Vakcyna Novavax ad kavidu vyhladaje siońnia najlepšaj ź isnujučych

Jašče ŭ studzieni 2020 hoda ŭ kampanii hrašovych srodkaŭ zastavałasia, kab pratrymacca nie bolš za paŭhoda. Adnak užo siońnia vakcyna Novavax suprać kavidu voś-voś budzie zarehistravanaj, a šmat navukoŭcaŭ bačać u joj vialiki patencyjał dla baraćby z pandemijaj.

Na praciahu dziesiacihodździaŭ nievialikaja bijatechnałahičnaja kampanija Novavax sprabavała raspracavać choć niejkuju adobranuju vakcynu, ale biespaśpiachova. Kampanija Novavax jašče letaś była na miažy bankructva, ale jak tolki stała viadoma pra pośpiech jaje kavidnaj vakcyny, akcyi Novavax uźlacieli ŭvierch.

Papiarednija daśledavańni vakcyny vyjavili niekatoryja pieravahi Novavax pierad kankurentami, piša The Wall Street Journal.

Vakcyna, u adroźnieńnie ad anałahaŭ, praduchilaje navat bieśsimptomnyja formy kavidu, a taksama dziejničaje bolš praciahły čas, čym anałahi. Da taho ž, vakcynu Novavax nie treba zachoŭvać pry nizkich tempieraturach, što robić jaje bolš pryvablivaj dla ŭstanoŭ achovy zdaroŭja, jakija nie majuć marazilnaj kamiery.

Adnak Novavax pakazała adnosnuju efiektyŭnaść (kala 50%) i suprać tak zvanaha paŭdniovaafrykanskaha štama kavidu. Jakraz hety štam vyklikaje najbolš prablem u vytvorcaŭ inšych vakcyn.

Vyniki apošnich vyprabavańniaŭ amierykanskaj vakcyny mohuć być apublikavanyja ŭžo ŭ kancy sakavika.

Kali vakcynu zarehistrujuć, kampanija sutykniecca z prablemaj masavaj vytvorčaści Novavax. Sprava ŭ tym, što praź finansavyja prablemy letaś kampanija była vymušanaja pradać svaje vytvorčyja aktyvy.

Nadzieja tolki na inviestaraŭ, dziakujučy jakim akcyi kampanii padaraželi ŭ 60 razoŭ u paraŭnańni ź minułym hodam. A rynkavaja kapitalizacyja vyrasła z 127 miljonaŭ da 15,4 miljarda — heta bolš, čym u farmaceŭtyčnych kampanij ź miljardnym hadavym prodažam.

Rehistracyja vakcyny Novavax čarhovy raz paćvierdziła b, jak pandemija pieraviarnuła farmaceŭtyčnuju halinu. Pieradavyja vakcyny stvarajuć niekali nieprykmietnyja kampanii, takija jak Moderna Inc. ci BioNTech SE, u toj čas jak, naprykład, hihant pa vytvorčaści vakcyn Merck & Co. spyniŭ svaje namahańni vynajści efiektyŭnuju vakcynu suprać kavidu paśla nieabnadziejlivych vynikaŭ.

Pry stvareńni vakcyny Novavax navukoŭcy vykarystoŭvali mietad, jaki adroźnivajecca ad mietadu AstraZeneca (biasškodny virus šympanze — nośbit nieabchodnaha białku) i ad Pfizer i Moderna (RNK-vakcyny). Novavax vykarystoŭvaje sintezavany šypavidny białok karanavirusa, na jaki arhanizm vakcynavanaha daje imunny adkaz.

Adnak pradstaŭniki kampanii nie śpiašajucca radavacca pośpiechu, bo papiaredni vopyt vytvorčaści vakcyn pakazvaŭ pravały jakraz na apošnich stadyjach.

Na praciahu dziesiacihodździaŭ kampanija imknułasia stvaryć vakcynu suprać VIČ, eboły, śvinoha hrypu i inšych virusnych zachvorvańniaŭ. I kožny raz kampanija napačatku dasiahała mnohaabiacalnych vynikaŭ, ale ŭrešcie ci popyt na vakcyny padaŭ, ci na apošnich stadyjach vyprabavańniaŭ vakcyny byli nieefiektyŭnyja.

• 0
• 0
• 0
• 0
• 0
• 0
• 0
• 0