Ministerstva zamiežnych spraŭ Ukrainy pryniało pad uvahu ŭručeńnie ŭkrainskamu pasłu ŭ Biełarusi noty pratestu biełaruskaha MZS i ličyć reakcyju biełaruskaha boku praźmierna emacyjnaj i ŭ cełym biespadstaŭnaj, paviedamlaje Interfaks-Ukraina.

«Chočam nahadać, što dla Ukrainy jak jeŭrapiejskaj demakratyčnaj dziaržavy svaboda słova i svaboda schodaŭ maje fundamientalnaje značeńnie. Nijakich padstaŭ dla abmiežavańnia prava na mirny pratest u hetaj situacyi nie isnuje. Pravaachoŭnyja orhany Ukrainy prymajuć naležnyja miery, kab na pastajannaj asnovie, a asabliva padčas akcyj pratestu, harantavać biaśpieku jak udzielnikaŭ akcyj, tak i pasolstva Biełarusi i jaho rabotnikaŭ», havorycca ŭ paviedamleńni.

U MZS padkreślili, što Ukraina vyrazna prytrymlivajecca pałažeńniaŭ Vienskaj kanviencyi ab dypłamatyčnych adnosinach 1961 h. i harantuje biaśpieku zamiežnych dypłamatyčnych misij na svajoj terytoryi.

«Čakajem, što biełaruski bok taksama z naležnaj adkaznaściu budzie stavicca da svaich mižnarodnych abaviazkaŭ i nie budzie dapuskać parušeńniaŭ dypłamatyčnaha imunitetu nakštałt biespadstaŭnych ahladaŭ dypłamatyčnaha aŭtamabila pasła Ukrainy ŭ Biełarusi pry pierasiačeńni biełaruska-ŭkrainskaj miažy. Zhadajem taksama, što ŭ pieryjad Revalucyi Hodnaści va Ukrainie biełaruski bok nie reahavaŭ na pravakacyi hramadzian, jakija pad ścienami pasolstva Ukrainy ŭ Minsku demanstravali svaju vielmi niedružalubnuju pazicyju da Ukrainy i abranamu ukrainskim narodam jeŭrapiejskaha kursu», — adznačyli ŭ MZS.

***

Niejki čas tamu aktyvisty ŭ Kijevie ŭstalavali kala ŭvachodu ŭ pasolstva Biełarusi kryž u pamiać ab zahinułych udzielnikach masavych akcyj u Biełarusi. Jany prynieśli ich partrety, zapalili śviečki, na drevy paviesili bieł-čyrvona-biełyja stužki. Niekalki čałaviek kruhłasutačna achoŭvajuć stychijny miemaryjał.

Клас
0
Панылы сорам
0
Ха-ха
0
Ого
0
Сумна
0
Абуральна
0