«Bałonam pšyknuli na hałavu, na tvar, na ruki i na śpinu». Chłopiec ź videa «Bajpoła» pra zatrymańnie i paznaku farbaj
Inicyjatyva «Bajpoł» apublikavała ŭryŭki videazapisaŭ z ustanoŭ Ministerstva ŭnutranych spraŭ, dzie zatrymanyja pa palityčnych matyvach, u tym liku 19-hadovaja studentka Nastaśsia Bułybienka, majuć mietki farbaj na hałavie.
Praktyka paznačać cieły źniavolenych mieła miesca ŭ nacysckich kancłahierach. Biełaruskaje zakanadaŭstva takoha nie dapuskaje, i takaja praktyka moža być rascenienaja jak katavańnie. Tym nie mienš pra paznaki farbaj na ciele i na adzieńni raskazvali šmatlikija palityčnyja, jakija vychodzili z turmaŭ u 2020 hodzie.
«Naša Niva» adšukała adnaho z chłopcaŭ, jaki fihuruje ŭ videa.
«Mianie zatrymali pierad Maršam partyzanaŭ 18 kastryčnika. Uziali na vulicy Uljanaŭskaj, — raskazvaje Kirył. Jamu 27 hadoŭ. Pracuje malarom. — Było kala 14-j hadziny, absalutna pustaja vulica, ja išoŭ adzin. I raptam prajechali čatyry busy, dva spynilisia. Vyjšli ludzi — AMAP? — i mianie «pahruzili» ŭ bus. Unutry pastavili na kaleni, ale nie bili.
Kudyści pavieźli, jechali niadoŭha, chvilin 7-10. Tam pierahruzili ŭ aŭtazak. Tam i «paznačyli farbaj». Bałonam pšyknuli na hałavu i tvar, na ruki i na śpinu. Za što nie kazali, a sam ja nie pytaŭsia — było strašna. Ale dumaŭ, što ciapier praz paznaki buduć bić u RUUSie».
Pa słovach Kiryła, u aŭtazaku jon sustreŭ jašče adnaho chłopca ź videa — Alaksieja.
«Jon užo byŭ u aŭtazaku. Užo taksama z «paznakaj». Ja spačatku padumaŭ, što heta kroŭ ci ślady źbićcia, bo ŭ aŭtazaku było ciomna. Oho, dumaju, jak pamiali čałavieka, — zhadvaje Kirył. — A paśla ja zrazumieŭ, što toje farba. Loša skazaŭ, što jaho «paznačyli», bo źbiahaŭ ad siłavikoŭ. Ale jaho dahnali, paru razoŭ udaryli i zatrymali.
U aŭtazaku ja pravioŭ chvilin 40: jeździli, «źbirali» ludziej. Paśla — RUUS Maskoŭskaha rajona, tam adviali ŭ aktavuju zału».
Kirył kaža, što ŭ aktavaj zale było čałaviek z 40. Ludziej z paznakami farbaj pasadzili asobna. Chtości byŭ paznačany čyrvonym koleram, chtości — sinim. Kirył kaža, što łohiki, kaho jakim koleram i za što paznačali, jon nie zrazumieŭ.
«Ale ŭsio ž u RUUSie nie bili, — raskazvaje Kirył. — Byŭ momant: padyšoŭ da mianie adzin z supracoŭnikaŭ, vyvieŭ na kalidor, pačaŭ pytacca, čamu ŭ mianie paznaki. Ja raspavioŭ pra svajo zatrymańnie, patłumačyŭ, što i sam nie viedaju. Tady toj supracoŭnik kaža: dyk, moža, nie varta tady chadzić na takija mierapyjemstvy?
Voś tak niejak pahavaryli. Paśla mianie adviali nazad u aktavuju zału. Tam ja pravioŭ hadzin piać. Niejkaha admysłovaha staŭleńnia da paznačanych nie było. Chiba što afarmlali ŭ samym kancy, paśla pavieźli na Akreścina ŭ asobnym aŭtazaku.
Zatym — sud pa skajpie, mnie dali 10 sutak. Adsiedzieŭ, možna skazać, narmalna».
Kirył sam malar, ale nie moža skazać, jakoj farbaj jaho paznačyli. Kaža, što «pšykali» z bałona.
«Niejkaja śpiecyfičnaja farba, vielmi śmiardziučaja. Ale nie farba dla aŭtamabilaŭ — nie viedaju, što heta było, bałon razhledzieć ja nie paśpieŭ.
Admyvałasia paśla narmalna», — zhadvaje chłopiec.
Darečy, dla Kiryła heta ŭžo druhaja sustreča ź siłavikami. Pieršaja była 11 žniŭnia, paśla čaho chłopiec trapiŭ u balnicu.
Kirył raspavioŭ prajektu august2020.info, što jaho bili spačatku daišniki, paśla siłaviki ŭ maskach u mikraaŭtobusie, paśla milicyjanty ŭ RAUSie.
Saša Filipienka raskazaŭ, čamu nie płanuje pisać pa-biełarusku i jak Biełaruś moža stać padarunkam Rasii ŭ vajnie29
Kamientary