Raspracoŭščyk mabilnych hulniaŭ Easybrain Limited staŭ udzielnikam uhody ab źlićci — pahłynańni sa šviedskaj kampanijaj Embracer Group AB, piša dev.by.
Košt uhody — 640 młn dalaraŭ u dzień uhody plus da 125 młn dalaraŭ u jakaści dadatkovaha ŭznaharodžańnia.
Top-mieniedžary Easybrain Piotr Skaromny, Maćviej Cimašenka i Aleh Hruševič stanuć trecimi pa vieličyni akcyjanierami Embracer. A Easybrain — vośmaj daččynaj kampanijaj Embracer, jaje pa-raniejšamu budzie ŭznačalvać stary mieniedžmient.
Embracer Group raskryvaje niekatoryja detali ŭhody. Košt kupli ŭ pieršy dzień z ulikam svabodnych hrašovych srodkaŭ i biez uliku pazykovych srodkaŭ składaje 640 młn dalaraŭ i apłačvajecca znoŭ vypuščanymi akcyjami Embracer B. pry hetym akcyi na 130 młn dalaraŭ vydajucca pradaŭcam pry zakryćci biez abmiežavańniaŭ, na 220 młn dalaraŭ — z šaścimiesiačnym błakavańniem, na 145 młn dalaraŭ —z błakavańniem na adzin hod i jašče na 145 młn dalaraŭ — z dvuchhadovym błakavańniem. Pry ŭmovie vykanańnia ŭzhodnienych finansavych pakazčykaŭ na praciahu šaści hadoŭ dadatkovaje ŭznaharodžańnie ŭ pamiery nie bolš za 125 młn dalaraŭ budzie vypłačana znoŭ vypuščanymi akcyjami Embracer B.
Takim čynam, ahulnaja maksimalnaja suma ŭhody — 765 młn dalaraŭ. Kab zarabić pa maksimumie, EBIT (Earnings Before Interest and Taxes, prybytak da vyliku pracentaŭ i padatkaŭ) za šaścihadovy pieryjad u sumie pavinien pieravyšać 600 młn dalaraŭ.
Easybrain aceńvaje svaju vyručku za 2020 hod u 210 młn dalaraŭ (111 młn dalaraŭ — u 2019 hodzie), EBIT — u 70 młn dalaraŭ (18 młn dalaraŭ — u 2019 hodzie).
Easybrain — raspracoŭščyk mabilnych hulniaŭ, śpiecyjalizujecca na hałavałomkach i łahičnych hulniach. Kolkaść supracoŭnikaŭ — 230 čałaviek. Štab-kvatera znachodzicca ŭ Limasole (Kipr), ofis raspracoŭki — u Minsku.
Pa vynikach 2020 hoda Easybrain uvajšła ŭ top-3 samych papularnych biełaruskich raspracoŭščykaŭ, pavodle danych Sensor Tower. Hulni i dadatki kampanii karystalniki ŭstalavali 328 miljonaŭ razoŭ (+75% da 2019 hoda).
Usiaho hulni Easybrain majuć 750 młn ustalavańniaŭ i 12 młn karystalnikaŭ u dzień. Partfolia ŭklučaje takija hulni, jak Sudoku.com, Nonogram.com, Blockudoku i Pixel Art. U 2020 hodzie ŭ im źjavilisia Art Puzzle, Killer Sudoku i Nonogram.com Color i inš.
Kamientary