Žurnalista Maksima Łaŭreckaha aryštavali na 15 sutak. Milicyjanier śviedčyŭ z «miaškom» na hałavie
Leninski sud Miensku prysudziŭ karespandentu BiełaPAN Maksimu Łaŭreckamu 15 sutak aryštu za nibyta ŭdzieł u akcyi pratestu pensijaneraŭ 16 listapada, jakuju jon aśviatlaŭ, piša «Svaboda».
Praces viała sudździa Taciana Šocik. Zhodna z pratakołam milicyi, padpisanym Zinkievičam, kala 15:00 pa adrasie Niezaležnaści, 36 Łaŭrecki «aktyŭna ŭdzielničaŭ u masavym mierapryjemstvie z metaj publičnaha vykazvańnia pratestu pa fakcie praviadzieńnia prezydenckich vybaraŭ», a taksama «ruchaŭsia razam z hrupaj hramadzian i vykrykvaŭ lozunh «Žyvie Biełaruś».
Łaŭrecki, jaki znachodzicca ŭ IČU na Akreścina i ŭdzielničaŭ u sudzie praz skajp, raskazaŭ, što vyjšaŭ z metro i čakaŭ na prypynku transpartu, pakul pa praspekcie spuścicca kalona mitynhoŭcaŭ. Praz paŭchviliny padjechaŭ busik. Piać čałaviek u čornaj formie AMAPa ŭziali jaho pad ruki i zaciahnuli ŭ bus. Nie pradstaŭlalisia, nie pakazvali dakumentaŭ. Mety zatrymańnia nie paviedamlali. Žurnalist zajaviŭ, što nia ŭdzielničaŭ u mitynhu i navat nie paśpieŭ ubačyć jaho ŭdzielnikaŭ. Lozunhaŭ nie vykrykvaŭ. Znachodziŭsia tam pa redakcyjnym zadańni, kab zrabić fota.
Adzin z amapaŭcaŭ u mikraaŭtobusie namiaknuŭ, što bačyŭ jaho na raniejšych akcyjach. Abaronca Łaŭreckaha Andrej Mačałaŭ paviedamiŭ, što ŭ pratakole milicyi nie paznačanyja mety zatrymańnia. Jon zajaviŭ sudździ chadajnictvy, što jaho nie dapuścili da padabaronnaha ŭ RUUS, nie dali času aznajomicca sa spravaj. Abaronca taksama vykazaŭ skarhu, što padčas jaho kanfidencyjnaj razmovy z Łaŭreckim u zali niepravamierna prysutničała pradstaŭnica sudu Natalla Novikava. Taksama abaronca paskardziŭsia, što jaho vydalili z zali padčas ustanaŭleńnia asoby śviedki, i zapatrabavaŭ advodu sudździ, bo jana «nie zacikaŭlenaja ŭ vyniasieńni biesstaronnaha prysudu».
Šocik adchiliła ŭsie chadajnictvy. Śviedka Varancoŭ, supracoŭnik milicyi, nie prysutničaŭ u zali, a byŭ pierad kameraj «ź miaškom na hałavie», jak advakat apisaŭ ščylnuju bałakłavu biez vyraznych razrezaŭ dla vačej. Jon skazaŭ, što naziraŭ za zatrymańniem z boku.
Śviedka paŭtaryŭ zapisanaje ŭ pratakole, što Łaŭrecki znachodziŭsia ŭ hrupie hramadzian, vykrykvaŭ «pravakacyjnyja» lozunhi.
Advakat Mačałaŭ zaŭvažyŭ, što śviedku pry adkazie na jaho pytańni padkazvała nieŭstanoŭlenaja asoba za kadram. Sudździa adchiliła patrabavańnie raskryć miescaznachodžańnie śviedki-milicyjanta. Jana taksama admoviła ŭ chadajnictvie dałučyć da spravy videamateryjały z telefona Łaŭreckaha i z kamer videanazirańnia ŭ rajonie zatrymańnia.
Advakat źviarnuŭ uvahu na faktalahičnyja niesupadzieńni ŭ pakazańniach śviedki adnosna miesca zatrymańnia Łaŭreckaha i charaktaru pratestavaj akcyi.
Kamientary