Makiej pra «łahiery dla vostrakapytnych»: Nie vieru fejkavym navinam, jakija zychodziać z vusnaŭ apanientaŭ ułady

Tak Uładzimir Makiej prakamientavaŭ Tut.by aŭdyjazapis, na jakim čałaviek z hołasam eks-kiraŭnika HUBAZiK, a siońnia namieśnika ministra ŭnutranych spraŭ — kamandujučaha ŭnutranymi vojskami Mikałaja Karpiankova, raskazvaje pra ideju budavać łahiery «dla vostrakapytnych» — tych, chto asudžany pa palityčnych artykułach.

Makiej zajaviŭ, što, jak dypłamat, pryvyk daviarać kankretnym faktam i arhumientavanaj infarmacyi.

— Ja razumieju, što možna, jak u nas ciapier modna, nie daviarać arhumientavanaj infarmacyi, aficyjnym źviestkam, ale viedajučy, jak pavodziać siabie roznyja telehram-kanały i jakuju infarmacyju davodziać da našych jeŭrapiejskich zachodnich partnioraŭ apanienty ŭłady, ja pavinien skazać, što ja absalutna nie vieru tym vydumkam i fejkavym navinam, jakija zychodziać z vusnaŭ apanientaŭ ułady. Tamu, pierš čym pryvodzić niejkija vydumanyja fakty i infarmacyju, treba detalova razabracca ŭ ich, — zajaviŭ Makiej.

Kiraŭnik MZS dadaŭ: jon nie schilny śćviardžać, što ŭ Biełarusi ŭsio idealna, jość nad čym pracavać, jość što ŭdaskanalvać, ale padobnaha rodu rečy, na dumku Makieja, pavinny adbyvacca nie pad dyktoŭku źniešnich kurataraŭ, nie pad ciskam vulicy, nie praz revalucyju, jakaja niasie tolki kroŭ i ślozy, a ŭ ramkach zakona.

— Moža być, heta zojmie bolš času — udaskanaleńnie i raźvićcio hramadstva i dziaržavy, moža być, spatrebicca bolš namahańniaŭ, ale razburyć siońnia možna ŭ momant usio, da fundamienta, što było dasiahnuta za ŭsiu papiaredniuju 30-hadovuju historyju našaj niezaležnaści. Chto stvarać budzie i jakim čynam my budziem stvarać novuju dziaržavu na ruinach razburanaha — adkazu ad apanientaŭ ułady ja, na žal, da hetaha času nie pačuŭ. Sankcyi, prybrać, źniščyć, źmieści i hetak dalej i da taho padobnaje. Viedajecie, siońnia ja nazyvaju heta biasčynstvujučaja demakratyja, ja viedaju, što paśla hetaha šerah vypadaŭ u moj adras budzie hučać…

Ale viedajučy mnohich ludziej, jakija znachodziacca tam, za miažoj, viedajučy, što jany kažuć i što prapanujuć u dačynieńni da Biełarusi i biełaruskaha naroda, ja pierakanany, što ŭ vypadku prychodu takich uładaŭ da ŭłady, heta budzie fašystvujučaja demakratyja, — zajaviŭ Makiej.

• 0
• 0
• 0
• 0
• 0
• 0
• 0
• 0