna — 72 kap.), 7 łavak, telefon supracoŭnika Samsung Galaxy S7, šylda «Pinski rajonny vykanaŭčy kamitet» (na dźviuch dziarž. movach) (140 rubloŭ) i inšyja.
Bort Łukašenki z-za techničnych prablem viarnuŭsia ŭ Minsk bieź jaho16
Kamientary