Biełaruskija pradpryjemstvy vinny miljard rubloŭ za enierhanośbity

«Śmiećcievyja» daŭhi za enierhanośbity adlustroŭvaje praterminavanaja kredytorka za paliŭna-enierhietyčnyja resursy. Da 1 lutaha hetaja kredytorka dasiahnuła 1,103 młrd BYN. Rost u paraŭnańni z pačatkam hoda skłaŭ 12,3%.

Dla daŭhoŭ za enierhanośbity ŭ Biełarusi charakternaja vysokaja dola praterminoŭki. Voś i na 1 lutaha ŭdzielnaja vaha taksičnych abaviazacielstvaŭ pradpryjemstvaŭ-fłahmanaŭ skłała 20,5%. Heta značyć, što kožny piaty rubiel za pastaŭlenyja TER nie byŭ viernuty ŭ termin.

Asnoŭnuju častku daŭhoŭ za enierhanośbity kancentravali arhanizacyi Homielskaj (302,7 młn BYN) i Minskaj (263,4 młn BYN) abłaściej. Taksama pa Minskaj vobłaści nazirałasia samaja vysokaja dola niepłaciažoŭ — až 57,4%. Samy chutki rost praterminoŭki z pačatku 2021 hoda adznačaŭsia pa Hrodzienskaj vobłaści — u 2,7 razy da 118,3 młn BYN.

Supastaŭleńnie rehijanalnych i halinovych źviestak pakazvaje, što krynicaj rostu doŭhu mohuć źjaŭlacca pradpryjemstvy pa vytvorčaści niemietaličnych minieralnych praduktaŭ. Da takich u rehijonie staviacca cemientavyja, šklanyja i inšyja pradpryjemstvy.

Mienš za ŭsio praterminavanych daŭhoŭ mieli fłahmany Bresckaj vobłaści — usiaho 49,5 młn BYN. Adnosna mały abjom taksičnaj zapazyčanaści moža być źviazany z tym, što hety rehijon u najmienšaj stupieni zakranuła tak zvanaja kompleksnaja madernizacyja.

U halinovym razrezie asnoŭnuju častku praterminoŭki ŭziali na siabie pramysłovaść i sielskaja haspadarka — 579,2 i 374,4 młn BYN adpaviedna. U pramysłovaści daŭhi z pačatku hoda vyraśli na 16,2%, u sielskaj haspadarcy — na 9,2%. Dola taksičnych abaviazacielstvaŭ u pramysłovaści skłała 16,4%, u sielskaj haspadarcy — 51,2%.

Unutry pramysłovaści było niekalki kropak kancentracyi niepłaciažoŭ. U ich lik uvajšli takija haliny, jak charčpram (107,2 młn BYN), drevaapracoŭka i celułoźniki (52,8 młn BYN), vytvorcy niemietaličnych minieralnych praduktaŭ (126,7 młn BYN), mašynabudavańnie (50,2 młn BYN), enierhietyka (166,2 młn BYN). Charčpramu ŭłaścivaja vielmi vysokaja dola prablemnych daŭhoŭ za enierhanośbity. Na 1 lutaha 2021 hoda jana dasiahnuła 96%. Razam ź sielskaj haspadarkaj charčpram utvaraje kłastar pradpryjemstvaŭ ahrapramysłovaha siektara. Jaho sumarnaja praterminoŭka skłała 481,6 młn BYN, abo 43,7% ad usich prablemnych daŭhoŭ u realnym siektary.

• 0
• 0
• 0
• 0
• 0
• 0
• 0
• 0